Titus (1/3)  

1. Pathien siehlaw kei Paula hi,sakhaw mi ni dinga thutak hrietna tieng Pathien mi thlanghai ringnaa keihruoitu dinga Isu Krista tirko le
2. khel hril ngai lo Pathienin leilung insieng hmaa a lo tiem tah, chatuon hringna beiseina thu chu hriltu dinga ruot ka ni a,
3. ei Sandamtu Pathien thupeka Chanchin Tha puong darna sin a mi'n koltir angin, amain tha a ti hun takah a thu chu a hung suklang tah a nih.
4. Ringna ka'n tlangpuia ka naupa indik tak Tita, chibai ka buk che. P� Pathien le ei Sandamtu Krista Isua inthoka lunginsietna le inremna chu i kuomah um raw se.
5. Thil ei sukfel hman bak sukfel dingin Kret thlierkarah ka maksan che a, thurawn ka pek ang che khan khaw tinah an upa dinghai ruotpek rawh.
6. Upa chu dem kai lo, nuhmei pakhat nei a ni ding a na, a nauhai khom ringtu, nuomchenna tienga soisel kai lo le mi lulul lo an ni ding a nih.
7. Kohran hotu chu Pathien sin enkoltu a ni leiin, dem kai lo mi ni sien, mani thu du, lung inrom, uoiin he mi, kutthlak hmang le indik lo taka hlawkna zong mi a ni ding a ni nawh.
8. Chuong nek hmanin upa chu mi lawm thiem le tiktlai, thil tha dit mi, insum thei, mi ngil, mi thienghlim le mani inthunun thei mi ni raw se.
9. Kan thu zirtir ringum tak hi kan inchuktir ang chara nghet taka cheltu a ni bok ding a nih; chuongchun thuring indik inchuktir thei a ta, a kaltuhai khom sel dong thei bok a tih.
10. Hel hmang, nuoma inpawt mei mei le mi hlem ching an um teu kha, chuonghai chu sertanhai laia mi an ni deu tak.
11. An bau kharpek ding a nih; a sung sungin an chok buoi a, indik lo taka sum hmu inbeiseiin zirtir naw ding ding an zirtir a.
12. Kret mi ngei, anni zawlnei pakhatin, "Kret thlierkar mihai hi mi khelhlip, ramsa anga kol le thabo virkawng ruol an nih" a lo ti hi thu indik a nih.
13. Chuleiin, ringna hrisel tak an nei theina dingin na takin zil tawl la,
14. Judahai pipu thusim khukpui mei mei hlaktu le thutak hnawltuhai thu chu awi ta naw raw hai se.
15. Mi thienghlim ta ding chun iengkim hi a thienghlim a, mi porche le ringna nei nawhai ta ding ruok chun ieng khom hi a thienghlim khur a um nawh- an lungril le an sie le tha hrietna chenin a porche a nih.
16. Pathien hretuah an inngai a, sienkhom an thilthawhaiah an hnawl bok si a. Anni rawi hi mi lulul le hnamum tak an ni a, thil tha ieng khom thaw dingin hmang tlak an ni nawh.

      Titus (1/3)