←  1Samuel (27/31)  →
1. Laj David quixye saˈ xchˈo̱l: —Ta̱cuulak xkˈehil nak laj Saúl tinixcamsi. Kˈaxal us cui tine̱lk saˈ xya̱nkeb laj Israel ut tinxic chi cua̱nc saˈ xya̱nkeb laj filisteos re nak laj Saúl tixcanab insicˈbal, chan.
2. Joˈcan nak laj David rochbeneb li cuakib ciento lix soldados queˈco̱eb riqˈuin laj Aquis, lix reyeb laj Gat. Laj Aquis, aˈan li ralal laj Maoc.
3. Laj David ut eb lix soldados queˈcuan riqˈuin laj Aquis aran Gat rochbeneb li rixakileb ut eb lix cocˈal. Cuib li rixakil laj David cuan rochben. Aˈaneb lix Ahinoam re Jezreel ut lix Abigail li quicuan chokˈ rixakil laj Nabal aran Carmel.
4. Laj Saúl quirabi resil nak laj David co̱ saˈ li tenamit Gat. Joˈcan nak quixcanab xsicˈbal laj David.
5. Laj David quixye re laj Aquis: —At rey, cui la̱at sa a̱chˈo̱l cuiqˈuin, nintzˈa̱ma cha̱cuu nak ta̱qˈue innaˈaj saˈ jun li chˈina tenamit re nak aran tocana̱k. Moco incˈulub ta nak tincua̱nk saˈ la̱ tenamit, at rey, chan.
6. Joˈcan nak laj Aquis quixqˈue re li tenamit Siclag. Ut chalen toj anakcuan li tenamit Siclag quicana chokˈ reheb lix reyeb laj Judá.
7. Jun chihab riqˈuin ca̱hib po quicuan laj David saˈ lix tenamiteb laj filisteos.
8. Saˈ eb li cutan aˈan laj David ut eb li soldado li cuanqueb rochben, rajlal nequeˈxic chi pletic riqˈuineb laj Gesur, eb laj Gezer ut eb laj Amalec re teˈxcˈam li cˈaˈru reheb. Eb li naˈajej li queˈcuan cuiˈ li cristian aˈan naticla chak Telaim li nacana saˈ xjayal li naˈajej Shur ut nacuulac toj Egipto.
9. Naxcamsiheb li cui̱nk ut eb li ixk. Ma̱ jun chic naxcanabeb chi yoˈyo. Ut naxcˈameb li queto̱mk, eb li carner, eb li bu̱r, ut eb li camello, joˈ ajcuiˈ li akˈej. Ut nequeˈsukˈi cuiˈchic riqˈuin laj Aquis.
10. Ut laj Aquis naxye reheb: —¿Bar xexcuulac chi pletic anakcuan?— Ut laj David naxye re: —Xocuulac Judá saˈ li sur.— Malaj ut naxye: —Xocuulac Jerameel saˈ li sur.— Malaj ut naxye: —Xocuulac saˈ li sur cuanqueb cuiˈ eb laj ceneo, chan.
11. Ma̱ jun chic reheb li cristian naxcanabeb chi yoˈyo xban nak incˈaˈ quiraj nak teˈxic aran Gat chixyebal resil li cˈaˈru yo̱ chixba̱nunquil laj David. Joˈcan quixba̱nu laj David joˈ najtil quicuan aran saˈ xya̱nkeb laj filisteos.
12. Laj Aquis cˈojcˈo xchˈo̱l riqˈuin laj David. Quixye saˈ xchˈo̱l: —Laj David ta̱cˈanjelak chicuu joˈ najtil yoˈyo̱k xban nak kˈaxal xicˈ chic ta̱ilekˈ xbaneb laj Israel, li rech tenamitil, riqˈuin li cˈaˈru yo̱ chixba̱nunquil, chan.
←  1Samuel (27/31)  →