←  SongOfSongs (8/8)

---

1.

Ka tapa, nene ka'n tawmpui chu ni la,Tuola ei intuok lai khom khan,Fawp chot nghal ka ti che a,Tu khomin mi dem naw nih.

2.

Ka nu pindan rilah thuoi ka che,Iengkim mi zirtirtu kuoma chun,Uoiin rimtui tul ka ti che,Ka theibufai hning ngei el chu.

3.

I kut voi tieng lukham ka ta,I kut changin mi kuong i tih.

4.

Aw Jerusalem lanuhai,Kan inhmangaina hin du tawk,Amaa a nga hma khat chun,Hawl tho lo dingin ka ngen cheu.

5.

Tu am a na a ngaizawngpa innghai a,Thlalera inthoka hung tung hi?Epul zar hnuoiah ka kei har che a,Chu taka chun i nu'n a pai tan che a,Chu taka bok chun nau ha se tuorin,A hung hring suok che a ni kha.

6.

I lunglaiah suoi ang mi nam la,I banin mi chel tlat bok rawh;Hmangaina hi thina angin a hrat a,A thikthu khom thina tluka sie a nih.Mei angin a chok puot puot a,LALPA meipui ang top a nih.

7.

Hmangaina chu tui tam taka,Bur hlum thei a ni naw a,Tuipui khomin a chim hlum thei nawh.Miin a hausakna po po sengin,Hmangaina hi inchawk tum sien,Mi nuizatbur chauh hlawng a tih.

8.

Farnu tleirawlte kan nei a,A tang khom a la'n bal naw a,Inleng a nei ve pha leh,Ieng am kan thawpek ta ding?

9.

Kul bang dam chu lo ni sien,Tangkaruo kulbing bawlpek kan ta,Kotkhar dam lo ni sienla chu,Sidar thingin tuom mawi kan tih.

10.

Ka nih annawm, kul bang chu,Ka tangin kul bang pawng a ieng;Ka hmangai singmita chu,Lung sukawitu ka ni hi.

11.

Baal Hamon-a a grep huon chu,Solomonin mi a'n santir a,A santu sengin cheng sangkhat,San man an pek ding a nih.

12.

Ka grep huon chu ka ta a na,Sangkhat chang rawh, aw Solomon,Huonpuhaiin zahni chang sien la.

13.

Nang, huona cheng hlak lanu,I rawl ngai phakhai chu an vangnei!Kei khom mi'n ngaithlaktir ve rawh.

14.

Hung inhmaw rawh, ka hmangai,Zuktuoi anga hratin hung tlan rawh,Rimtui tlanga sakhi te anga hratin.

---

←  SongOfSongs (8/8)