←  Romans (9/16)  →
1. Kristaa chun thudik ka hril a nih; thukhel ka hril nawzie Thlarau Thienghlim zarin ka sie le tha hrietna khomin a hriet chieng.
2. Ka lungrilah rinumna nasa tak le lungngaina re thei der lo ka pai a.
3. Ka unauhai, taksa thila ka chipuihai ai hin keiin tongsie phurin Krista kuoma inthoka sat thlak ni lem lang ka ti hiel hlak.
4. Israel mi an ni si a, nau nina hai, ropuina hai, thuthlung hai, Dan thu hai, rongbawlna sin hai le thutiem hai po po changtu an nih.
5. Thlatuhai chu an puhai an ni a, mihriem tienga sui chun Krista chu an chipui ngei a nih; iengkim chunga um Pathien chu chatuona inpakin um raw se, Amen.
6. Pathien thu chu a thlawn elin a'n chang ka tina a ni nawh. Israel thlahai po po chu Israel mi an ni vong chuong nawh.
7. Abraham thlahai po po khom a nauhai an ni vong chuong nawh; 'Isaka hin i thlahai sui an tih' ti a ni lem.
8. Chu umzie chu, taksa tienga nauhai chu Pathien nauhai an ni vong chuong naw a, thutiem leia Abraham nauhai chu a thla indik taka ngai an ni lem, tina a nih.
9. "Tuta hun anga hin hung ka ta, Sari chun nau pasal nei a tih" tiin a tiem a ni kha.
10. Chu chauh khom chu ni loin, Rebek khomin ei thlatu Isaka inthoka nau inphir a von lai khan,
11. an pieng thlak hma, sie le tha an la hriet hmain, thilthaw lei ni loa a kotu dit ang lei lemin, pakhat lem chu thlang a nih ti a'n lang.
12. Pathien thu ruot chu namnghetna dingin Rebek kuomah, "A upa lemin a naupang lem rong bawl a tih" a ti a ni kha.
13. "Jakob chu ka hmangai a, Esau chu ka theida" ti ziek a ni bok.
14. Ieng am hril tang ei ta? Pathien chu a thu an lai nawh ei ti dim a nih?
15. Teu lo e! Ama chun, "Ka lunginsiethai po lunginsiet ka ta, za ka ngainahai po chungah za ngai ka tih" tiin Mosie kuomah a hril a nih.
16. Chuleiin, mihriem dit dan le an thaw rakna lei ni loin Pathien lunginsietnaa innghat a ni lem.
17. Pathien Lekha thuin Faraw kuomah, "Hi lei ngot hin ka tungding che a nih, nangmaa chun ka thilthawtheina ka'n entir theina ding le khawvel po poah ka hming puong dar a ni theina dingin" a ti si a
18. Chuongchun, Pathien chun a lunginsiet nuom po a lunginsiet a, a suklulul nuom po a suklulul el a nih.
19. Chuong a ni si chun Pathienin ieng dinga mi a la mawsiet rop am a na? A ditzawng tuin am a kal thei a?" in ti khom a ni thei.
20. Aw mihriem, Pathien sel ngamtu chu tu'm i na? Thilsiem chun a siemtu kuomah, "Ieng dinga hieng anga i mi siem am a na?" a ti thei am a ni?
21. Bepil tlang khata inthokin bel hlu tak le bel naran siem dingin belhemtu chun bel chungah thu a nei naw am a nih?
22. Pathien chun a lungsenna le a thilthawtheizie suklang nuom hlak sien khom, sukbohmang ela um ding a lungsenna bel dongtu dinghai chunga chun zai a daw hram hram a,
23. a lunginsietna bel, a ropuina changtu dinga a lo buotsai lawk, einihai kuomah a ropuina nasatzie chu a hung suklang tah thung a nih.
24. Chu lunginsietna belhai chu Judahai laia inthok chauh ni loin Jentelhai laia inthoka kohai khom ei nih.
25. Hosea lekhabua,"Ka mi ni ngai lohai chu, Ka mihai ting ka ta;Hmangai ngai naw nu chu,Hmangai nu ting ka tih;
26. Ka mihai in ni nawh' A tina hmun ngeia chun,'Pathien hring nauhaia Inbukin um an tih"ntia a hril ang bok khan.
27. Isai khoma Israelhai thu chu khekpuiin, "Isreal mihai chu tuifinrieta phaiphin angin tamhai sien khom, tlawmte chauh sandamin um an tih.
28. Lalpan hnuoi chunga a rorelna chu khauh tak le inrang takin a hlen ding a ni si a" a ti kha.
29. Isai bokin, "Iengkim Lalpa chun chi thlatu Mi lo hlapek naw sien chu,Sodom khuo angin um tang ei ta,Gomora khuo ang ni tang ei tih"otiin a lo hrillawk bok kha.
30. Ieng am hril tang ei ta? Thiemchang tuma bei ve nawtu Jentelhai chu ringna leia thiem inchangtir an lo ni tah.
31. Dan zawm leia thiem chang tum Israelhai ruok chun Danah thiemchangna an hmu zo ta nawh.
32. Ieng leiin am? Ringna thang loa thilthawa thiemchang an tum lei a nih. Tlukna lungah chun an insui thlu ta si a.
33. "Ngai ta, Zaiawnah lungpui ka'n zal,A'n sui taphot tlukna ding lung chu;Tu khom ama ringtu chu,Muolpho ngai hrim hrim naw nih"pti ziek ang khan.
←  Romans (9/16)  →