←  Romans (8/16)  →
1. Chuongchun, tuhin chu tisa dan hraw loa thlarau dan hraw lemtu, Krista Isua umhai ta ding chun thiemnaw inchangtirna hrim a um ta nawh.
2. Krista Isua hringna Thlarau dan chun suolna le thina dana inthok chun a mi san suok ta si a.
3. Tisa hrat nawna leia Danin a thaw thei der naw chu Pathienin a hung thaw a; suol kai mihriem taksa ang putin, suol thawina dingin a Naupa ngei chu a hung tir a, tisaa suol um chu thiemnaw a'n changtir ta a;
4. chu chu tisa dana um ta loa thlarau dan hraw tah lemtu einiah hin Danin a phut chu a hlen theina ding a nih.
5. Tisa dana umhai chun tisa tieng thilhai an dit hlak. Thlarau dana umhai ruok chun thlarau tieng thilhai an dit bok.
6. Tisa tieng thil dit chu thina a na; Thlarau tieng thil dit ruok chu hringna le thlamuongna a nih.
7. Tisa ditzawng ngaituona chun Pathien a do a, Pathien dan a zawm naw a, zawm khom a zawm thei bok nawh.
8. Chuleiin, tisa dit zawnga umhai chun Pathien an suklawm thei nawh.
9. Pathien Thlarau nangniah a cheng chun tisa mi ni ta loin Thlarau mi in ni ta lem. Tu khom Krista Thlarau nei lo chu ama mi a ni nawh.
10. Krista chu nangniah a um si chun, in taksa chu suol leia thi ni sienkhom thiem inchangtir in ni tak leiin in thlarau ruok chu a hring a nih.
11. Mithi laia inthoka Isu keithotu Thlarau kha nangniah a um chun, mithi laia inthoka Krista Isu keithotu chun nangnia um Thlarau zarah, in taksa thi theihai chu sukhring bok a tih.
12. Chuleiin unauhai, bat ei nei a, chu chu tisa nuomzawnga tisa taka khawsa ding tina ruok chu a ni nawh.
13. Tisa dit zawnga in um chun thi ngei in tih; sienkhom tisa nuom zawng in thaw hlakhai chu Thlaraua in sukhlum ruok chun hring in tih.
14. Pathien Thlarau thuoia umhai po chu Pathien nauhai an ni si a.
15. Titna bawia intang nawk dingin bawi nina thlarau pek in ni naw a; nau nina thlarau in chang lem a nih; chu thlarau zara chun, "Abba, Pa!" tiin ei insek hlak a nih.
16. Chu Thlarau ngei chun eini thlarauah Pathien nauhai ei nizie a mi'n hriettir hlak.
17. Pathien nauhai ei ni chun rohluotu, Pathien rohluotu, Krista ro hluopuituhai ei nih; Krista tuorna ei intawmpui si chun a ropuina khom intawmpui ve ngei ei tih.
18. Tuta ei tuornahai hi ei ta dinga ropuina suklanga la um ding le chun hrilkhi tlakah ka ngai nawh.
19. Pathienin a nauhai a suklang hun ding chu thilsiem po poin nghakhla takin an thlir a nih.
20. Thilsiemhai chu anni ditthlangna ni loa a Siemtu thu leia iengma lo la ni vong dinga ti an nih. Amiruokchu, beisei ding a la um:
21. thilsiem po pohai chu hmon theina bawia inthoka insuoa umin, Pathien nauhai zalenna ropuia chun an la lut ding a nih ti beiseina chu.
22. Thilsiem po pohai chu tu chen hin nauha se tuor inrum angin an inrum tawl ti ei hriet si a.
23. Chu chauh khom chu ni loin, eini Thlarau ra hmasa dongtuhai ngei khom hin nau nina ei hluo hun ding le ei taksa intlanna ni ding chu lungrila nghakhla takin ei inrum a nih.
24. Chu beiseina lei chun sandam ei ni a; nisienlakhom, hmu tah zing beisei chu beiseina a ni nawh. Hmu tah zing chu tuin am a la beisei rop ding?
25. Ei la hmu naw ei beisei chun ei nghak fan fan hlak a nih.
26. Chuong ang bokin, Thlarau chun ei hrat nawnaah a mi thangpui hlak a; tongtai dan ding ei hriet naw lai khomin Thlarau chun hril ruol loa inrumin a mi tongtaipek lem hlak a nih.
27. Lungril enfietu Pathien chun Thlarau ditzawng chu ieng am a nih ti a hriet a; Thlarau chun Pathien ditzawng ang peiin mi thienghlimhai ta dingin a mi tongtaipek hlak.
28. Pathien hmangaituhai, aman a ruot anga a kohai ta ding chun iengkimah an thatna dingin a thawpek hlak ti ei hriet;
29. A hriet lawkhai chu a Naupa ang taka um dingin a ruot lawk si a, a Naupa chu unau tam tak laia nau lutir a hung ni theina dingin.
30. Chun, a ruot lawkhai chu a ko a; a kohai chu thiem a'n changtir a; thiem a'n changtirhai chu a chawimawi bok a nih.
31. Chuong thua chun ieng am hril tang ei ta? Pathien eini tieng a thang chun tuin am mi khing ngam a ta?
32. Ama Naupa ngei khom hla loa ei renga ta dinga petu chun thil dang khom a thlawnin a mi pek sa naw dim a nih?
33. Pathien mi thlanghai chu tuin am hek ngam an ta? Thiem inchangtirtu chu Pathien a ni si a.
34. Tuin am thiem naw inchangtir a ta? Krista Isu chu ei ta dinga thi le mithi laia inthoka tho nawk chauh khom ni loin, Pathien chang tieng inthung a, eini mi hrilpuitu a ni si a.
35. Krista hmangainaa inthok chun iengin am mi the thei a ta? Rinumna dam, harsatna dam, suknomnatna dam, tamna dam, saruokna dam, titna dam, kawlhnam damin maw a mi the thei ding?
36. Nangma leiin ni tin elin,Thina ko tlangah kan ngir a;That ding beram anga ngaiKan lo ni tawl vong ta si a.m ti ziek ang khan.
37. The thei teu lo e! Chuong po poa chun a mi hmangaitu zarin hnetuhai chunga leng ei nih.
38. Thil ieng khomin, thina hai, hringna hai, vantirko hai, boruoka thuneitu hai, thil tlung zing le la tlung ding hai, thilthawtheina hai,
39. thil insang le inthuk hai le thilsiem dang hrim hrim khomin ei Lalpa Krista Isua um Pathien hmangainaa inthok chun mi the thei naw nih ti chieng takin ka hriet.
←  Romans (8/16)  →