←  Zechariah (5/14)  →

---

1.

Ka hang ngha nawk a, ka hmaa chun lekhabu ziel vuong duoi duoi hi ka hmu a.

2.

Ama chun, "Iem i hmu a?" a ta, kei chun, "Lekhabu ziel vuong duoi duoi lai ka hmu a, a dung meter kuo le a khang meter li le a chenve vel a nih" tiin ka don a.

3.

Ama chun, "Hi hi a ram pum chunga tongsie thon suok mek chu a nih. A phek hma tienga inziek angin rukru taphot chu a rama inthoka hnot suok ning an ta, a phek hnung tienga inziek angin khela inkham taphot chu a rama inthoka hnot suok ni bok an tih.

4.

Tongsie chu infesuoktir ka ta, rukruhai ina le khela ka hminga inkham taphot inah lut a ta, an in sungah um zing a ta, ina lung le thinghai chu sukse vong a tih' ti hi Iengkim LALPA thu suok a nih" tiin.

5.

Mi betu vantirko khan a mi hung pan a, ka kuomah, "Hang ngha la, thil hung inlang ding chu en rawh" a ta.

6.

Kei chun, "Ieng thil am a na?" ka ta, ama chun, "Inkhina bawm fe suok tah kha a na, a ram pum ritlona chu a nih" a ta.

7.

Chu bawm sin, suona siem chu a hong a, bawm sunga chun nuhmei pakhat a thung a.

8.

Ama chun, "Hi hi Suolbur chu a nih" a ta, nuhmei chu bawma chun a nam lut nawk a, suon sin chun a sin khum a.

9.

Chun, ka hang en nawk a, nuhmei pahni ka hmu a, an thla ve vea chun thli an pai a, an thla chu kanghlai thla ang a na, bawm chu van le hnuoi inkarah an vuongpui a.

10.

Mi betu vantirko kuoma chun, "Bawm hi khaw tieng am an fepui ding a na?" tiin ka'n don a.

11.

Ama chun, "A in ding an bawl tumna Babulon ram Sinar phai tieng fepui an ta, a in ding an bawl zo pha leh chu taka chun ama hmunah sieng an tih" a ta.

---

←  Zechariah (5/14)  →