Titus (2/3)  

1. Nang ruok chun thuring indik chu inchuktir pei rawh.
2. Putarhai chu insum thei, inzaum, inthunun thei, ringna indik chel, hmangaina nei mi le mi dawthei ni dingin infui rawh.
3. Chuong ang bokin pitarhai khom an chet danah mi inzaum ni ding dam, mi hrilsiet ching lo ding dam, uoiin he mi ni lo ding dam le thil tha inchuktir ching ding damin infui rawh.
4. Pitarhai chun nupui tebophai chu an pasalhai le an nauhai hmangai dam,
5. insum thei dam, invong thienghlim dam, insung khawsaka inhmang rim dam, ngilnei dam le mani pasal thu awi dam inchuktir hai sien; chuongchun Pathien thu hi hrilsietin a um naw ding a nih.
6. Chuong ang bokin tlangvalhai khom mani inthunun dingin infui tawl rawh.
7. Thil iengkimah an enton dingin thil tha thaw sukhmu la, i zirtirnaah i ringumzie le titakzie inentir rawh.
8. Tongkam mawi, soisel bo hmang hlak la, chuongchun a khingtuhai che chun demna ding che hre nawng an ta, inzak letling lem hiel an tih.
9. Bawihai chu kong iengkimah an puhai thu hnuoiah intuklut a, an lawmzawnga um tum a, don let ve lo ding dam le
10. an thil inrupek loa kong iengkimah ring tlaka um lem ding damin inchuktir la, chuongchun mi sandamtu ei Pathien zirtirna hi a hlutzie iengkimah an suklang ding a nih.
11. Mi po po sandama an um theina dingin Pathien lunginsietna a hung inlang tah a.
12. Chu chun Pathien ngaisak nawna le khawvel tieng thil ngainatna bansan a, tu lai huna hin mani invong fel a, indik taka khawsa a, Pathien ngaisaka um dingin a mi'n chuktir a.
13. Ei beisei, Pathien le Sandamtu Isu Krista ropui taka a hung inlang ni ding chu ei nghak a nih.
14. Ama ngei chu ei ta dingin a'n pek a, bawsietna tinreng laka inthokin a mi'n tlan suok a, ama mi ni dingin a mi sukthienghlim a, thil tha thaw chakna a mi'n neitir bok a nih.
15. Hieng thuhai hi puong la, infui tawl la, thu nei takin zil rawh. Tu khomin ngainep naw raw hai se che.

  Titus (2/3)