←  Romans (3/16)  →
1. An leh Juda mi ni chu a tangkai bikna iem a um a? Sertan khom chu a hlutna iem a um a?
2. Kong tinrengah a hlawk hle. A hlawkna tak chu Pathien thuhai inkoltir an nina tak hi a nih.
3. An leh, thenkhatin lo ring ta nawhai sienla iem ni tang a ta? Anni ringnawna chun Pathien ringumna chu ieng khom loin a siem chuong am a nih?
4. Siem lo e! Mi tin khelhlip vong nihai sien khom Pathien ruok chu indik zing a tih:"Ka chungthu i rel indik ie,Thiemnaw ka'n changtir naw che"eti ziek ang khan.
5. Sienkhom, ei fel nawna chu Pathien felzie suklang chieng zuoltu a ni si chun ieng am hril tang ei ta? Mihriem thukhawchang taka hrilin, Pathienin a lungsenna ei chunga a'n langtir hi a sukdik nawh ei ti ding am a nih?
6. Ti lo e! Chuong chu lo ni ta sien, Pathienin iengtin am khawvel ro rel thei a ta?
7. Annawleh, ka khelhrilin Pathien indikzie a suklang zuol a, a sukropui zuol si chun, ieng dinga mi suola ngai ka la ni rop am a na?
8. Mi'n an mi hek tuma, "Thil tha a hung tlung theina dingin thil suol thawng ei tiu" tia ka hril lo hrim hrim hrila an mi'n tum ang khan ei ti ve el dim a ni? Chuong mihai chun thiem naw chang awm hrim an nih.
9. Annawleh eini Judahai hi ei tha chuong bik am a ni? Teu lo e! Judahai le Grikhai chu suol bawia um vong ei nih ti tuta hma khom khan ka hril ta cheu kha:
10. Tu khom mi fel tak hrim an um nawh,Pakhat bek khom an um nawh;
11. Tu khom a hre thiem hrim an um nawh, Tu khom Pathien zong hrim an um nawh,
12. Naw tieng an pet hmang vong a, An lo khawhlo zo tah a;Tu khom thil tha thaw hrim an um nawh,Pakhat bek khom an um nawh;f
13. An hnuk chu thlan inhong a na,An leiin hlemna thu a hril a,gAn hmurin rul tur a pai a,h
14. An bau tongsie le thu khain a sip a.i
15. Thisen insuo di'n an ngal a zang a,
16. An fena photah sietna le rinumna a tlung a,
17. Remna lampui an hriet naw a,j
18. An mit mengah Pathien tina,An nei naw hrim hrim a nih"kti ziek ang khan.
19. Dan thu chu Dan hnuoia umhai chunga hmang dinga hril a nih ti ei hriet; tu khomin suonlam an siem thei nawna ding le khawvel pumpui hi Pathien rorelna hnuoia sie a ni vong theina dingin.
20. Chuleiin, Dan zawm that leia Pathien hmaa thiem chang phak tu khom an um nawh; chu nek hmanin, Dan chu ei suol thaw mi'n hriettirtu a nih.
21. Tu ruok hin chu Dan le zawlneihai lo inhriettir tah angin, Dan hmang ngai loin Pathien felna chu suklangin a um tah a,
22. chu chu Isu Krista ei ringna leia a ringtu taphot kuoma Pathien felna suklanga um chu a nih. Tu ta ding khomin a danglam nawh.
23. Mi po poin thilsuol an thaw a, Pathien ropuina an chang thei ta si nawh.
24. Nisienlakhom, Pathien chun Isu Krista intlanna zarah a lunginsietna lei chauin mi a thlawnin thiem a'n changtir a,
25. Krista ngei chu a thisen ringtuhai ta dinga suol thupha chawina dingin a hung pek a. Hi hi Pathienin thiem a mi'n changtir dan suklangna chu a nih.
26. A dawtheina leiin tuta hmaa an thil suol thawhai chu hriet naw sak sak a thawpek a. Ama chu mi indik a na, Isu ringtu chu thiem a'n changtir ngeizie sukchieng dingin tu lai huna hin thiem a mi'n changtir dan chu a hung suklang tah a nih.
27. Chuong an leh ieng am ei uongpui ding a um? Um lo e! Ieng leiin am? Dan zawm leiin maw? Ni lo e! Ringna leiin a ni lem.
28. Dan zawm lei chauh ni loin, ringna leiin mi'n thiem a chang ti thu chu ei pom tlat lem a nih.
29. Pathien chu Judahai Pathien chauh a ni? Jentelhai Pathien khom a ni ve naw'm a nih?
30. Ni ve e! Pathien chu pakhat a na, sertanhai chu an ringna leiin thiem inchangtir a ta, sertan nawhai khom an ringna lei bokin thiem inchangtir a tih.
31. Anleh, ringna a poimaw ti lei ringotin Dan chu ieng khom ni loah ei siem el ding a ni? Teu lo e! Dan chu ei suknghet lem hman a nih.
←  Romans (3/16)  →