←  Exodus (12/40)  →
1. Nak toj cuanqueb saˈ li tenamit Egipto laj Moisés ut laj Aarón, li Ka̱cuaˈ Dios quixye reheb:
2. —Chalen anakcuan li po aˈin, aˈan chic xticlajic li chihab chokˈ e̱re la̱ex.
3. Ta̱ye reheb chixjunileb laj Israel nak saˈ li laje̱b xbe li po aˈin li cui̱nk teˈxsicˈ junju̱nk li carner re li ju̱nk cabal.
4. Li incˈaˈ qˈuiheb saˈ rochocheb naru nequeˈxxic chi cuaˈac rochbeneb li rech cabal re nak teˈxchoy xtiubal chixjunil lix tibel li carner. Teˈxbir rix joˈ qˈuial li teˈxtzaca li junju̱nk.
5. Usta chiba̱t, usta carner li te̱sicˈ, jun chihab cua̱nk re. Ut tento nak te̱lom li xul ut cha̱bilak. Ma̱cˈaˈak xyajel.
6. Nak ac xesicˈ aˈan, te̱xoc. Saˈ li ca̱laju xbe li po nak ac namoynac, che̱junilex la̱ex aj Israel te̱camsi li chˈina carner li sicˈbil ru e̱ban.
7. Te̱rach xquiqˈuel li carner saˈ xbe̱n li puerta joˈ ajcuiˈ saˈ xcaˈ pacˈalil xcheˈel li puerta saˈ le̱ rochoch li bar yo̱kex cuiˈ chi cuaˈac.
8. Saˈ li kˈojyi̱n aˈan te̱tiu li tib chi pombil. Te̱cuaˈ li caxlan cua xcomon li ma̱cˈaˈ xchˈamal ut te̱tiu ajcuiˈ li ichaj li cˈa.
9. Me̱tiu li tib chi rax chi moco chi caltinbil. Chi pombil ban te̱tiu. Te̱pom chi tzˈakal jun, rochben lix jolom joˈ ajcuiˈ li rok, li rukˈ ut li cuan chi saˈ. Caˈaj cuiˈ lix tzˈaj te̱risi.
10. Li joˈ qˈuial li ta̱elaˈa̱nk me̱xoc chokˈ re cuulaj. Cˈatbil te̱ba̱nu.
11. Joˈcaˈin nak texcuaˈak. Nak ac oc e̱re chi cuaˈac, te̱qˈue lix cˈa̱mal e̱saˈ, te̱qˈue le̱ xa̱b ut cua̱nk le̱ xukˈ saˈ le̱ rukˈ. Te̱se̱ba e̱rib chi cuaˈac. Aˈan li kˈojyi̱n nak la̱in li Ka̱cuaˈ Dios tinnumekˈ saˈ li tenamit chi rakoc a̱tin.
12. Saˈ li kˈojyi̱n aˈan la̱in tincuulak saˈ li tenamit Egipto ut tincamsiheb chixjunileb li xbe̱n alalbej saˈ xya̱nkeb laj Egipto, joˈcan ajcuiˈ li xbe̱n ral li queto̱mk. Ut la̱in tinrakok a̱tin saˈ xbe̱neb lix dioseb li nequeˈxlokˈoni laj Egipto. La̱in li Ka̱cuaˈ Dios.
13. Abanan li quicˈ li te̱qˈue chire xpuertil le̱ rochoch, aˈan e̱retalil chicuu. Nak tincuil li quicˈ, ti̱c tinnumekˈ saˈ le̱ rochoch. Ma̱ jun ta̱ca̱mk saˈ le̱ rochoch la̱ex nak yo̱kin chixcamsinquil li xbe̱n ralaleb aj Egipto.
14. Chalen anakcuan rajlal chihab texninkˈei̱k saˈ incˈabaˈ saˈ li ca̱laju xbe li xbe̱n po. Li ninkˈe aˈin, aˈan re xjulticanquil chanru nak xexincol.
