←  Zechariah (9/14)  →
1. Hadrak ram lakah LALPA thu a rik,Damaska chunga khom tlung a tih.Mi tin mit le Israel hnamhai mit chu,LALPA chungah a fu thup a.
2. Damaska khawpui le inramri,Hamat chunga khom tlung a ta,Tura le Sidon chungah tlung a tih,Varin themthiem hle hai sien khom.
3. Tura chun ama ta dingin,Kul ropui tak a bawl a,Pilvut anga tangkaruo bumin,Chihrak ang elin kotthlerah,Rangkachak a sek khawm a.
4. Sienkhom a nei po po chu,Lalpan lakpek vong a ta,Tuipuia a hratna chu pei hmang a ta,Meiin a khuo lem hmang a tih.
5. Askelon chun hmuin ting a ta,Gaza chun na tiin inkon a ta,Ekron khom chuong ang bokin,A beiseina hlamzui der a ta,Gaza chun a lal chan a ta,Askelon chu rausan an tih.
6. Filistinhai suong Asdod chu, Ram dang mihan hluong an ta,Sukbohmangin um a tih.
7. Sa thisen an fakhai chu,An baua inthokin la suok ka ta,Sa thieng lo an fakhai khom chu,An ha kara inthokin pot suok ka tih.Hlaa la um sunhai po chu,Ka ta hung ni tang an ta,Judai ramah hotu ning an ta,Ekron mihai chu Jebuhai ang,An la hung ni ding a nih.
8. Runtu lakah ka in veng ka ta,Ka veng hnunga inthok chu,Neksawrtuhan ka mihai,Hung pal zut ta naw ni hai.
9. Nasa takin hlim rawh, Zion naunu!Inring takin khek rawh, Jerusalem naunu!En ta, i kuom tieng i Lal a hung,Mi fel le Sandamtu a nih;Sienkhom inngaitlawm takin,Sabengtung chungah a chuong,Sabengtung tuoi chung ngeiah.
10. Efraim tawlailirhai la hmang ka ta,Jerusalema indona sakorhai khom;Indona thalngulhai suktliek ka tih.Hnamhai kuomah inremna thu hril a ta,Tuipuia inthoka tuipui chenin,Eufretis a'nthoka hnuoi tawp chenin, A lalna chun huop vong a tih.
11. Nangma chungthua khom,Nang le ka thuthlungna thisen leiin,Tui um lona khura inthokin,I mi intanghai chu insuong ka tih.
12. Aw, beiseina hruia intulhai,In kulpuiah kir nawk ta ro.A let hniin tungding ka ti cheu ti,Voisun hin ka puong a nih.
13. Ka thalngul ka kuoi angin,Juda chu kuoi kur ka ta,Efraim chu thalah hmang ka tih.Aw Zion, Grik nauhai do dingin,I nauhai chu chok tho ka ta,Mi hrat kawlhnamah siem ka tih.
14. An chungah LALPA hung inlangin,A thal chu kawlphe ang inlep a tih.LALPA Chunghnungtak ngei chun,A tawtawrawt hung mut a ta,Sim thlipui leh inthok suok a tih.
15. Iengkim LALPA chun hum a ta,Vomvir ringot hmang khomin,Hmelma hnein tukdol an ta,Dawn an ta, uoiin inrui ang elin,An ri so veng vung a ta,Maicham thena berbu angin,Sung sipin um zing an tih.
16. Chu hun a tlung pha chun LALPA,An Pathien chun ran ruol angin,A mipuihai chu san him a ta,Lallukhuma lunghlu angin,A ramah var sing seng an tih.
17. Mawiin hmu nuom an um awm de!Buin val ruol chawm hrat a ta,Uoiin tharin nghaknu lenghai. LALPAN Juda enkol a tih
←  Zechariah (9/14)  →