←  Zechariah (6/14)  →
1. Ka hang en nawk a, ka hma tieng chun tlang pahni inkara sakor tawlailir pali hung suok lai hi ka hmu a, tlanghai chu dar vong a nih.
2. Tawlailir pakhatnaa sakorhai chu a sen, pahninaa hai chu a dum,
3. pathumnaa hai chu a var, palinaa hai chu a rang an na, an rengin sakor hrat chi vong an nih.
4. Mi betu vantirko kuoma chun, "Pu, hienghai hi ieng am an na?" tiin ka'n don a.
5. Vantirko chun, "Hienghai hi van thli pali, hnuoi pumpuia Lalpa hmaa ngir le chu taka inthoka fe suok hlakhai chu an nih.
6. Sakor senhai chu sak tienga fe ding an na, a dumhai chu hmar tieng, a varhai chu thlang tieng, a ranghai chu sim tieng" a ta.
7. Sakor hrathai chu an hung inper suok tek tek a, khawvel pumpui hrut suok chakin an tha a'n za zok zok a. Ama chun, "Fe unla, khawvel fang suok ro" a ta, chuong ang chun an fang suok a.
8. Chun, ama chun a mi hung ko khek a, "En ta, hmar tienga fehai khan hmar tieng rama chuh ka Thlarau an sukhadam a nih" a ta.
9. LALPA thu chu ka kuomah a hung tlung a:
10. "Babulona saltanghai thilpek, Heldai le Tobija le Jedaia hai hung chawi tangkaruo le rangkachak hai chu la khawm la, chu ni la la chun Zefania naupa Josia kuomah fepui rawh.
11. Tangkaruo le rangkachak chun lallukhum siem la, chu chu thiempu laltak, Jehozadak naupa Josua chu inkhumtir rawh.
12. Chun, a kuomah hieng hin hril rawh: Iengkim LALPA chun hieng hin a tih: 'Hi mi hi a nih a hming Kau chuh; a hmuna inthokin hung inkau dar a ta, LALPA tempul bawl a tih.
13. Ama ngei hi a nih LALPA tempul bawltu ding chu; ropui takin inthuom a ta, a lalthungphaa thungin ro rel a tih. A chang tieng chun thiempu inthung a ta, inrem takin um an tih.
14. Chun, lallukhum chu Heldai hai, Tobija hai, Jedaia hai le Zefania naupa Hen (Helem) hai kuomah LALPA tempula hriet zingna dingin peng an tih.
15. Hla taka mihai khom LALPA tempul bawla thang dingin hung an ta, chu pha chun nangni lai hin Iengkim LALPA chun a mi tir a nih ti hung hre tang in tih. LALPA in Pathien thu chu taima taka in zawm phot chun hieng thu hi la hung tlung ngei a tih' a tih tiin hril rawh" a ta.
←  Zechariah (6/14)  →