15. Chiru cuukub cutan yo̱kex chi ninkˈei̱k. Saˈ li xbe̱n cutan te̱risi saˈ le̱ rochoch chixjunil li naxqˈue chi si̱pocˈ li caxlan cua. Re li cuukub cutan li caxlan cua li te̱cuaˈ, aˈan xcomon li ma̱cˈaˈ xchˈamal. Ut cui junak cristian tixcuaˈ li caxlan cua xcomon li cuan xchˈamal, li cristian aˈan ta̱isi̱k saˈ e̱ya̱nk.
16. Saˈ li xbe̱n cutan te̱chˈutub e̱rib re xlokˈoninquil li Dios ut saˈ xcuuk li cutan te̱chˈutub cuiˈchic e̱rib. Saˈ li cuib chi cutan aˈan incˈaˈ textrabajik. Caˈaj cuiˈ le̱ tzacae̱mk te̱yi̱b.
17. Saˈ li ninkˈe aˈin te̱cuaˈ li caxlan cua li ma̱cˈaˈ xchˈamal xban nak saˈ li cutan aˈin xexcuisi saˈ li tenamit Egipto. Re xjulticanquil li xinba̱nu e̱re, chalen anakcuan, texninkˈei̱k chi joˈcaˈin joˈ eb ajcuiˈ le̱ ralal e̱cˈajol. Li cutan aˈan te̱oxlokˈi xban nak saˈ li cutan aˈan quexcuisi saˈ li tenamit Egipto.
18. Saˈ li ca̱laju xbe li xbe̱n po nak ac namoynac, te̱cuaˈ li caxlan cua li ma̱cˈaˈ xchˈamal. Joˈcaˈin te̱ba̱nu toj saˈ li jun xcaˈcˈa̱l (21) xbe li po.
19. Cuukub cutan tzˈakal ma̱cˈaˈak li caxlan cua li cuan xchˈamal saˈ le̱ rochoch. Li ani ta̱cuaˈok li caxlan cua li cuan xchˈamal usta yal numecˈ yo̱ saˈ e̱ya̱nk, aˈan ta̱isi̱k saˈ e̱ya̱nk la̱ex aj Israel.
20. Me̱cuaˈ li caxlan cua xcomon li cuan xchˈamal. Saˈ li junju̱nk chi cab, te̱cuaˈ li caxlan cua li ma̱cˈaˈ xchˈamal, chan li Dios.
21. Tojoˈnak laj Moisés quixbok chixjunileb li cui̱nk li nequeˈcˈamoc be saˈ xya̱nkeb laj Israel. Quixye reheb: —Te̱sicˈ le̱ carner ut te̱camsi chokˈ reheb li cuanqueb saˈ le̱ rochoch.
22. Lix quiqˈuel te̱cˈul saˈ junak ucˈal. Te̱tzˈa saˈ li quicˈ jun chˈina jo̱b li pim hisopo xcˈabaˈ. Te̱qˈue li quicˈ saˈ xbe̱n li puerta joˈ ajcuiˈ chiru li cheˈ li cuan xcaˈ pacˈalil li puerta. Ut chetzˈapak e̱rib saˈ le̱ rochoch ut ma̱ jun e̱re ta̱e̱lk toj saˈ li cutan jun chic.
23. Li Dios ta̱numekˈ saˈ li junju̱nk chi cab chi rakoc a̱tin saˈ xbe̱neb laj Egipto. Nak ta̱ril li quicˈ saˈ xbe̱n li puerta ut chiru li cuib chi cheˈ li cuan saˈ xcaˈ pacˈalil li puerta, li Ka̱cuaˈ Dios ta̱numekˈ saˈ li puerta aˈan ut tixram lix be laj camsinel re nak incˈaˈ ta̱oc saˈ le̱ rochoch chi camsi̱nc.
24. Ut chalen anakcuan la̱ex, joˈ eb ajcuiˈ le̱ ralal e̱cˈajol, texninkˈei̱k rajlal chihab re xjulticanquil chanru nak quex-el chak saˈ li tenamit Egipto.
