| ← 1Chronicles (10/29) → |
| 1. | Eb laj filisteo queˈpletic riqˈuineb laj Israel. Ut laj Israel queˈe̱lelic chiruheb. Nabaleb li queˈcamsi̱c saˈ li tzu̱l re Gilboa. |
| 2. | Eb laj filisteos queˈra̱lina laj Saúl ut eb li ralal toj retal queˈxcamsiheb laj Jonatán, laj Abinadab ut laj Malquisúa, li ralaleb laj Saúl. |
| 3. | Chirix aˈan queˈpletic chi cau re xcamsinquil laj Saúl. Cau queˈpletic toj retal queˈxtau laj Saúl chi tzimaj. |
| 4. | Laj Saúl quixye re li cui̱nk li nacˈamoc re lix chˈi̱chˈ re pletic: —Chap chak la̱ chˈi̱chˈ, ut tina̱camsi. Incˈaˈ nacuaj nak eb li incˈaˈ nequeˈxnau ru li Dios tineˈxseˈe nak tineˈxcamsi, chan. Abanan li cui̱nk incˈaˈ quiraj xban nak ta̱xucuak. Joˈcan nak laj Saúl quixchap lix chˈi̱chˈ ut quixcut rib saˈ xbe̱n. |
| 5. | Nak li cui̱nk quiril nak camenak chic laj Saúl, quixchap lix chˈi̱chˈ ut quixcamsi ajcuiˈ rib aˈan. |
| 6. | Joˈcan nak quicam laj Saúl saˈ li cutan aˈan rochbeneb li oxib chi ralal joˈqueb ajcuiˈ li ralal xcˈajol. |
| 7. | Eb laj Israel li cuanqueb saˈ li ru takˈa queˈxqˈue retal nak laj Saúl ut li oxib chi ralal queˈcam. Joˈcan nak queˈe̱lelic ut queˈxcanab lix tenamiteb. Ut aˈ chic eb laj filisteos queˈoc chi cua̱nc saˈ lix tenamiteb. |
| 8. | Saˈ li cutan jun chic eb laj filisteo queˈco̱eb chixxocbal li cˈaˈru reheb li camenak. Queˈxtau laj Saúl ut eb li oxib chi ralal jiljo̱queb chi camenak saˈ li tzu̱l Gilboa. |
| 9. | Nak ac queˈrisi li rakˈ re pletic, queˈxcˈam lix jolom laj Saúl ut queˈxcˈam lix chˈi̱chˈ re pletic. Queˈxtakla resil saˈ chixjunil lix tenamiteb laj filisteos re nak teˈrabi resil nak camenak chic laj Saúl. Ut queˈxye ajcuiˈ resil saˈ rochoch lix dioseb. |
| 10. | Chirix chic aˈan queˈxqˈue lix chˈi̱chˈ laj Saúl saˈ lix templo lix dioseb ut queˈxtˈuyub lix jolom li camenak saˈ lix templo laj Dagón lix dioseb. |
| 11. | Ut chixjunileb li cuanqueb aran Jabes re Galaad queˈrabi resil li cˈaˈru queˈxba̱nu re laj Saúl eb laj filisteo. |
| 12. | Joˈcan nak queˈxchˈutub ribeb chixjunileb li cui̱nk aj Jabes li cauheb xchˈo̱l chi pletic ut queˈco̱eb. Queˈxchap li camenak Saúl joˈ eb ajcuiˈ li ralal oxib ut queˈxcˈameb toj Jabes. Aran queˈxmukeb rubel jun to̱n li cheˈ ji. Ut queˈxba̱nu x-ayu̱n chiru cuukub cutan. |
| 13. | Joˈcaˈin nak quicam laj Saúl xban nak quixtzˈekta̱na li Ka̱cuaˈ. Quixkˈet li ra̱tin li Ka̱cuaˈ ut quixpatzˈ xnaˈleb riqˈuin jun li ixk aj kˈe. |
| 14. | Incˈaˈ quixtzˈa̱ma xnaˈleb riqˈuin li Dios. Xban aˈan nak li Ka̱cuaˈ quixcamsi ut quixxakab laj David ralal laj Isaí chokˈ xreyeb laj Israel. |
| ← 1Chronicles (10/29) → |