←  Zechariah (8/14)  →

---

1.

Iengkim LALPA thu chu ka kuomah a hung tlung nawk a.

2.

Iengkim LALPA chun hieng hin a tih: 'Zion lakah ka thikthu nasa takin a sie a, lung sahal khopin ka thik a nih' tiin.

3.

LALPA chun hieng hin a tih: "Zion-ah kir nawk ka ta, Jerusalemah cheng ka tih. Chu pha chun Jerusalem chu Thudik Khawpui ti ni tang a ta, Iengkim LALPA tlang chu Tlang Thienghlim ti ni bok a tih."

4.

Iengkim LALPA chun hieng hin a tih: "Jerusalem kotthlera hai chun tar kuna dam nuhmei pasal, an kum tam tak leia hmol thuna leng le inthung hung um nawk tang an tih.

5.

Khawpui kotthlera hai chun tlanglakte ruol inhnelin infiem nuoi nuoi nawk ta bok an tih."

6.

Iengkim LALPA chun hieng hin a tih: "Chu huna chun hieng hlaa la um sunhai ta ding chun mak hle angin inlang a ta, sienkhom ka ta dingin a mak ve ding maw?" ti hi Iengkim LALPA thu suok chu a nih.

7.

Iengkim LALPA chun hieng hin a tih: "Sak ram le thlang rama ka mihai chu san suok ka tih.

8.

Jerusalemah thuoi kir nawk tawl ka ta, ka mihai ning an ta, kei an Pathien ning ka ta, an chungah ringumin fel ka tih" tiin.

9.

Iengkim LALPA chun hieng hin a tih: "Nangni, Iengkim LALPA tempul lungphum an phum nia zawlnei baua inthoka hieng thuhai lo hretuhai, tempul chu in bawl theina dingin in kut sukhratin um raw se.

10.

Kha hma khan mihriem le ran ta dingin inhlawna a um ngai naw a, hmelma leiin tu khomin muong takin sum an lam thei nawh, mi tin chu a tuolbawm leh ka'n dotir si a.

11.

Tu ruok hin chu hlaa la umhai hi kha hmaa ka thaw ang khan thaw ta naw ningah" ti hi Iengkim LALPA thu suok a nih.

12.

"Muong takin thlai chi thlak in ta, grep hruihai chun ra insuong an ta, hnuoiin bu le bal tharsuok a ta, vanin daidaw intlaktir a tih. Chuonghai chu hlaa la um sun mipuihai ta dingin rochanah peng ka tih.

13.

Aw Juda sungkuo le Israel sungkuohai, hnam danghai tongsie phurtu lo ni hlak inla khom san suok ka ti cheu a, malsawmna hung ni lem tang in tih. Ti naw unla, in kut sukhratin um raw se."

14.

Iengkim LALPA chun hieng hin a tih: "In thlatuhaiin an mi suklungsen leia lainatna thang loa in chunga sietna intlungtir dinga ka ti tlat ang khan,

15.

tu ruok hin chu a letlingin Jerusalem le Juda sungkuo chungah thil tha thaw ka tum tlat tah thung a nih. Chuleiin, ti naw ro.

16.

Hieng hi in thaw ding chu a nih: Mi tinin mani tuolbawm seng kuomah thudik tak hril unla, ro indik tak le inlai takin rel unla,

17.

in tuolbawmhai sietna ding phierruk naw unla, thu khela inkham ching naw ro. Hieng thil hi ka theida a nih" ti hi Iengkim LALPA thu suok a nih.

18.

Chun, Iengkim LALPA thu chu ka kuomah a hung tlung nawk a.

19.

Iengkim LALPA chun hieng hin a tih: "Thla linaa in bu nghei le thla nganaa in bu nghei le thla sarinaa in bu nghei le thla sawmnaa in bu nghei hlakhai chu Juda sungkuo ta dinga hlimna le lawmna hun, kut hlimumah inchang tang a tih. Chuleiin, thudik le inremna chu zong ro" tiin .

20.

Iengkim LALPA chun hieng hin a tih: "Hnam tam tak le khawpuia cheng mi tam tak an la hung ding a nih.

21.

Khawpui pakhata chenghai chu khawpui dangah feng an ta, 'Thaw ro, Iengkim LALPA ditsakna chu ngena dawvan kai dingin fe nghal ei tiu. Keini khom kan fe ve ding a nih' tiin infiel tuong an tih.

22.

Mi tam tak le hnam ropui tak takhai chu Iengkim LALPA zong ding le a hmaa dawvan kai dingin Jerusalemah hung an tih" tiin.

23.

Iengkim LALPA chun hieng hin a tih: "Chu huna chun hnam hrang le tong hrang hrang hmang mi sawmin Juda mi pakhat kor fuolah chelin intul tlat an ta, 'I kuomah Pathien a um ti kan hriet leiin i ruolin kan hung ve ding a nih' la ting an tih" tiin.

---

←  Zechariah (8/14)  →