25. Ut chi joˈcaˈin chexninkˈei̱k ut chexlokˈoni̱nk ajcuiˈ nak texcuulak saˈ li naˈajej yechiˈinbil e̱re xban li Ka̱cuaˈ Dios.
26. Nak eb le̱ ralal e̱cˈajol teˈxpatzˈ e̱re cˈaˈru xya̱lal li ninkˈe li nequeba̱nu,
27. la̱ex te̱chˈolob xya̱lal chiruheb ut te̱ye reheb: —Aˈin li kamayej re li ninkˈe pascua re xjulticanquil chanru nak coxcol li Ka̱cuaˈ Dios nak quinumeˈ saˈ li tenamit Egipto chixcamsinquil li xbe̱n ralaleb, chan laj Moisés. Ut eb laj Israel quilajeˈxxulub xjolomeb ut queˈxlokˈoni li Ka̱cuaˈ Dios.
28. Chixjunil li queˈyeheˈ re laj Moisés ut laj Aarón xban li Ka̱cuaˈ Dios, queˈxba̱nu chixjunileb laj Israel.
29. Tuktu kˈojyi̱n nak quinumeˈ li Dios ut quilajxcamsi li xbe̱n ralaleb chixjunileb laj Egipto. Quixcamsi li xbe̱n ralal laj Faraón li kˈaxal nim xcuanquil. Joˈcan ajcuiˈ li cuanqueb saˈ tzˈalam queˈcamsi̱c ajcuiˈ li xbe̱n ralaleb. Quilajeˈcamsi̱c ajcuiˈ li xbe̱n raleb lix queto̱mk chixjunileb, li cuanqueb xcuanquil ut li ma̱cˈaˈeb xcuanquil, chixjunileb li xbe̱n alalbej aran Egipto quilajeˈcamsi̱c.
30. Chiru li kˈojyi̱n aˈan laj Faraón quicuacli. Queˈcuacli ajcuiˈ laj cˈanjel chiru joˈ eb ajcuiˈ chixjunileb laj Egipto. Japjo̱queb re chi ya̱bac chixjunileb laj Egipto xban nak camenakeb chic li xbe̱n alalbej saˈ li junju̱nk chi cab.
31. Ut laj Faraón chiru li kˈojyi̱n aˈan quixtakla resil riqˈuin laj Moisés ut laj Aarón. Quixye reheb: —Cuaclinkex. Elenkex saˈ junpa̱t. Cˈamomak che̱rix chixjunileb laj Israel. Ayukex ut lokˈonihomak ru le̱ Dios joˈ xeye cue.
32. Cˈamomak ajcuiˈ che̱rix le̱ queto̱mk joˈ xeye. Se̱bahomak e̱rib ut elenkex. Ut textijok chicuix, chan laj Faraón.
33. Ut eb laj Egipto queˈxtzˈa̱ma ajcuiˈ chiruheb laj Israel nak teˈxse̱ba rib chi xic. Queˈxye reheb: —Ayukex. Se̱bahomak e̱rib chi xic. Ma̱re toca̱mk ajcuiˈ la̱o cui la̱ex incˈaˈ texxic, chanqueb.
34. Tojoˈnak eb laj Israel queˈxcˈam xkˈemal lix caxlan cua li ma̱cˈaˈ xchˈamal. Queˈxlan lix yokˈlebeb saˈ lix tˈicr ut queˈri̱ka.
35. Ac quilajeˈxba̱nu laj Israel joˈ queˈyeheˈ reheb xban laj Moisés. Quilajeˈxtzˈa̱ma riqˈuineb laj Egipto li cˈaˈak re ru yi̱banbil riqˈuin oro ut plata joˈ ajcuiˈ li rakˈeb.
36. Ut xban nak li Dios quixba̱nu nak eb laj Egipto queˈxcˈam rib saˈ usilal riqˈuineb laj Israel, aˈ yal cˈaˈru li queˈxtzˈa̱ma, queˈqˈueheˈ reheb. Chi joˈcaˈin eb laj Israel quiru queˈrisi chiruheb laj Egipto nabal lix biomaleb.
