←  1Chronicles (12/29)  →
1. Aˈaneb aˈin li cui̱nk li queˈchal riqˈuin laj David saˈ li naˈajej Siclag nak laj David toj yo̱ chixmukbal rib chiru laj Saúl, li ralal laj Sis. Eb li cui̱nk aˈin cauheb rib chi pletic ut aˈaneb ajcuiˈ li queˈtenkˈan re chi pletic.
2. Eb li cui̱nk aˈin cuanqueb xtzimaj riqˈuineb. Ut naru nequeˈcutuc riqˈuin lix nim ukˈ ut riqˈuin lix tzˈe ukˈ. Nequeˈcutuc ajcuiˈ pec riqˈuin rantˈin. Aˈaneb rechˈalal laj Saúl ut xcomoneb li ralal xcˈajol laj Benjamín.
3. Laj Ahiezer, aˈan li nataklan saˈ xbe̱neb. Chirix laj Ahiezer cuan laj Joás. Aˈaneb li ralal laj Semaa, Gabaa xtenamiteb. Aˈaneb aˈin li soldados: laj Jeziel ut laj Pelet, eb li ralal laj Azmavet; laj Beraca; laj Jehú, Anatot xtenamit;
4. laj Ismaías, Gabaón xtenamit, li kˈaxal cau xchˈo̱l chi pletic saˈ xya̱nkeb li laje̱b xcaˈcˈa̱l li nequeˈtaklan saˈ xbe̱neb li soldado; laj Jeremías; laj Jahaziel, laj Johanán; laj Jozabad, Geder xtenamit;
5. laj Eluzai; laj Jerimot; laj Bealías; laj Semarías; laj Sefatías, Haruf xtenamit;
6. laj Elcana; laj Isías; laj Azareel; laj Joezer; ut laj Josobeam, xcomoneb li ralal xcˈajol laj Coré;
7. laj Joela ut laj Zebadías, eb li ralal laj Jeroham, Gedor xtenamiteb.
8. Cuanqueb ajcuiˈ xcomoneb li ralal xcˈajol laj Gad queˈco̱eb riqˈuin laj David re teˈoque̱nk chirix nak cuan chak saˈ li chaki chˈochˈ saˈ li cab li nequeˈxcol cuiˈ ribeb. Eb li cui̱nk aˈin nequeˈcuulac chiru pletic. Cauheb rib ut nequeˈxnau pletic chi us. Cuanqueb xchˈi̱chˈ re xcolbal ribeb ut cuanqueb xla̱ns saˈ rukˈeb. Joskˈ nequeˈiloc. Chanchaneb li cakcoj. Nequeˈxnau a̱linac saˈ eb li tzu̱l. Chanchaneb li quej.
9. Li xbe̱n, aˈan laj Ezer; li xcab, aˈan laj Obadías; li rox, aˈan laj Eliab;
10. li xca̱, aˈan laj Mismana; li roˈ, aˈan laj Jeremías;
11. li xcuak, aˈan laj Atai; ut li xcuuk, aˈan laj Eliel;
12. li xcuakxak, aˈan laj Johanán; ut li xbele, aˈan laj Elzabad;
13. li xlaje, aˈan laj Jeremías; ut li xjunlaju, aˈan laj Macbani.
14. Aˈaneb aˈin li queˈtaklan saˈ xbe̱neb lix soldado li ralal xcˈajol laj Gad. Li incˈaˈ mas cau rib chi pletic nataklan saˈ xbe̱n jun ciento chi soldado ut li kˈaxal cau rib chi pletic nataklan saˈ xbe̱n jun mil chi soldado.
15. Aˈaneb ajcuiˈ aˈin li queˈnumeˈ saˈ li nimaˈ Jordán nak yo̱ chi buti̱rc saˈ xbe̱n li po re li chihab aˈan. Ut queˈra̱linaheb chixjunileb li cuanqueb saˈ li ru takˈa saˈ li oriente ut saˈ li poniente.
16. Ut cuanqueb ajcuiˈ li ralal xcˈajol laj Benjamín ut eb li ralal xcˈajol laj Judá queˈco̱eb riqˈuin laj David saˈ li naˈajej li nequeˈxcol cuiˈ ribeb.
