←  Ruth (2/4)  →
1. Naomi chun a pasal sunghai,Elimelek thlaa mi, pa neinung tak el laichin pakhat a nei a, a hming chu Boaza a nih.
2. Chun, Moab mi Ruthi chun Naomi kuomah, "Loah feng ka ta, mi lo lunginsiettu tuhai bu lak hmai va zong ka tih" a ta. Naomi chun, " Fe ta la, ka naunu" a ta.
3. Chuongchun a fe a, Elimelek thlaa mi Boaza loa ngei chun a va fe fuk hlauh el a, bu siktuhai lak hmai chu an hnunga chun a rut khawm a.
4. Chu lai tak chun Bethlehema inthokin Boaza chu a hung tlung a, "LALPA chu in kuomah um raw se" tiin bu siktuhai chu a chibai a. Anni chun, "LALPAN mal sawm che raw se" tiin an buk let a.
5. Boaza chun sinthawhai inrawitu kuoma chun, "Hi nu hi khaw lai nunghak am a na?" a ta.
6. Ama chun, "Moab mi Naomi le hung an nih.
7. In bu lak hmai mi'n khawmtir ro. Buphal an lak khawm zona hmun hmunah hung dap pei ka tih' a ta, a fe a, deihlimah sawt naw te a chawl met ti lo chu zing tienga inthok khan tu chen hin nguk takin a thaw ngar ngar a nih" a ta.
8. Boaza chun Ruthi kuomah, "Ka naunu, ngai ta, mi dang loa chu bu hnung zongin fe naw la, hi loa inthok hin inson naw la, ka siehlaw nunghakhai hnung hi zui zing rawh.
9. An bu sik hi en zing la, nunghakhai hnunga hin sui pei la, tlangvalhai hin ieng khom law lo ding chein thu ka pek hieu an tah. I dang a char pha leh tui bela tlangvalhai tui chawi sa hi i dawn hlak ding a nih" a ta.
10. Ruthi chu a kun a, hnuoi sikin a bokkhup a, a kuomah, "Kei hi hnam dang mi ni bok si, nangin mi ngaiven nuom a, i mit tlunga i mi sie el hi ieng tizie am a na?" a ta.
11. Boaza chun, "I pasal thia inthoka i pi chunga i thilthaw po pohai le i nu le pa le i piengna ram maksana kha hmaa i mi hriet ngai lohai kuoma cheng dinga i hung dan thu po po miin an mi hril a.
12. LALPAN i thilthaw po po chu rul sien la che, a thla hnuoi i hung bel, LALPA, Israelhai Pathien chun i that man chu pe teu raw se che" a ta.
13. Ruthi chun, "Pu, i ditsak hlaw zinga um ka nuom. I siehlaw laia pakhat tluk khom hi ka ni naw lai zingin, i siehlaw hi ngilnei taka bein i sukthlamuong si a" a ta.
14. Sunbu fak huna chun Baoza'n a kuomah, "Hung la, bei hung fa la, uoiin thura hin inchie ve rawh" a ta. Bu siktuhai le an ot tlang lai chun beiper a pek a, a khop tawk a fak hnung khom chun fak seng lo a la um ta rop a.
15. Bu hnung zong dinga a tho hnung chun Boaza chun a mihai kuomah, "Buphal inkhawmtuhai laia a'n khawm ve khomin hal naw ro
16. Chun, buphal tela mihai khom pot suokin maksanpek unla, inkhawm pei sien, hal naw ro" tiin thu a pek a.
17. Chuongchun, loa bu lak hmai chu zan tieng chenin a zong a, a lak khawmhai chu a vuok a, kilogram sawm lai a tling a.
18. Bu chu in tieng a phur a, a tarpi chun a bu zong khawm chu a lo hmu a, chun suna a bei fak bang chu a phor a, a pek a.
19. A tarpi chun, "Voisun khan tuhai lo am bu hnung i zong a? A lo ngaisaktu che chu malsawmin um raw se" a ta. Ama chun a lo fena chu a hril a, "Voisuna ka fena lo neitupa hming chu Boaza a nih" a ta.
20. Naomi chun a monu kuomah, "LALPA, la dam lai le thi ta hai chunga a lunginsietna chuoi loa inlangtirtu chun ama chu mal sawm raw se" a ta. Naomi bok chun, "Chu mi chu kan sungkuo inhnaipui, kan laibung bul a nih" a ta.
21. Moab mi Ruthi chun, "A lo ni ngei chu tie! 'Ka buhai an sik zo hma khat ka sinthawtuhai lai hin thang ve zing rawh' a mi ti nghe nghe a nih" a ta.
22. Naomi chun a monu Ruthi kuomah, "Ka naunu, lo danga chu an lo tawk pal el thei che leiin, a siehlaw nunghakhai lai chun um la, i ta dingin thang a tih" a ta.
23. Chuongchun, barli le huit an sik zo chenin Boaza siehlaw nunghakhai lai chauh chun bu hnung zongin a fe hlak a, a tarpi kuoma chun a um a.
←  Ruth (2/4)  →