←  1Chronicles (5/29)  →
1. Aˈaneb aˈin li ralal xcˈajol laj Rubén, li xbe̱n ralal laj Israel: Xban nak laj Rubén quixchˈic rib riqˈuin li ixk li quicuan riqˈuin lix yucuaˈ, nak incˈaˈ quiqˈueheˈ re li tento raj tixcˈul joˈ xbe̱n alalbej, aˈ chic li ralal laj José quicˈuluc re li tento raj tixcˈul laj Rubén. Incˈaˈ chic quiqˈueheˈ xcuanquil joˈ xbe̱n alalbej.
2. Eb li ralal xcˈajol laj Judá, aˈaneb li queˈniman xcuanquil saˈ xya̱nkeb li rech tenamitil, ut saˈ xya̱nkeb aˈan quiyoˈla li jun li ta̱takla̱nk saˈ xbe̱neb aˈan. Abanan laj José li quie̱chanin re li tento raj tixcˈul li xbe̱n alalbej.
3. Aˈaneb aˈin li ralal laj Rubén, li xbe̱n ralal laj Israel: laj Hanoc, laj Falú, laj Hezrón ut laj Carmi.
4. Aˈaneb aˈin li ralal xcˈajol laj Joel: li ralal laj Joel, aˈan laj Semaías; li ralal laj Semaías, aˈan laj Gog; li ralal laj Gog, aˈan laj Simei;
5. li ralal laj Simei, aˈan laj Micaía; li ralal laj Micaía, aˈan laj Reaía; li ralal laj Reaía, aˈan laj Baal;
6. li ralal laj Baal, aˈan laj Beera li quichapeˈ ut quicˈameˈ xban laj Tiglat-pileser lix reyeb laj asiria. Laj Beera, aˈan li quitaklan saˈ xbe̱neb li ralal xcˈajol laj Rubén.
7. Eb li ri̱tzˈin laj Beera, tzˈi̱banbil retalil aˈ yal chanru xqˈuialeb li ralal xcˈajol. Aˈaneb aˈin: eb li queˈcˈamoc be, aˈaneb laj Jeiel ut laj Zacarías;
8. laj Bela li ralal laj Azaz; laj Azaz, aˈan li ralal laj Sema; laj Sema, aˈan li ralal laj Joel. Eb aˈin queˈcuan aran Aroer toj saˈ li tenamit Nebo ut Baal-meón.
9. Queˈcuan saˈ li oriente. Naticla saˈ li chaki chˈochˈ ut nacuulac cuan cuiˈ li nimaˈ Eufrates xban nak queˈqˈuian lix queto̱mkeb aran Galaad.
10. Nak cuan laj Saúl chokˈ xreyeb, eb li ralal xcˈajol laj Rubén queˈpletic riqˈuineb laj agarenos ut queˈnumta saˈ xbe̱neb. Joˈcan nak queˈxyi̱b lix muheba̱leb saˈ chixjunil li naˈajej Galaad li cuan saˈ li oriente.
11. Eb li ralal xcˈajol laj Gad queˈcuan saˈ li naˈajej li cuan saˈ xcaˈyaba̱l lix naˈajeb li ralal xcˈajol laj Rubén. Lix naˈajeb aˈan Basán. Nacuulac toj Salca.
12. Laj Joel, aˈan li kˈaxal nim xcuanquil aran Baasán. Chirix aˈan, cuan laj Safán ut chirix aˈan cuan laj Jaanai ut chirix laj Jaanai, cuan laj Safat.
13. Eb li jun chˈol chic li ralal xcˈajol, aˈ yal chanru xqˈuialeb, aˈaneb laj Micael, laj Mesulam, laj Seba, laj Jorai, laj Jacán, laj Zia ut laj Heber. Cuukubeb chixjunileb.
14. Aˈaneb aˈin li ralal xcˈajol laj Abihail li ralal laj Huri: laj Huri, aˈan li ralal laj Jaroa; laj Jaroa, aˈan li ralal laj Galaad; laj Galaad, aˈan li ralal laj Micael; laj Micael, aˈan li ralal laj Jesisai; laj Jesisai, aˈan li ralal laj Jahdo; laj Jahdo, aˈan li ralal laj Buz;
15. ut laj Ahí li ralal laj Abdiel. Laj Abdiel, aˈan li ralal laj Guni. Laj Ahí, aˈan li nataklan saˈ xbe̱neb aˈan.