17. Qui-el laj David chixcˈulbaleb ut quixye reheb: —Cui saˈ sahil chˈo̱lej xexchal cuiqˈuin chintenkˈanquil, texincˈul chi sa saˈ inchˈo̱l. Abanan cui xexchal re tine̱kˈaxtesi saˈ rukˈeb li xicˈ nequeˈiloc cue chi ma̱cˈaˈ inma̱c, aˈ taxak li Dios li queˈxlokˈoni inxeˈto̱nil yucuaˈ chi qˈuehoc e̱re chixtojbal e̱ma̱c.—
18. Quichal lix musikˈ li Dios riqˈuin laj Amasai li nataklan saˈ xbe̱neb li laje̱b xcaˈcˈa̱l chi cui̱nk. Ut laj Amasai quixye: —Chicua̱nk taxak li tuktu̱quil usilal a̱cuiqˈuin, at David. La̱at li ralal laj Isaí. Chicua̱nk taxak li tuktu̱quilal a̱cuiqˈuin la̱at joˈ ajcuiˈ riqˈuineb li yo̱queb chi tenkˈa̱nc a̱cue xban nak li Ka̱cuaˈ cuan a̱cuiqˈuin, chan re. Chirix aˈan laj David quixcˈuleb ut quixqˈueheb saˈ xya̱nkeb li nequeˈtaklan saˈ xbe̱neb lix soldado.
19. Cuanqueb ajcuiˈ xcomoneb li ralal xcˈajol laj Manasés queˈco̱eb riqˈuin laj David nak yo̱ chi xic rochbeneb laj filisteo chi pletic riqˈuineb lix soldado laj Saúl. Abanan laj David incˈaˈ quixtenkˈaheb xban nak eb li nequeˈtaklan saˈ xbe̱neb lix soldado laj filisteo incˈaˈ queˈraj nak ta̱xic chirixeb chi pletic. Queˈxcˈoxla nak ma̱re tixjunaji rib riqˈuin lix soldado laj Saúl.
20. Nak yo̱ chi xic laj David Siclag, eb li ralal xcˈajol laj Manasés queˈoc saˈ xya̱nkeb. Aˈaneb aˈin li queˈoc saˈ xya̱nkeb: laj Adnas, laj Jozabad, laj Jediaiel, laj Micael, laj Jozabad, laj Eliú ut laj Ziletai. Li junju̱nk nequeˈtaklan saˈ xbe̱neb ju̱nk mil chi soldado xcomoneb li ralal xcˈajol laj Manasés.
21. Aˈaneb li queˈtenkˈan re laj David chi pletic riqˈuineb laj e̱lkˈ li queˈoc saˈ lix naˈajeb chi elkˈac xban nak chixjunileb li cui̱nk aˈan cauheb rib ut aˈaneb li queˈqˈueheˈ chi takla̱nc saˈ xbe̱neb li soldados.
22. Rajlal cutan yo̱queb chi cha̱lc li teˈraj oque̱nc chirix laj David toj retal queˈnabaloˈ lix soldado ut kˈaxal cauheb chic rib chi pletic.
23. Aˈan aˈin xqˈuialeb li nequeˈtaklan saˈ xbe̱neb li ac cauresinbileb chi pletic. Queˈco̱eb riqˈuin laj David aran Hebrón re nak teˈxxakab chokˈ rey saˈ xnaˈaj laj Saúl joˈ quixye li Ka̱cuaˈ Dios.
24. Saˈ xya̱nkeb li ralal xcˈajol laj Judá cuanqueb cuakib mil riqˈuin cuakxakib ciento (6,800) chi cui̱nk cauresinbileb re pletic. Cuanqueb xchˈi̱chˈ re xcolbaleb rib ut cuanqueb xla̱ns.
25. Ut saˈ xya̱nkeb li ralal xcˈajol laj Simeón cuanqueb cuukub mil riqˈuin jun ciento (7,100) chi cui̱nk ac cauresinbileb re pletic.
26. Ut saˈ xya̱nkeb li ralal xcˈajol laj Leví cuanqueb ca̱hib mil riqˈuin cuakib ciento (4,600) chi cui̱nk.
27. Joˈcan ajcuiˈ laj Joiada li nataklan saˈ xbe̱neb li ralal xcˈajol laj Aarón. Cuanqueb oxib mil riqˈuin cuukub ciento (3,700) chi cui̱nk rochben.
28. Laj Sadoc, li sa̱j cui̱nk, cau rib ut cauresinbil. Cuanqueb rochben cuib xcaˈcˈa̱l (22) chi cui̱nk li nequeˈtaklan saˈ xbe̱neb li ralal xcˈajol lix yucuaˈ.
29. Saˈ xya̱nkeb li ralal xcˈajol laj Benjamín, li rechˈalal laj Saúl, oxib mil (3,000) ajcuiˈ chi cui̱nk li queˈoquen chirix laj David xban nak lix qˈuialeb toj yo̱queb chi oque̱nc chirix laj Saúl.
