←  Romans (5/16)  →
1. Chuleiin, ringna leia thiem ei chang tah leiin, ei Lalpa Isu Krista zarah Pathien leh inremin ei um a nih.
2. Ama zar bok chun tuta ei ngirna lunginsietna hnuoia hin ringnain ei lut a, ei la'n tawmpui ding Pathien ropuina chu beiseiin ei lawm bok a nih.
3. Chubakah, ei rinumnaah khom ei lawm pei a nih: rimsikna chun tuorselna a siem a,
4. tuorselna chun nungchang nghet a siem a, nungchang nghet chun beiseina a siem ti ei hriet si a.
5. Chu beiseina chun lunghnuolin a mi siem ngai nawh, Thlarau Thienghlim a mi pek hmangin ei lungrilah Pathien chun a hmangaina chu a hung buok ta si a.
6. Thaw thei ieng khom ei nei naw lai khan a hun takah Krista chu misuolhai ta dingin a lo thi tah a nih.
7. Mi fel ta dinga thi nuom an vang hle el thei a, mi tha ta dinga thi ngam ruok chu mi an lo um khiet el rawi mawh.
8. Pathienin a mi hmangaizie a suklang dan ruok chu, mi suol ei la ni zing laia ei ta dinga Krista a hung thi el kha a nih!
9. Chuongchun, a thisena thiem inchangtira ei um ta hnung lem hin chu, ama zar bokin Pathien lungsennaa inthokin sandam ei va hang ni chieng awm ngei de!
10. Hmelma ei ni lai hmana a Naupa thina zara Pathien leh lo inrem tah ei ni chun, inrema ei um ta hnung lem hin chu a hringna zarin sandam ni nawk zuol ngei ei tih.
11. Chu chauh khom chu ni loin, Pathien le mi'n remtir nawktu ei Lalpa Isu Krista lei chun Pathienah ei lawm bok a nih.
12. Chuleiin, mi pakhat leia khawvelah suol a lut ang khan, suol leiin thina khom a hung lut a, chuonga mi po po an lo suol tak lei chun thina khom mi po po chungah a tlung a nih.
13. Dan thu pek a ni hma khomin khawvelah suol a um tah a; amiruokchu dan a um si naw chun suol chu suola ngai a ni nawh.
14. Nisienlakhom, Adam huna inthoka Mosie hun chen khan, Adamin a bawsiet anga suol ve lohai chunga khom, thina chun thu a nei a nih. Adam chu la hung ding hlimthla chu a nih.
15. Pathien thilthlawnpek le Adam bawsietna ruok chu an inang nawh. Kha mi pakhat bawsietna lei khan mi tam tak an thi a; Pathien lunginsietna le mi pakhat, Isu Krista lunginsietna leia thilthlawnpek ruok chu mi tam tak chungah a liema vurin a um ve thung a nih
16. Chu Pathien thilthlawnpek chu mi pakhat suolna leia thil hung um leh chun an inang bok nawh: thiem naw inchangtirna rorelna chu mi pakhat bawsietna leiin a hung um a, thiem inchangtirna thilthlawnpek ruok chu bawsietna tam tak leiin a hung um a nih.
17. Chu mi pakhat bawsietna lei hmana thinain ro a rel chun, mi pakhat Isu Krista leia Pathien lunginsietna nasa tak le a thilthlawnpek thiemchangna dongtuhai chun hringna changin ropui takin ro an va hang rel nasa nawkzuol awm ngei de!
18. Chuongchun, mi pakhat bawsietna leia mi po poin thiemnaw an chang angin, mi pakhat thil indik thaw leiin mi po po thiemchangin an hring pha tah a nih.
19. Mi pakhat thu awi nawna leia mi tam tak mi suol an hung ni tah ang khan, mi pakhat thu awina leiin mi tam tak mi fel la hung ning an tih.
20. Bawsietna chu a pung zuolna dingin Dan a hung pung a. Nisienlakhom suol a pungna taphotah lunginsietna khom a pung zuol sauh hlak,
21. suol leia thinain ro a rel angin, ei Lalpa Isu Krista zara chatuon hringna ei nei theina dinga Pathien lunginsietna chun thiem inchangtirna hmanga ro a hung rel theina dingin.
←  Romans (5/16)  →