1Chronicles (26/29)  

1. Ut queˈjachi̱c ajcuiˈ ruheb li queˈqˈueheˈ chi cˈacˈale̱nc saˈ eb li oqueba̱l. Laj Meselemías, aˈan li ralal laj Coré. Ut laj Coré, aˈan li ralal laj Asaf.
2. Aˈaneb aˈin li ralal laj Meselemías: li xbe̱n, aˈan laj Zacarías; li xcab, aˈan laj Jediael; li rox, aˈan laj Zebadías; ut li xca̱, aˈan laj Jatniel;
3. li roˈ, aˈan laj Elam; li xcuak, aˈan laj Johanán; ut li xcuuk, aˈan laj Elioenai.
4. Eb li ralal laj Obed-edom, aˈaneb aˈin: li xbe̱n, aˈan laj Semaías; li xcab, aˈan laj Josabad; li rox, aˈan laj Joa; li xca̱, aˈan laj Sacar; li roˈ, aˈan laj Natanael;
5. li xcuak, aˈan laj Amiel; li xcuuk, aˈan laj Isacar; li xcuakxak, aˈan laj Peultai. (Li Dios quirosobtesi laj Obed-edom ut quixqˈue nabal li ralal.)
6. Joˈcan ajcuiˈ laj Semaías, li ralal laj Obed-edom. Queˈcuan nabal li ralal. Ut aˈaneb chic li queˈtaklan saˈ xbe̱neb li rechˈalal. Cauheb xchˈo̱l ut cauheb rib.
7. Eb li ralal laj Semaías, aˈaneb aˈin: laj Otni, laj Rafael, laj Obed, laj Elzabad, laj Eliú, ut laj Samaquías. Aˈaneb cauheb rib.
8. Chixjunileb aˈin, aˈaneb li ralal xcˈajol laj Obed-edom. Cuib xca̱cˈa̱l chixjunileb rochbeneb li ralal ut eb li rechˈalal. Cauheb rib ut cauheb xchˈo̱l chixba̱nunquil lix cˈanjel.
9. Ut eb li ralal ut eb li rechˈalal laj Meselemías, aˈan cuanqueb cuakxaklaju ut cauheb rib.
10. Laj Hosa, aˈan xcomoneb li ralal xcˈajol laj Merari. Laj Simri, aˈan li quicˈamoc be chiruheb li ralal laj Hosa usta ma̱cuaˈ aˈan li xbe̱n alalbej. Quixakaba̱c chi takla̱nc xban lix yucuaˈ.
11. Li xcab, aˈan laj Hilcías; li rox, aˈan laj Tebalías; ut li xca̱, aˈan laj Zacarías. Eb li ralal ut eb li rechˈalal laj Hosa, oxlajuheb chixjunileb.
12. Aˈaneb aˈin li queˈtzˈak cˈacˈale̱nc saˈ eb li oqueba̱l re lix templo li Ka̱cuaˈ. Eb li nequeˈcˈamoc be queˈcˈanjelac joˈ queˈcˈanjelac chixjunileb li rechˈalal.
13. Queˈxbu̱li rix li cˈanjel re rilbal ani ta̱tzˈak cˈacˈale̱nc saˈ li junju̱nk chi oqueba̱l, joˈ li ac che̱c joˈ ajcuiˈ li toj sa̱jeb, aˈ yal joˈ qˈuialeb saˈ li junju̱nk cabaleb.
14. Nak queˈbu̱lic laj Selemías, aˈan li quitzˈak cˈacˈale̱nc saˈ li oqueba̱l li cuan saˈ li oriente li na-el cuiˈ li sakˈe. Ut laj Zacarías li ralal, li naxnau qˈuehoc naˈleb, aˈan li quicˈacˈalen saˈ li norte.
15. Ut laj Obed-edom, aˈan li quitzˈak cˈacˈale̱nc saˈ li oqueba̱l li cuan saˈ li sur. Ut eb li ralal queˈtzˈak cˈanjelac saˈ li naˈajej li naxocman cuiˈ li tzacae̱mk li nacˈanjelac saˈ li templo.
16. Laj Supim ut laj Hosa, aˈaneb li nequeˈcˈacˈalen re li oqueba̱l re Salequet, li cuan saˈ li taksi̱nc saˈ li oeste. Ac chˈolchˈo jokˈe teˈcˈanjelak li junju̱nk.
17. Saˈ li oqueba̱l li cuan saˈ li este cuanqueb cuakib laj levita li queˈcˈacˈalen rajlal cutan. Saˈ li norte queˈcuan ca̱hib ut queˈcuan ajcuiˈ ca̱hib saˈ li sur. Ut caˈcab queˈcˈacˈalen re li oqueba̱l re li cab li xocxo cuiˈ li cˈaˈak re ru.
18. Ut saˈ li naˈajej li xocxo cuiˈ li cˈaˈak re ru li nacˈanjelac saˈ li templo, cuanqueb ca̱hib chi cˈacˈale̱nc saˈ be saˈ li oeste ut cuib queˈcuan saˈ li naˈajej.
19. Joˈcaˈin nak queˈjachi̱c ruheb saˈ li cˈanjel. Eb li ralal xcˈajoleb laj Coré ut laj Merari, aˈaneb li queˈcˈacˈalen reheb li oqueba̱l re li templo.
