Ruth (1/4)  

1. Roreltuhaiin ro an rel laiin a ramah tam a tla a. Judai ram Bethlehema inthokin mi pakhat chu a nuhmei le a naupa pahnihai thuoiin Moab ramah iemani chen um dingin a fe a.
2. Pasal hming chu Elimelek a na, a nuhmei hming chu Naomi a na, a naupa pahnihai chu Mahlon le Kilion an na, Judai ram Bethlehema Efrat mi an nih. Moab rama chun an fe a, chu taka chun an um ta zing a.
3. Naomi pasal Elimelek chu a thi a, a naupa pahnihai le chauh an um ta a.
4. A naupahai chun Moab mi nuhmeiin an nei a, pakhat hming chu Orpa a na, pakhat hming chu Ruthi a nih. Chu taka chun kum sawm vel an um hman a.
5. Chun, Mahlon le Kilion khom chu an thi ve ve a, Naomi chu pasal bo le nau bo a hung ni ta a.
6. LALPAN a mihai hung kanin fak ding a pek nawk tah ti Moab rama inthoka a lo hriet chun, Naomi le a mohai chu in tienga kir nawk dingin an insiem a.
7. A mo pahnihai leh an umna chu suoksanin Judai ram panin an suok a.
8. A nakie deu chun Naomi'n a mo pahnihai kuomah, "In nuhai in tieng ve ve panin kir nawk ta ro. Ka chunga le in pasal thi tahai chunga lunginsietna in inlangtir ang bok khan LALPA khomin in chungah ngilnei takin thaw ve raw se.
9. LALPA chun hadam taka in khawsakna ding pasal dang pe cheu raw se" a ta. Chuongchun, inthena dingin an infawp ngawi ngawi a, inring takin an tap a.
10. An pahni chun, "Fe nawng kan tih, i kirna ding i chipuihai kuoma chun hung ve lem kan tih" an ta.
11. Naomi ruok chun, "Ka naunuhai, kir lem el ro. Ieng leiin am in mi zui ding a na? In pasal ding nau dang ka la pai thei ding am a ni?
12. Ka naunuhai, kir el lem ro, pasal dang nei dingin ka upa taluo tah. Ka ta dinga beiseium khom lo ni ta hrim sien, voizan hin pasal neiin nau khom lo nei ni ta lang,
13. an puitling chenin pasal nei loin in nghak el ding maw? Ni lo e, ka naunuhai, chu chu ni thei naw nih. LALPA kut ka chunga tla hi nangni chan nekin a kha lem a nih" a ta.
14. Chuongchun an tap nawk rak a. Orpa chun a tarpi chu inthena dingin a fawp a, Ruthi ruok chun a kuo tlat a.
15. Naomi chun, "Ngai ta, i mo chanpui chu a chihai kuom tieng le a pathienhai kuom tieng a kir nawk a, nang khom ama ruolin kir nawk el rawh" a ta.
16. Ruthi ruok chun, "Nangma the ding che le nang zui loa kir ding chun mi ti ta lul naw raw khai. I fena taphotah hung ka ta, i riekna taphotah riek ka ta, i chihai chu ka chihai ning an ta, i Pathien chu ka Pathien ning a tih.
17. I thinaa chun thing ka ta, chu taka chun an mi phum ve el ding a nih. Nang le kei hi thina chauh naw thil dangin a mi the ding chun, ieng anga nasa khomin LALPAN a law law mi law el raw se" a ta.
18. Ruthi chun zui a tum tlat ti Naomi'n a hriet phing leh a ti zui ta naw a.
19. Chuongchun, an pahni chun Bethlehem an tlung chenin an fe pei a. Bethlehem an tlung chun anni leiin a khawnawtin an phul a, nuhmeihai chun, "Hi hi Naomi kha a ni naw maw?" an ti sup sup a.
20. Ama chun, "Naomi mi ti ta naw ro, Mara mi ti ta lem ro, LALPA chun ka hringnun hi kha takin a siem ta si a.
21. Sung kimin ka fe suok a, kut ruokin LALPAN a mi hung thuoi kir a. LALPA chun a mi sukrinum a, Iengkimthawthei chun ka chungah vangduoina a'n tlaktir a, ieng leiin am Naomi in mi la ti zing ding?" a ta.
22. Chuong ang chun Naomi chu Moab rama inthokin a mo Ruthi, Moab mi le chun barli an sik tan laiin Bethlehemah a hung tlung tah a nih.

      Ruth (1/4)