←  Romans (6/16)  →
1. Ieng am hril tang ei ta? Lunginsietna chu a pung nawk zuolna dingin ei suol zui pei di'm a nih?
2. Teu lo e! Eini suol thisan tahai chu ieng tin am suolah la'n hnel zing ei ta?
3. Eini Krista Isua baptisma chang tahai po chu a thinaah baptis-in ei um tah ti in hriet naw am a ni?
4. Chuleiin, Pain mithi laia inthoka ropui taka Krista a keitho anga eini khom hringna thara ei leng ve theina dingin, a thinaa baptisma changin, a kuomah phumin ei um ve tah a nih.
5. A thinaah eini khom ama leh inzoma ei thi chun ama a tho nawk ang bokin ama leh inzomin eini khom keithoin um ve ngei ei tih
6. Suol bawia ei um ta nawna dingin suol put taksa hi sukhlum dingin ei mihriem hlui chu a kuomah hemdein a um tah ti ei hriet.
7. Tu khom a thi tah chu suola inthokin a zalen ta si a.
8. Krista leh ei thi ve tah chun a kuomah cheng veng ei tih ti ei ring a nih.
9. Krista chu mithi laia inthokin keithoin a um a, a thi nawk ta naw ding a nih ti ei hriet si a; thina chun a chungah thu a nei ta nawh.
10. A thina chu voi khat thil thua suol tieng konga thi songna a na, a hringna ruok chu Pathien kuoma hring songna a nih
11. Chuong ang bokin, nangni khom suol tieng pangah thi taah inngai unla, Pathien tieng ruok chu Krista Isu-a chun hringah inngai ro.
12. Chuleiin, in taksa nuom zawng thil suolhai zawm dingin in taksa thi theia chun suolnain ro rel ta naw raw se.
13. In taksa penghai khom suol hmangruo dingin suol kuomah pe phal bok naw ro; chuong nek hmanin, mithi laia inthoka hung hring nawk angin Pathien kuomah inhlan lem unla, in taksa penghai khom felna hmangruo dingin Pathien kuomah pe lem ta ro.
14. Suolin in chungah thu a nei ta naw ding a ni si a; dan hnuoia um in ni ta naw a, lunginsietna hnuoia um in ni ta lem.
15. Ieng tin am ni tang a ta? Dan thu hnuoia um ni loa lunginsietna hnuoia um ei ni lem lei hin ei la suol pei ding am a nih? Teu lo e!
16. Tu kuoma khom an thu awi dinga an bawia in lut chun an thu in awi bawi chu ning in tih. Suol bawi a ni chun thina, thu awina bawi a ni chun thiemchangna a nih ti in hriet nawm a nih?
17. Amiruokchu, suol bawi lo ni tah inla khom, Chanchin Tha zirtirna thu in dong chu lungril takzeta chela in zawm leiin,
18. suol bawia inthoka insuoin in um a, felna bawihai in hung ni tah lem a nih. Chuleiin, Pathien kuomah lawmthu um raw se.
19. In taksa hrat nawzie hrein, mihriem thuphungin ka hril a nih. Kha hma khan chu suol bawi, bawsietna tirdakum le ritlonaa hluor zuol pei kuomah in taksa penghai chu in inhlan hlak a, tu ruok hin chu felna bawi kuomah thienghlim taka khawsa ta dingin inhlan ve thung ta ro.
20. Suol bawia in um lai khan felna thu hnuoiah in um ngai nawh.
21. Tuta in inzapui tah, khang laia thil in lo thaw hlak hai khan ra tangkai ieng am an insuo a? Chuong thil po po tawpna chu thina a nih.
22. Tu ruok hin chu suola inthoka insuo in ni ta a, Pathien bawihai in hung ni ta lem a, chatuon hringna chang dinga sukthienghlim in ni tah.
23. Suol man chu thina a ni si a; Pathien thilthlawnpek ruok chu ei Lalpa Isu Krista zarah chatuon hringna a nih.
←  Romans (6/16)  →