←  Titus (3/3)    
1. Mihai chu roreltuhai le thuneituhai thu awi ding le thil tha tinreng thaw inpei zing dingin hril non rawh.
2. Tu poi khom hril lo a, mi leh inrema an hmakhuo ngai ding le mi po po lakah inngaitlawmna indik tak inentir dingin zirtir rawh.
3. Kha hma khan eini khom invet tak, lulul tak, thuoi hmanga um, chakna le nuomchenna tinreng bawia intang ei ni a, mi thika an sietna zong hlak, theidaum tak le intheida tuo ching mi ei ni hlak.
4. Amiruokchu, ei sandamtu Pathien ngilneizie le a mi hmangaizie a hung inlang khan,
5. einin thil ei thaw that lei ni loin, a lunginsietna lei chauhin a mi sandam tah a, siem tharna tuiah mi phumin Thlarau Thienghlimin a mi'n cher thar a.
6. A mi sandamtu Isu Krista zarah ei chunga hin siemtharna thlarau chu tiktlai takin a hung buok ta teuh a,
7. chuongchun, chatuon hringna beiseitu le rohluotua mi siem dingin a lunginsietna leiin thiem a mi'n changtir tah a nih.
8. Hi thu hi a'n dik a nih. Pathien ring tahai chun thil tha thaw nuomna lungril an put pei theina dingin hieng thu hi hril uor dingin ka dit che. Chu chu thil tha tawp a ni a, tu ta ding khomin a tangkai.
9. Inselna invetthlak hai, thlatuhai tobul sui rak dam, Dan thua insel luoi luoi dam nghatsan rawh; tangkaina a nei naw a, tu khomin an sawtpui bok nawh.
10. Inthe darna suksuoktu chu voi khat zil la, a sim naw leh zil nawk la, chu hnunga ruok chu ngaisak zui nuom ta naw rawh;
11. chuong ang mi chu mi suol tak le lungril kawi tak put mi a nih ti hre rawh; ama le ama thiem naw inchangtirtu a ni si a.
12. Artema amanih le Tukik amanih i kuomah ka hung tir charin Nikapoli khuoah hung nghal tum rawh, chu taka chun thlasik sung po um ka tum a nih.
13. Ukil Zena le Appolo hai kha an inzinna lampuiah ieng khom an tlaksam nawna dingin i theitawpin lo thangpui rawh.
14. Ei mihai kha thil tha thawin inhmang hlak raw hai se, hmang loa um mei mei loin, an ni tin mamaw inphuhruk raw hai se.
15. Ka kuoma um po po hin chibai an buk cheu. Ringnaa ei ruolhai kha chibai ka buk. In renga kuomah lunginsietna um raw se.
←  Titus (3/3)