Zephaniah (1/3)  

1. Juda lal Amon naupa Josia inlal laiin Hezekia naupa Amaria, chu naupa Gedalia, chu naupa Kusi le chu naupa Zefania kuomah LALPA thu chu a hung tlung a.
2. "Hnuoi chunga inthokin iengkim,Ka sukbohmang ding a nih"Ti hi LALPA thu suok a nih.
3. "Mihriem le sahai sukbo ka ta,Chungleng vatehai sukbo ka ta,Tuipuia ngahai sukbo ka tih.Hnuoi chunga inthoka mihriem,Ka sukbohmang ni a tlung pha chun,Mi rilohai chan ve ding chu,Hmunhnok ringot chauh ning a tih,"Ti hi LALPA thu suok a nih.
4. "Judahai chungah kut inlet ka ta,Jerusalema chenghai chunga khom.Hi hmuna Baal hnuhma la um po po,A rengin sukbohmang ka ta,An milem biek dang po po khom,Thiempuhai chopin sukbo ka tih.
5. In chung sipzawla inthoka,Van lengruol bea kun hlakhai,LALPA betua inhril si a,Molek khom be hlak sihai chu,An rengin sukbohmang ka tih.
6. LALPA zui loa nghatsantuhai,Zong lo le ngaiven bok lohai chu,An rengin sukbohmang ka tih.
7. Chunghnungtak LALPA hmaah,To tok tokin um ro khai,LALPA ni chu a hnai ta si a.LALPAN inthawina a buotsai a,A fielhai a'n hlan thienghlim tah.
8. LALPA inthawina nia chun,Hotuhai le lal nauhai bakah,Ram dang thuoma incheihai chu,An rengin hrem tawl ka tih.
9. Chu ni chun kot bul sir nuom lohai,aInpawngnekna le inhlemnaa,An pathien Tempul suksiptuhai chu,An rengin hrem tawl ka tih.
10. "Chu ni chun Nga Kotkharah,Tapin khek rong rong an ta,Veng tharah tap khek an ta,Muol chim hum hum bok a tih,"Ti hi LALPA thu suok a nih.
11. Bazar venga chenghai, tap ro,Dawrkaihai chu thi vong an ta,Tangkaruo zortuhai se vong an tih.
12. Chu pha chun khawnvar sitin,Jerusalem dap suok ka ta,'LALPAN a sie a thain,Ieng mi law naw nih' tituhai,Uoiin penga a neng la um anga,Um mei meihai chu hrem ka tih.
13. An rosumhai rokpek an ta,An inhai thiekpek an tih.In bawl an ta, hluo naw ni hai,Grep huonhai siem an ta chu,A uoiin dawn naw ni hai.
14. "LALPA ni ropui a hnai ta a,A hnai ta hle a, tlung vak a tih.Ngai ro! LALPA nia tap ri chu,Nasa takin inring a ta,Mi huoisenhai chen khek an tih.
15. Chu ni chu lungsenna ni,Beidongna ni le lungzingna ni,Buoina ni le sietna ni,Inthim ni le khuo innim ni,Sum le thim sa mup in a bawm ni,
16. Khawpui kulhai bei ding leKhaw kil kulbinghai la dinga,Tawtawrawt mut ruoi ruoi a,Ral tawn dinga an inko ni a nih.
17. Mipui nasa takin beidong an ta,Mitdel angin inmai an ta,LALPA chunga an suol em leiin.Vut angin an thisen pei an ta,An rilhai chu hmunhnok angin.
18. LALPA lungsen nia chun,An tangkaruo le rangkachakin,Intlan suok thei naw ni hai.A thikna lungsen chok chun,Ram pum la kang hmang a ta,Hnuoia chenghai po po chu,La sukbohmang rup a tih."

      Zephaniah (1/3)