30. Saˈ xya̱nkeb li ralal xcˈajol laj Efraín cuanqueb junmay mil riqˈuin cuakxakib ciento (20,800) chi cui̱nk cauheb xchˈo̱l chi pletic ut naˈno̱queb ru saˈ xya̱nkeb lix comoneb.
31. Saˈ xya̱nkeb li yi jach li ralal xcˈajol laj Manasés cuanqueb cuakxaklaju mil (18,000) chi cui̱nk. Aˈaneb li queˈsiqˈueˈ ru re nak teˈxic chixxakabanquil laj David chokˈ rey.
32. Saˈ xya̱nkeb li ralal xcˈajol laj Isacar cuanqueb cuib ciento chi cui̱nk. Eb li cui̱nk aˈin cuanqueb xnaˈleb. Queˈxnau cˈaˈru us teˈxba̱nu eb laj Israel. Li cˈaˈru nequeˈxye aˈan, aˈan li nequeˈxba̱nu li rech tenamitil.
33. Saˈ xya̱nkeb li ralal xcˈajol laj Zabulón cuanqueb laje̱b roxcˈa̱l mil (50,000) chi cui̱nk ac cauresinbileb ut se̱beb chi pletic. Nak nequeˈxic chi pletic moco nequeˈxcuiba ta xchˈo̱leb. Nequeˈxnau rocsinquil qˈuila pa̱y ru chi chˈi̱chˈ re pletic.
34. Saˈ xya̱nkeb li ralal xcˈajol laj Neftalí cuanqueb jun mil chi cui̱nk li nequeˈtaklan. Ut cuanqueb rochbeneb cuuklaju xcaˈcˈa̱l mil (37,000) chi cui̱nk li cuanqueb xchˈi̱chˈ re xcolbal re xchˈo̱leb ut cuanqueb xla̱ns.
35. Saˈ xya̱nkeb li ralal xcˈajol laj Dan cuanqueb cuakxakib xcaˈcˈa̱l mil riqˈuin cuakib ciento (28,600) chi cui̱nk ac cauresinbileb chi pletic.
36. Saˈ xya̱nkeb li ralal xcˈajol laj Aser cuanqueb caˈcˈa̱l mil (40,000) chi cui̱nk ac cauresinbileb ut tzolbileb chi pletic.
37. Saˈ xya̱nkeb li cui̱nk li queˈchal jun pacˈal li nimaˈ Jordán saˈ li este cuanqueb jun ciento riqˈuin junmay mil (120,000) chi cui̱nk. Aˈaneb li ralal xcˈajol laj Rubén, eb li ralal xcˈajol laj Gad ut eb li ralal xcˈajol li yi jach li ralal xcˈajol laj Manasés. Ut qˈuila pa̱y ru li chˈi̱chˈ cuan riqˈuineb re pletic.
38. Chixjunileb li cui̱nk aˈin ac cauresinbileb chi pletic nak queˈco̱eb Hebrón chi anchaleb xchˈo̱l chixxakabanquil laj David chokˈ xreyeb chixjunileb laj Israel. Junaj lix chˈo̱leb chixjunileb laj Israel nak teˈxxakab chokˈ rey laj David.
39. Oxib cutan queˈcuan riqˈuin laj David. Yo̱queb chi cuaˈac ut yo̱queb chi ucˈac xban nak eb li rech tenamitil queˈxyi̱b xtzacae̱mkeb.
40. Eb li tenamit li cuanqueb chi nachˈ queˈxcˈam chak xtzacae̱mkeb. Joˈcan ajcuiˈ eb li ralal xcˈajol laj Isacar, eb li ralal xcˈajol laj Zabulón ut eb li ralal xcˈajol laj Neftalí. Queˈxcˈam nabal li tzacae̱mk chirixeb li bu̱r ut chirixeb li camello ut chirixeb li mu̱l. Ut cuan ajcuiˈ quelonbil xbaneb li bo̱yx. Li tzacae̱mk li queˈxcˈam chak, aˈan cˈaj, caxlan cua yi̱banbil riqˈuin higo, chaki uvas, vino ut aceite. Ut queˈxcˈam ajcuiˈ bo̱yx ut carner. Kˈaxal nabal li cˈaˈak re ru queˈxcˈam re teˈxtzaca xban nak kˈaxal sa saˈ xchˈo̱leb laj Israel.
←  1Chronicles (12/29)  →