←  Ruth (4/4)

---

1.

Chuongchun, Boaza chu kul kotkhara chun a hang fe a, chu taka chun a thung a, a laichin bul, a chungchang thu a hril kha a hung a, Boaza chun, "E khai, unaupa, hi taka hin hung la, la hung inthung vak rawh" a ta. Chuongchun a hung a, a hung inthung a.

2.

Boaza chun a khaw upa mi sawm a hung thuoihai kuoma chun, "Hi taka hin inthung ei tiu khai" a ta, a ti ang chun an inthung a.

3.

Chun, a laichin hnai, an sungkuo ro intlantu ding kuoma chun, "Naomi kha Moab rama inthokin a hung kir nawk a, ei unaupa Elimelek ram kha zor a tum a.

4.

Chuleiin, hi taka inthunghai le upahai mithmua ngei hin ram chu inchaw rawh. I'n tlan nuom chun intlan la, i'n tlan nuom naw chun ka hrietah mi hril rawh. Nang naw chu tu khom intlantu ding awm an um naw a, kei hi i dota intlantu ding chu ka nih ti inhriettir che tulin ka hriet" a ta. Ama chun, "Intlan ka tih" a ta.

5.

Boaza chun, "Naomi-a inthoka ram i'n chawk nia inthokin pasal chan tah, Moab mi Ruthi laka mithi hming re loa a ro hluotu ding an um pei theina dingin ama chu i'n tlan sa bok ding a nih" a ta.

6.

A laichin bul chun, "Keima ta ding chun intlan thei naw ning, ka'n tlan chun keima ro hluotu ding tieng sukkhawhlo rawi ka tih. Intlantu ka nina ai chu nangin chang el rawh, kei chun intlan thei naw ning" a ta.

7.

In le lo le ro an inchawk le intlan changa neitu nina hming inthleng felna dinga tiena inthoka Israelhai thaw dan chu, a zortuin pheikhok a hlip a, a changtu kutah a pek a, chu chu an thil inchawk le inthleng an namnghet dan a nih.

8.

Chuong ang chun a laichin bul chun Boaza kuomah, "Nangman i ta dingin intlan el lem rawh" a ta, a pheikhok chu a hlip a, a pek a.

9.

Boaza chun upahai le mipui po po hmaah, "Voisun hin in rengin Elimelek thil nei po po le Kilion le Mahlon thil nei po po Naomi kuta inthoka ka'n chawk a nih ti a mi hrepuituhai in nih.

10.

Chu chauh chu ni loin, mithi chu a hming re loa rohluotu siempek ding le mithi chu a unauhai lai le a umna hmun kul kotkhara a hming a bo nawna dingin, Moab nuhmei Ruthi, Mahlon nuhmei chu ka nuhmei dingin ka'n chawk bok a, chu chu voisun hin nangni hi mi hrepuitu in nih" a ta.

11.

Chun, kul kotkhara mipui po po le upahai chun, "Hrepuitu kan nih. Rachel le Lea, Israel sungkuo indintu pahnihai ang bok khan i ina nuhmei hung lut chu LALPAN siem ve sien la, Ephrat-a hin ngirhmun neiin, Bethlehema hin hmingthang takin hung um raw se.

12.

LALPAN hi nunghak laka chi thla a la'n dinpek ding che lei hin i sungkuo chu Tamar-in Juda laka a hring Perez ang kha hung ni raw se" an ta.

13.

Chuongchun, Boaza chun Ruthi chu a thuoi a, a nuhmei a hung ni ta a, LALPAN nau a'n paitir a, nau pasal a nei a.

14.

Nuhmeihai chun Noami kuomah, "Voisun ni chena laichin hnai sansuoktu tlasam loa inumtirtu che LALPA chu inpakin um sien la, Israelhai lai hin i tupa chu a hming hung inthang raw se.

15.

Ama chu i hringna tungdingtu ding le i tar tienga chawmtu che hung ni bok raw se. I mo, nangma hmangaitu che, nau pasal pasari neka i ta dinga hlu lem chun, ama chu a hringpek ta si che a" an ta.

16.

Naomi chun naute chu a lak a, a mal chungah a pom a, a enkol a.

17.

An tuolbawm nuhmeihai chun, "Naomi'n nau pasal a nei" an ta, a hmingah Obed an sak a. Ama chu Davida pa Jessai thlatu a nih.

18.

Perez sungkuo inthla sawng dan chu: Perez-in Hezron a hring a;

19.

Hezron chun Rama a hring a; Rama chun Aminadab a hring a;

20.

Aminadab chun Nason a hring a; Nason chun Salmon a hring a;

21.

Salmon chun Boaza a hring a; Boaza chun Obed a hring a,

22.

Obed chun Jesai a hring a; Jesai chu Davida pa a nih.

---

←  Ruth (4/4)