←  1Chronicles (14/29)  →

---

1.

Laj Hiram lix reyeb laj Tiro quixtaklaheb lix takl riqˈuin laj David. Ut quixtaklaheb ajcuiˈ laj tzˈac ut eb laj pechˈ joˈ ajcuiˈ li cha̱bil cheˈ chacalteˈ re nak teˈxyi̱b chi cha̱bil li rochoch.

2.

Ut laj David quixtau ru nak li Dios, aˈan li quixakaban re saˈ xnaˈaj lix cuanquilal saˈ xya̱nkeb laj Israel. Ut quixtau ajcuiˈ ru nak li Dios quixnimobresi xcuanquil xban nak naxraheb lix tenamit Israel.

3.

Laj David toj quixcˈameb chic nabal rixakil ut queˈcuan ralal ut xrabin riqˈuineb.

4.

Aˈaneb aˈin lix cˈabaˈeb li ralal li queˈyoˈla aran Jerusalén: laj Samúa, laj Sobab, laj Natán, laj Salomón,

5.

laj Ibhar, laj Elisúa, laj Elpelet,

6.

laj Noga, laj Nefeg, laj Jafía,

7.

laj Elisama, laj Beeliada, ut laj Elifelet.

8.

Eb laj filisteo queˈrabi resil nak laj David quixakaba̱c chokˈ xreyeb chixjunileb laj Israel. Joˈcan nak queˈco̱eb chixjunileb laj filisteo chi pletic riqˈuin. Laj David quirabi resil nak eb laj filisteo ac xeˈco̱eb chi pletic riqˈuin. Joˈcan nak co̱ chi pletic riqˈuineb.

9.

Eb laj filisteo queˈnachˈoc ut queˈcana saˈ li ru takˈa re Refaim.

10.

Laj David quitijoc ut quixye re li Dios: —¿Ma tinxic chi pletic riqˈuineb laj filisteo? ¿Ma tina̱tenkˈa chi numta̱c saˈ xbe̱neb? chan. Ut li Ka̱cuaˈ quixye re: —Ayu chi pletic riqˈuineb. La̱in tinkˈaxtesiheb saˈ a̱cuukˈ, chan.

11.

Joˈcan nak laj David rochbeneb lix soldado queˈco̱eb saˈ li naˈajej Baal-perazim ut aran queˈnumta saˈ xbe̱neb laj filisteo ut laj David quixye: —Li Ka̱cuaˈ quixsach ruheb li xicˈ nequeˈiloc cue. Chanchan nak xeˈcˈameˈ xban butˈ, chan. Joˈcan nak quixqˈue Baal-perazim chokˈ xcˈabaˈ li naˈajej aˈan.

12.

Eb laj filisteo queˈxcanab lix dioseb aran nak queˈe̱lelic ut laj David quixtakla xcˈatbaleb.

13.

Chirix chic aˈan, eb laj filisteo queˈco̱eb cuiˈchic saˈ li ru takˈa re Refaim.

14.

Laj David quitijoc cuiˈchic ut quixpatzˈ re li Dios cˈaˈru us tixba̱nu. Ut li Ka̱cuaˈ quixye re: —Incˈaˈ tat-oc chi ubej. Te̱sut rix lix naˈajeb ut texpletik riqˈuineb cuanqueb cuiˈ li cheˈ bálsamo.

15.

Nak ta̱cuabi li choki̱nc saˈ ruˈujeb li cheˈ, la̱at tatxic chi pletic riqˈuineb xban nak la̱in tinxic chi ubej ut tinsach xcuanquileb lix solda̱deb aj filisteo, chan li Dios.

16.

Ut laj David quixba̱nu joˈ quixye li Dios. Quixcamsiheb lix solda̱deb laj filisteo. Naticla saˈ li tenamit Gabaón ut quicuulac toj cuan cuiˈ li tenamit Gezer.

17.

Joˈcan nak qui-abi̱c resil yalak bar li cˈaˈru quixba̱nu laj David. Ut li Ka̱cuaˈ quixqˈueheb xxiuheb chixjunileb li jalan tenamit nak queˈrabi resil.

---

←  1Chronicles (14/29)  →