←  Romans (4/16)  →
1. Anleh, taksa tienga ei thlatu Abraham thu kha ieng tin am hril tang ei ta?
2. Abraham kha thilthaw leia thiemchang chu lo ni sien, uongpui ding a nei a nih, Pathien hmaa ruok chu ni loin.
3. Pathien lekhathuin iem a hril a? "Abraham chun Pathien a ring a, chu ringna lei chun thiemchanga ruot a nih" tiin a hril a nih.
4. Miin sin a thaw chun a hlaw chu thilpeka ngai a ni naw a, bat anga ngai a nih
5. Amiruokchu, miin misuolhai thiem inchangtirtu a ring a, a thilthaw lei ni loa thiem inchangtira a um hin a ringna leiin thiem a chang a nih ei ti hlak.
6. Thilthaw lei ni loa, Pathienin thiem a'n changtirhai hamthatzie chu Davida khomin hieng hin a hril kha :
7. "An bawsietnahai ngaidama um a,An suolhai thai boa um chuAn va hang hamtha lawm lawm de!
8. Lalpan suol nei loa a ngaihai chu, An va hang hamtha lawm lawm de!"ltiin.
9. Anleh, chu hamthatna chu sertanhai ta ding chauh a ni, an naw leh sertan nawhai ta ding khom? Abraham ringna chu a felnaa ruot a nih tiin ei hril rop hlak kha.
10. Chu chu ieng ti kongin am ruot a ni thei a? Ser a tan hmain a ni, ser a tan hnungin? A sertan hnung ni loin, a sertan hmain a ni lem.
11. A sertan hmain sertan inchikna a dong a, chu ringna lei chun Pathienin thiem a'n changtir a nih ti namnghetna dingin ser a tan chauh a ni lem. Sertan nawhai khom ringna leia Pathienin thiem a'n changtirhai ta ding chun Abraham chu thlarau tienga p� a nih.
12. Chuong ang bokin, sertanhai pa khom a na, sertan a ni lei el khom ni loin, ama ei pa Abrahamin ser a tan hmaa ringna a nei ang bok kha ringna an nei ve lei a nih.
13. Dan zawm lei ni loin, ringna leia thiem inchangtir an nina lei lemin, Pathien chun Abraham kuomah ama le a thlahaiin khawvel hi an la rochung ding thu chu a tiem a nih.
14. Dan zawm hi rohluotu nina ni sien chu, ringna chu a thlawn el ning a ta, thutiem khom chu ieng khom ni naw nih.
15. Dan chun lungsenna a cho suok a; Dan a um nawnaah chun bawsietna khom a um nawh.
16. Chuleiin, Dan zawmtuhai ta ding chauh ni lo a, Abraham thla po po, ama ring anga ringtuhai ta dinga Pathien thilthlawnpek a nizie suklang dingin Abraham kuoma a thutiem kha ringnaah a'n nghat a nih.
17. "Hnam tam tak pa-ah siem ka ti che" ti ziek ang khan, a ring Pathien, mithihai sukhring nawktu le thil um lo khom inumtirtu hmaah chun Abraham chu ei renga pa a nih.
18. "Khi ang zat khi i thlahai la ning an tih" tia hnam tam tak pa ni dinga thutiem chu beisei ding a um naw lai khomin beisei takin a ring tlat a.
19. Kum za ding hiela upa le a taksa en chun mithi ang el a ni tah ti le Sari ngei khom chu a ching a nih tihai ngaituona chun a ringna chu a sukchau ngai nawh.
20. Ringhlana chun Pathien thutiem lakah a sukhning ngai naw a, chu nek hmanin a ringnaa chun sukhrata umin, Pathien a chawimawi lem a,
21. a thutiem chu hlen dingin Pathienin thilthawtheina a nei ti a ring tlat a.
22. Chu lei chun, "a ringna chu a felnaa ruot a nih".
23. A ringna chu a felnaa ruot a nih ti chu ama ta ding chaua ziek a ni naw a,
24. mithi laia inthoka ei Lalpa Isu keithotu ringtuhai, ringna leia thiemchang, ei nihai ta ding khoma ziek a nih.
25. Isu chu ei bawsietnahai leiin sukhlumin a um a, thiem ei changna dingin keithoin a um a nih.
←  Romans (4/16)  →