37. Ut chixjunileb laj Israel queˈel saˈ li tenamit Ramesés ut queˈco̱eb saˈ li tenamit Sucot. Cuakib ciento mil (600,000) chi cui̱nk queˈco̱eb chi rok. Eb li ixk joˈ ajcuiˈ eb li cocˈal ma̱cˈaˈeb saˈ ajl.
38. Ut cuanqueb ajcuiˈ laj Egipto li queˈco̱eb saˈ xya̱nkeb laj Israel. Ut ma̱ caˈchˈin xqˈuial li queto̱mk queˈxcˈam nak queˈco̱eb.
39. Xban nak queˈisi̱c saˈ junpa̱t saˈ li tenamit Egipto, ma̱cˈaˈ xcuaheb yi̱banbil nak queˈco̱eb. Riqˈuin lix kˈemal li caxlan cua queˈxyi̱b lix cuaheb xcomon li ma̱cˈaˈ xchˈamal.
40. Eb laj Israel ca̱hib ciento riqˈuin laje̱b xcaˈcˈa̱l (430) chihab queˈcuan saˈ li tenamit Egipto.
41. Tzˈakal ca̱hib ciento riqˈuin laje̱b xcaˈcˈa̱l (430) chihab nak queˈel chixjunileb li ralal xcˈajol li Dios saˈ li tenamit Egipto.
42. Saˈ li kˈojyi̱n aˈan li Ka̱cuaˈ Dios quixcˈacˈaleheb chi us re nak ta̱risiheb saˈ li tenamit Egipto. Ut riqˈuin aˈan chalen anakcuan eb laj Israel nequeˈxyoˈle li kˈojyi̱n aˈan re xjulticanquil chanru nak li Dios quirisiheb chak saˈ li tenamit Egipto.
43. Li Ka̱cuaˈ Dios quixye re laj Moisés ut laj Aarón: —Joˈcaˈin nak texninkˈei̱k re xjulticanquil chanru nak quexcoleˈ nak quilajeˈcamsi̱c li xbe̱n ralaleb laj Egipto. Ma̱ jun jalan xtenamit ta̱tzaca̱nk re li tzacae̱mk aˈin.
44. Eb li lokˈbil mo̱s cui xeˈxcˈul li circuncisión ta̱ru̱k teˈxtzaca li tzacae̱mk aˈan.
45. Abanan eb li tojbil mo̱s ut eb li jalan xtenamiteb incˈaˈ naru teˈxtzaca.
46. Te̱ba̱nu saˈ junak cab. Incˈaˈ te̱jor li bak ut incˈaˈ te̱risi li tib chirix cab.
47. Chixjunileb laj Israel teˈxba̱nu aˈin.
48. Cui cuanqueb jalan xtenamit saˈ e̱ya̱nk teˈraj teˈoque̱nk saˈ li ninkˈe aˈin, tento nak chixjunileb li cui̱nk teˈxcˈul li circuncisión. Nak ac xeˈxcˈul li circuncisión, e̱comonakeb chic ut naru chic teˈxtzaca li tzacae̱mk aˈin. Aban ma̱ jun naru ta̱tzaca̱nk re cui ma̱jiˈ xcˈul li circuncisión.
49. Juntakˈe̱takeb chic li chakˈrab chokˈ e̱re joˈ ajcuiˈ reheb li jalan xtenamiteb.
50. Ut joˈ quixye li Ka̱cuaˈ Dios reheb laj Moisés ut laj Aarón, joˈcan quilajeˈxba̱nu chixjunileb laj Israel.
51. Ut saˈ li cutan aˈan li Ka̱cuaˈ Dios quilajrisiheb chak laj Israel saˈ li tenamit Egipto. Nequeˈtzololnac nak queˈel laj Israel chi junju̱nk chˈu̱tal aran Egipto.
←  Exodus (12/40)  →