←  Zechariah (7/14)  →

---

1.

Lal Daria inlala inthoka kum lina, thla kuona, Kislev thla, ni linad chun LALPA thu chu Zekaria kuomah a hung tlung a.

2.

Bethel mihai chun LALPA ditsakna ngen dingin Sarezer le Regem Melek hai chu an mihai leh an hung tir a.

3.

Iengkim LALPA tempula thiempuhai le zawlneihai kuoma chun, "Kum tam tak kan lo thaw ta hlak angin Jerusalem Tempul siet sunnain a thla nganaah bu kan la nghei zom pei ding am a ni?" tiin an hung indon a.

4.

Iengkim LALPA thu chu ka kuomah a hung tlung a:

5.

"A rama mi po po le thiempuhai kuomah hieng hin indon rawh: Kum sawmsari sung a thla ngana le thla sarinaa bu ngheia in sun lai khan, ka ta dinga bu nghei in ni chie maw?

6.

Faa in dawn chang khomin, nangni ta dinga fa le dawn in ni naw maw?

7.

Muong tak le hmuingil taka Jerusalem le a se vela khuohai le sim tieng ram le thlang tieng phai thut puollawi in hluo lai khan hieng thuhai hi zawlnei hmasahai hmangin LALPAN a lo hril dai ta cheu an naw maw?" tiin.

8.

LALPA thu chu Zekaria kuomah a hung tlung nawk a:

9.

"Hi hi LALPA hril chu a nih: 'Indik takin ro rel unla, zangaina inhmutirin, inlunginsiet tuo ro.

10.

Hmeithaihai, fahrahai, ram dang mihai le pasiehai neksawr naw ro. Mi dang ta dinga tha lo hrim hrim lungrilin ngaituo ngai naw ro" tiin.

11.

" 'Sienkhom an ngaithlak nuom naw a, lulul takin tukhnungkhur an mi'n nghat a, an na an sukset a.

12.

An lungril chu lungthir angin an sukchang a, dan thuhai le Iengkim LALPA thlarauin a zawlneihai hmanga thu a hung inpuongtirhai chu an ngaithlak nuom nawh. Chuleiin, Iengkim LALPA chu an chungah nasa takin a lungsen a nih.

13.

" 'Ka koin an mi ngaithlak naw a, chuleiin an mi ko pha ngaithla naw ning' ti hi Iengkim LALPA thu suok a nih.

14.

An hmel hriet lo hnam tin lai thawngaleivirin inlak hmangtir tawl ka ta, tu khom luta an suok naw khop hielin an ram chu sukrieu ka ta, chuong ang chun an ram inhoi tak chu rausan ramah inchangtir ka tih' tiin" a ta.

---

←  Zechariah (7/14)  →