Zechariah (14/14)    

1. Ngai ta, in rallakhai nangni laia in insem hun ding LALPA ni chu a hung hnai mek a nih.
2. Jerusalem do dingin hnam po po ka ko khawm ding a nih. Khawpui chu lang an ta, inhai rok ram an ta, nuhmeihai chu suollui an tih. Khawpui mihriem zatve chu salah thuoi hmang an ta, a danghai chu khawpuia inthokin suok naw ni hai.
3. Chu pha chun LALPA chu inthok suok a ta, indo changa a bei hlak angin, chuong hnamhai chu bei a tih.
4. Chu ni chun Jerusalem sak tienga Oliv tlanga chun a ke innghat a ta, a tlang chu a laiah sak le thlang zawngin inphel a ta, a laiah ruom lien tak hung um a ta, a tlang tieve chu hmar tieng intawl a ta, a tieve chu sim tieng intawl a tih.
5. Tlang kar ruoma chun inbi hmang in ta, ruom chun Azel chen va sun a tih. Judai ram lal Uzia inlal laia lirhninga in tlan siet ang khan tlan sieng in tih. Chu zoah LALPA ka Pathien chu a mi thienghlim po po leh hung a tih.
6. Chu ni chun var um naw ni a, dei naw ni a, zil tla bok naw nih.
7. Chu ni chu ni dangdai tak, LALPA chauh hriet, sun ni lo, zan ni bok lo ning a tih. Zan tieng ruok chun var hung um a tih.
8. Chu ni chun Jerusalema inthokin hringna tui hung luong suok a ta, a zatve chu Tuipui Thiah luong lut a ta, a zatve dang chu Mediterranean tuipuiah; chuong ang chun nipui le thlasika khom ning a tih.
9. LALPA chu hnuoi pumpuiah lal ning a ta, chu ni chun LALPA pakhat chauh um a ta, a hming chauh chu hming um sun ning a tih.
10. Ram po po chu Gebaa inthoka Jerusalem sim tienga Rimon chenin Araba ang hung ning a tih. Sienkhom, Jerusalem chu chawi sangin um a ta, Benjamin kotkhar-a inthoka kotkhar pakhatna le a kila kotkhar chen le Hanalel Insang le laltak uoiin sawrna khur chenin a hmun pangngai hluong a tih.
11. Hluo sip an ta, suksiet ni ta naw ni a, Jerusalem chu him tang a tih.
12. Jerusalem dotuhai po po chunga LALPAN hripui a'n lengtir ding chu hi hi a nih: An kea an ngir zing laiin an taksa hmon thlang a ta, an mit khurah an mithai zop ral a ta, an bauah an lei hmon thlang a tih.
13. Chu ni chun chi-aina nasa takin LALPAN mihai chu inmantir a ta, pakhatin pakhat dang kutah man a ta, inbakkei an tih.
14. Juda khomin Jerusalem bei a ta, an se vela hnamhai rosum, rangkachak le tangkaruo le silfen tam tak la khawm a tih.
15. Chu hripui chu sakor hai, sabengtung lien chi hai, sanghawngsei hai, sabengtung chin chi hai le an inkulnaa ran um po pohai chunga khom inlengtir a tih.
16. Jerusalem do hlaktu, hnam hrang hrang la dam khawsuokhai chu kum tinin Laltak, Iengkim LALPA chu chawibiek ding le Bawkte Kut hmang dingin Jerusalemah hung hlak an tih.
17. Hnuoia hnam tu khom Jerusalema Laltak, Iengkim LALPA chawibiek dinga kuta hang fe naw taphot chun ruotui dong naw ni hai.
18. Aigupta mihai khom kut hmang dinga an hang fe ve naw chun ruotui dong naw ni hai. Bawkte Kuta hang fe ve lo hnamhai a hremna hripui bok chu an chungah inlengtir a tih.
19. Chu chu Aigupta hremna le Bawkte Kut hmang dinga hang fe ve lo hnamhai po po hremna chu ning a tih.
20. Chu ni chun sakor telnenga hai khom LALPA TA DINGA SER HRANG ti chuong tang a ta, LALPA ina bur le bel po po khom maicham hmaa ser thieng bur le bel angin thienghlim vong tang a tih.
21. Jerusalem le Judai rama bur le bel po po chu Iengkim LALPA ta dinga thienghlim ning a ta, inthawia fehaiin bur le belhai chu thlai suongna dingin hmang an tih. Chu ni chun Iengkim LALPA inah sumdawng tu khom um ta naw ni hai.

  Zechariah (14/14)