← Romans (2/16) → |
1. | Chuleiin aw mihriem, tu khom soisel thei bik ding i ni nawh, mi dang i soiselna ngei chun nang khom thiemnaw inchangtir a ti che, chuong ang thil chu a soiseltu ngeiin i thaw ve hlak si a. |
2. | Chuong ang thil thaw hlaktuhai chu Pathienin thiem naw a'n changtir chun a thaw indik a nih ti ei hriet. |
3. | Aw mihriem, chuong ang thil thaw hlaktuhai soiseltu, nangin chuong ang thil chu i thaw ve hlak si leiin Pathien rorelna chu pumpel in ring bik am a nih? |
4. | Annawleh, i simna dingin Pathienin thatnan a thuoi hlak che ti hre fu loin, thatnaa a hauzie dam le a entheizie le dawtheizie dam chu ngaiah i lo nei el am an ta? |
5. | I lulul le lungril ngar leiin lungsenna ni le Pathien rorelna nia dingin i chungah hremna i khawl khawm chauh lem a nih. |
6. | Pathien chun mi tin an thilthaw ang peiin a relpek ding a ni si a. |
7. | Bohmang thei lo ropuina le chawimawina zonga thil tha thaw fan fanhai chu chatuon hringna peng a tih. |
8. | Amiruokchu, mani hma chauh siel mi, thutak hnawltu, thil indik naw zawm lemtuhai chunga chun Pathienin a lungsenna le theidana chu la bun thlang a tih. |
9. | Thilsuol thaw taphothai chungah rinumna le lungngaina tlung a ta, a hmasa'n Juda mihai chungah, chu zoah Jentelhai chungah tlung a tih; |
10. | sienkhom thil tha thawtuhai ruok chu ropuina dam, chawimawina dam le lungmuongna dam pek ning an tih, a hmasa'n Judahai kuomah, chu zoah Jentelhai kuomah. |
11. | Pathienin mi ditsak bik a nei si nawh. |
12. | Dan boa suol thawtuhai chu Dan boin bohmang an ta; Dan nei zinga suol thawtuhai ruok chu Dan hmanga an chungthu rel ning a tih. |
13. | Dan hretuhai ni loin a zawma zawm lemtuhai chun Pathien hmaah thiem chang an tih. |
14. | Dan nei ve lo Jentelhaiin an piengpui lungvar hmanga danin a phut ang an thaw chun, Dan nei naw hai sienkhom Dan neiah an insiem a nih. |
15. | Danin a phuthai chu an lungrilah an ziek ti nungchangah an suklang a, chu chu an sie le tha hrietnain a hrietpui a; lungrila mani inthiem le inthiem nawna an nei dan angin, |
16. | Isu Krista hmanga mihriemhai thuruk Pathienin a ngaituo ni chun ka Chanchin Tha hril ang hin rel a tih. |
17. | Nisienlakhom, nang chu Juda mi i'n ti a, Dan i ringsan a, Pathien i uongpui a, |
18. | a ditzawng khom i hriet a, Dan i hriet leiin a sie le tha khom i hriet a; |
19. | mitdelhai keithuoitu, thima umhai entu, |
20. | mi invethai thuoi vartu, naupangtehai zirtirtu tak niin i'n ngai a; Dan thuah chun hrietna le thutak a'n phum ti i hriet chieng leiin. |
21. | Mi danghai zirtirtu inti siin ieng dinga nang le nang i'n chuktir nawm a na? Inru lo dinga mi hriltu, nangin i'n ruk hlak si maw? |
22. | Uire lo dingin mi i hril a, nang chu i uire hlak si maw? Milem theidatu ni siin milem biekna ina thilhai chu i rok hlak si maw? |
23. | Dan uongpuitu, nangin Dan i bawsiet leiin Pathien i sukhmingsiet hlak an naw maw? |
24. | "Pathien hming chu nangni leiin Jentelhai lai sukpawiin a um tah" ti ziek ang khan. |
25. | Dan zawm la chu sertan hi a tangkai takzet a nih. Dan bawsetu i ni ruok chun i sertan chu tan naw ang chie a nih. |
26. | Chuleiin, sertan lo khomin Dan thupekhai a vong tha chun sertan anga ngai a ni naw ding maw? |
27. | Sertan nawtuin Dan thu a zawm kim chun nang, dan bu le sertan dan nei sia Dan bawsetu chu thiem naw inchangtir a ti che. |
28. | A'n lang chaua Juda mi ni chu Juda mi tak tak nina a ni naw a; taksa chaua sertan chu sertan tak tak nina a ni chuong bok nawh. |
29. | Sungrila Juda mi ruok chu Juda tak tak a nih; sertan tak tak chu lungril tienga tan hi a nih, lekha thu elah ni loin, Thlarau tiengah a ni lem. Chuong ang mi chu mihriemin chawimawi nawhai sien khom Pathienin chawimawi a tih. |
← Romans (2/16) → |