←  Zechariah (12/14)  →
1. Israel chungthua LALPA thu chu: LALPA, vanhai keiphartu, hnuoi nghatsan phumtu, mihriema thlarau sietu chun hieng hin a hril:
2. "Jerusalem chu a vela mi po po sukruitu no-ah siem ka ta, Judai ram chu inhuol an ta, Jerusalem khom inhuol an tih.
3. Chu nia ama bei dinga hnuoia hnamhai po po an inkhawm pha chun, Jerusalem chu hnam po po ta dinga sukchang ruol loah siem ka ta, a la son tum taphot chu anni le anni na takin inhliem an tih.
4. Chu ni chun sakor tin chu sukthlabar ka ta, a chunga chuonghai chu chi-ai an tih ti hi LALPA thu suok a nih. Juda sungkuo chungah mit inlen zing ka ta, hnam dang indona sakorhai mit chu sukdel ka tih.
5. Chu pha chun Juda sungkuo tina luhai chun lungrilin, 'Jerusalem mipuihai hratna san chu Iengkim LALPA chu an Pathien a ni lei a nih' la ting an tih.
6. "Chu pha chun Juda hotuhai chu thinghuon chunga meiphu sie ang le bupawl laia meiser chok rol ang ning an ta. an kawl le kienga umhai chu an voi le changah kang hmang an ta, Jerusalem ruok chu a hmun ngaiah him zing a tih.
7. Davida sunghai le Jerusalem ropuina chu Juda sungkuo neka a ropui lem nawna dingin, LALPA chun Judahai chengna hmun chu san suok hmasa tak a tih.
8. Chu ni chun LALPAN Jerusalema chenghai chu hum a ta, anni laia a ongrop tak khom Davida anga hrat ning a ta, Davida sungkuo chu Pathien ang, an hmaa LALPA vantirko fe ang chu hung ning an tih.
9. Chu ni chun Jerusalem hung beitu hnamhai po po chu sukse dingin inthok suok ka tih" tiin.
10. "Davida sungkuo le Jerusalema chenghai chunga chun lunginsietna le hnina thlarau buok khum ka ta, an sun hlumpa chu en an ta, miin a naupa nei sun a sun angin sun an ta, nau lutir purdo anga nain a pur chu do an tih.
11. Chu ni chun Megido phai Hadad Rimon-a an tap anga nasain Jerusalema khom nasa takin tap an tih.
12. A ramin sun a ta, Davida sungkuoa pahnam tinin an nuhmeihai leh sun an ta, Nathan sungkuohai khomin an nuhmeihai leh sun an tih.
13. Levi sungkuoa pahnam tin le an nuhmeihai le Simei sungkuoa pahnam tin le an nuhmeihaiin sun an ta,
14. pahnam dang po po le an nuhmeihaiin sun bok an tih." tiin.
←  Zechariah (12/14)  →