←  Ruth (3/4)  →
1. Ni khat chu a tarpi Naomi chun Ruthi kuomah, "Ka naunu, i ta dinga tha khawsakna ding zongpek che hi ka thaw ding a ni naw am a ni?
2. Kan laibungpa Boaza, a siehlawhai laia sin i va thawna kha a um an naw maw? Ngai ta, zana hin a hrizawlah barli a zap fai ding a nih.
3. Insil fai la, rimtui innal la, i thuom tha tak hak la, hrizawla chun zu fe la, faa a dawn zo hma chun i um a nih ti inhriettir naw rawh.
4. A zal pha leh a zalna hmun chu inchik la, a ke tienga puon chu hawk la, a ke bula chun zal la, i thaw ding chu lo hril a ti che" a ta.
5. Ruthi chun, "I ti ang tak chun thawng ka tih" a ta.
6. Chuongchun, hrizawla chun a fe a, a tarpi hril ang charin iengkim a thaw a.
7. Faa a dawn zo chun Boaza chu a hlim hle a, bu vum sira chun a zal ta a. Ruthi chun damten a va pan a, a ke tienga puon chu a hawk a, a zal ve ta a.
8. Zan thangah Boaza chu thil iengin amanih a chok har a. A hang inher chun a ke bulah nuhmei a lo zal zing el a.
9. Ama chun "Tu'm i na?" a ta. Nuhmei chun, "I siehlaw Ruthi ka nih. Mi'n tlantu ding laichin bul i ni leiin i siehlaw hi i puon mi'n zawnpui ve rawh" a ta.
10. Ama chun, "Ka naunu, LALPAN mal sawm che raw se. Mi rethei amanih hausa amanih tlangval i zui naw leia a hmaa i mi suklawmna nek daiin voizana ngilneina i hung inlangtir hin a mi suklawm a nih.
11. Chuleiin, ka naunu, ti naw rawh, i hni po po chu thawpek ka ti che. Hi khuoa mi po po hin nu inzaum tak i nih ti an hriet.
12. Amiruokchu, i laichin hnai ni lang khom, keima neka laichin hnai lem intlantu ding che a um a, zinga hin a'n tlan nuom che leh a tha ning a ta, intlan a ti che a.
13. A'n tlan nuom naw che a ni ruok chun, LALPA hring zing hmingin thu ka tiem che a, keiin intlan ngei ngei ka ti che. Zing tieng chenin hi taka hin zal rawh" a ta.
14. Chuongchun, a ke bula chun zing tieng chen a zal a, sienkhom tu khomin an hriet thei hmain a tho a, "Hrizawla hin nuhmei a hung ti tu khomin hre naw raw hai se" a ta.
15. Boaza chun, "I silpuon kha hlip la, hung daw rawh" a ta, barli kilogram sawmhni ding lai a sungpek a, a'n phurtir a, khuo tieng chun a kir ta a.
16. In a tlung chun a tarpiin, "Ka naunu, iem i zu chang a?" a lo ta. Ama chun a chunga thil a lo thaw dan po po chu a hril a.
17. "Hi, kilogram sawmhni ding lai barli a mi pek a, 'I tarpi kuomah kut ruokin i kir ding a ni nawh' a mi ti a nih" a ta.
18. A tarpi chun, "Ka naunu, ieng tin am thil a hung um ding i hriet hma chun nghak ringot el rawh; voisun hin chu thil chu a sukfel hma chun chu pa chu a to mei mei teu awm si nawh" a ta.
←  Ruth (3/4)  →