16. Queˈcuan saˈ eb li naˈajej Galaad, ut Basán, joˈ ajcuiˈ saˈ eb li cocˈ cˈaleba̱l, ut saˈ chixjunil li naˈajej Sarón li cuan cuiˈ li cha̱bil pachˈayaˈ.
17. Chixjunileb aˈin ajlanbileb chi chˈu̱tal saˈ eb li cutan nak laj Jotam cuan chokˈ xreyeb laj Judá ut nak laj Jeroboam cuan chokˈ xreyeb laj Israel.
18. Eb li ralal xcˈajol laj Rubén, ut eb li ralal xcˈajol laj Gad ut li yi jach li ralal xcˈajol laj Manasés, aˈan cha̱bileb soldados. Cauheb rib chi pletic. Cuanqueb xchˈi̱chˈ re pletic ut cuanqueb ajcuiˈ xchˈi̱chˈ re xcolbal re xchˈo̱leb. Nequeˈxnau pletic riqˈuin tzimaj. Queˈxtzol rib chi us chi pletic. Ca̱hib roxcˈa̱l mil riqˈuin cuukub ciento riqˈuin oxcˈa̱l (44,760) chixjunileb li nequeˈxnau pletic chi us.
19. Eb aˈan queˈpletic riqˈuineb laj agarenos ut riqˈuineb li ralal xcˈajol laj Jetur, laj Nafis ut laj Nodab.
20. Li Dios quixtenkˈaheb xban nak queˈxcˈojob xchˈo̱leb riqˈuin ut queˈxya̱ba xcˈabaˈ nak yo̱queb chi pletic. Eb laj agarenos ut eb li yo̱queb chi tenkˈa̱nc reheb queˈxkˈaxtesi ribeb saˈ rukˈeb xban nak li Dios quixtenkˈaheb.
21. Queˈxcˈam chokˈ reheb lix queto̱mkeb laj agarenos. Queˈxchap laje̱b roxcˈa̱l mil lix camellos (50,000), cuib ciento mil riqˈuin laje̱b roxcˈa̱l mil (250,000) lix carner, ut cuib mil (2,000) lix bu̱r. Ut queˈxchap ajcuiˈ jun ciento mil (100,000) li cristian.
22. Nabaleb li queˈcamsi̱c xban nak li Dios, aˈan li quitenkˈan reheb laj Israel chire̱chaninquil li ple̱t. Queˈcuan saˈ li naˈajej aˈan toj nak queˈchapeˈ ut queˈcˈameˈ chi pre̱xil saˈ jalan tenamit.
23. Ut li yi jach li ralal xcˈajol laj Manasés cˈajoˈ nak queˈtam. Queˈcuan saˈ eb li naˈajej Basán, Baal-hermón ut Senir ut nacuulac toj saˈ li tzu̱l Hermón.
24. Aˈaneb aˈin li queˈjolomin reheb li junju̱nk chˈu̱tal: laj Efer, laj Isi, laj Eliel, laj Azriel, laj Jeremías, laj Hodavías ut laj Jahdiel. Eb li cui̱nk aˈin cauheb rib chi pletic, naˈno̱queb ruheb, ut aj cˈamol beheb.
25. Abanan eb aˈan queˈxtzˈekta̱na li Dios li queˈxlokˈoni lix xeˈto̱nil yucuaˈeb. Ut queˈoc chixlokˈoninquil lix yi̱banbil dios li tenamit li queˈisi̱c xban li Dios nak eb laj Israel yo̱queb chi oc saˈ li naˈajej aˈan.
26. Joˈcan nak li Ka̱cuaˈ lix Dioseb laj Israel quixqˈue saˈ xchˈo̱l laj Tiglat-pileser lix reyeb laj Asiria nak ta̱xic chi pletic riqˈuineb li ralal xcˈajol laj Rubén, ut eb li ralal xcˈajol laj Gad ut li yi jach li ralal xcˈajol laj Manasés. Ut quixcˈameb chi pre̱xil saˈ eb li tenamit Halah, Habor ut Hara cuan cuiˈ li nimaˈ Gozán. Ut aran cuanqueb toj chalen anakcuan. (Li rey Tiglat-pileser aˈan nequeˈxye ajcuiˈ aj Pul re.)
←  1Chronicles (5/29)  →