20. Laj Ahías, aˈan jun xcomoneb li ralal xcˈajol laj Leví. Ut aˈan li qui-iloc re li naˈajej li xocxo cuiˈ li cˈaˈru re li templo li terto xtzˈak, joˈ ajcuiˈ li naˈajej li cuan cuiˈ li cˈaˈak re ru li santobresinbil.
21. Eb li ralal xcˈajol laj Laadán, aˈaneb li queˈtaklan saˈ xbe̱neb li junju̱nk cabal. Laj Laadán, aˈan li ralal laj Gersón. Laj Gersón, aˈan lix xeˈto̱nil xyucuaˈeb li ralal xcˈajol laj Jehiel.
22. Eb li ralal laj Jehieli, aˈaneb laj Zetam ut laj Joel. Aˈaneb laj ilol re li terto xtzˈak li cuan saˈ lix templo li Ka̱cuaˈ.
23. Ut queˈqˈueheˈ ajcuiˈ xcˈanjeleb li ralal xcˈajol laj Amram, joˈ ajcuiˈ li ralal xcˈajol laj Izhar, joˈ ajcuiˈ li ralal xcˈajol laj Hebrón, joˈ ajcuiˈ li ralal xcˈajol laj Uziel.
24. Laj Sebuel, li ralal laj Gersón, aˈan li quijolomin re rilbal li cˈaˈak re ru li terto xtzˈak. Laj Gersón, aˈan li ralal laj Moisés.
25. Aˈaneb aˈin li ralal xcˈajol laj Eliezer, li ri̱tzˈin laj Gersón. Li ralal laj Eliezer, aˈan laj Rehabías; li ralal laj Rehabías, aˈan laj Jesaías; li ralal laj Jesaías, aˈan laj Joram; li ralal laj Joram, aˈan laj Zicri; li ralal laj Zicri, aˈan laj Selomit.
26. Laj Selomit ut eb li ri̱tzˈin, aˈaneb li queˈcˈacˈalen re li cˈaˈak re ru li queˈxkˈaxtesi chi cˈanjelac chiru li Dios li rey David, joˈ eb ajcuiˈ li nequeˈtaklan saˈ xbe̱neb li junju̱nk cabal, ut eb li ni̱nkeb xcuanquil, joˈ eb ajcuiˈ li nequeˈtaklan saˈ xbe̱neb li junju̱nk chˈu̱tal chi soldado.
27. Li cˈaˈak re ru li queˈre̱chani chak saˈ eb li ple̱t, aˈan li queˈxkˈaxtesi chi cˈanjelac re xyi̱banquil lix templo li Ka̱cuaˈ.
28. Cuanqueb ajcuiˈ aran li cˈaˈak re ru li quikˈaxtesi̱c chi cˈanjelac chiru li Ka̱cuaˈ xbaneb li profeta Samuel, laj Saúl li ralal laj Cis, laj Abner li ralal laj Ner, ut laj Joab lix yum lix Sarvia. Chixjunil li cˈaˈak re ru li kˈaxtesinbil chiru li Ka̱cuaˈ, aˈaneb laj Selomit ut eb li rechˈalal li queˈcˈacˈalen re.
29. Saˈ xya̱nkeb li ralal xcˈajol laj Izhar, laj Quenanías ut eb li ralal queˈtaklan saˈ xbe̱neb li tenamit ut queˈrakoc a̱tin.
30. Saˈ xya̱nkeb li ralal xcˈajol laj Hebrón, laj Hasabías rochbeneb li rechˈalal queˈtaklan saˈ xbe̱neb laj Israel li cuanqueb jun pacˈal li nimaˈ Jordán saˈ li oeste. Cauheb rib. Queˈcˈanjelac chiru li Dios ut queˈcˈanjelac ajcuiˈ chiru li rey. Eb aˈan cuanqueb jun mil riqˈuin cuukub ciento (1,700).
31. Saˈ xya̱nkeb li ralal xcˈajol laj Hebrón, laj Jerías aˈan li quitaklan saˈ xbe̱neb, aˈ yal chanru tzˈi̱banbil lix cˈabaˈeb li junju̱nk chˈu̱tal. Nak yo̱ cˈacˈa̱l chihab roquic laj David chokˈ xreyeb laj Israel, queˈoc chirilbal aˈ yal chanru tzˈi̱banbil lix cˈabaˈeb ut queˈxtau nak cuanqueb li cui̱nk cauheb rib saˈ xya̱nkeb li cuanqueb saˈ li tenamit Jazer xcue̱nt Galaad.
32. Laj David quixsiqˈueb ru li cuib mil riqˈuin cuukub ciento (2,700) chi cui̱nk li cauheb rib ut aˈaneb li nequeˈjolomin re li junju̱nk cabal. Quixqˈueheb chi takla̱nc saˈ xbe̱neb li ralal xcˈajol laj Rubén, ut saˈ xbe̱neb li ralal xcˈajol laj Gad, joˈ ajcuiˈ li yi jach li ralal xcˈajol laj Manasés. Queˈcˈanjelac chiru li Dios ut queˈcˈanjelac ajcuiˈ chiru li rey.

  1Chronicles (26/29)