←  Romans (16/16)    
1. Ei farnu Foibi, Kenkiriei kohrana rongbawltu hi inhmelhriettir cheu ka nuom a.
2. Ama hi mi thienghlimhai thaw hlak ang hrima Lalpa hminga lo lawm ding le thangpui a ngaina taphota thangpui dingin ka ngen cheu a nih. Ama hi mi tam tak thangpui hlaktu a ni a, kei ngei khom a mi thangpui a nih.
3. Prisila le Akuila, Krista Isua ka rongbawlpuihai kha chibai ka buk.
4. Ka ta dingin thi an inhuom a; kei chauh ni loin Jentel kohranhai po po khom an chungah an lawm a nih.
5. An ina kohran inkhawmhai kha chibai ka buk. Ka dit tak Epaineta, Asia biela ringtu hmasa tak kha chibai ka buk.
6. Mari, in ta dinga inrim taka thok hlak kha, chibai ka buk.
7. Andronika le Junia, ka chipui le lung ina ka'n tangpuihai kha, chibai ka buk. Anni kha tirkohai laia hmingthang tak an na, keia nek khoma Krista ring hmasatu an nih.
8. Ampliata, Lalpaa ka dit tak kha chibai ka buk.
9. Kristaa ka rongbawlpui Urbana le ka ruol dittak Staki hai kha chibai ka buk.
10. Kristaa mi tak, Apelia kha chibai ka buk. Aristobul sunghai kha chibai ka buk bok.
11. Ka chipui Herodian kha chibai ka buk. Narkisa sunghai laia mi Lalpaa umhai kha chibai ka buk.
12. Trifeni le Trifosi, Lalpa sin inrim taka thawtu nupuihai kha chibai ka buk. Dittak Persi, Lalpa ta dinga inrim taka thoktu kha chibai ka buk.
13. Lalpa rongbawlna sina mi langsar Rufa le a nu, ka nu ve tho hai kha, chibai ka buk.
14. Asunkrita hai, Flegona hai, Hermia hai, Patroba hai, Herma hai le an kuoma um unauhai le khan chibai ka buk.
15. Filologo le Juli leh, Nire le a farnu Olimpi le an kuoma mi thienghlim um po po hai chibai ka buk.
16. Fawp thienghlimin in chibai tuo unla, Krista kohranhai hin chibai kan buk bok cheu a nih.
17. Unauhai, zirtirna thu in dong tahai kal zawnga nangni laia innghirnghona le intheidana siemtuhai laka chun inveng fimkhur ding le anni chu nghatsan dingin ka ngen cheu a nih.
18. Chuong mihai chun ei Lalpa Krista rong bawl nekin mani phingpui chauh an ngaituo hlak. An dang innalna le mi inpak der an thiemna chun mi mawlhai an hlem hlak.
19. Chanchin Thaa in nghetzie mi tin hriet a na, chuleiin kei khom in chungah ka lawm a nih. Thil tha tieng var a, suol tienga in mawl ka dit a nih.
20. Remna Pathien chun Setan chu in ke hnuoiah insir detir vak a ti cheu.
21. Ka rongbawlpui Timothe le ka chipui Lukia hai, Jason hai, Sosipater hai hin chibai an buk cheu.
22. Kei Tertia, hi lekha ziektu hin Lalpa hmingin chibai ka buk cheu.
23. Ka tlungna pa, kohran inkhawmna lo dongtu Gaia hin chibai a buk cheu. Khaw sunga sum enkoltu Erasta le ei unaupa Kuarta khomin chibai an buk cheu.
24. Ei Lalpa Isu Krista lunginsietna chu in kuomah um raw se.
25. Tuhin, tiena inthoka thu ril inthup puonga um, Isu Krista thu, ka Chanchin Tha hrila suknghet theitu cheu Pathien chu chawimawi ei tiu.
26. Chu thu inthup hlak chu, ziek ngeia zawlneihai lo hril lawk angin, puong suokin a hung um tah a, tu khomin ringa an awi theina dingin, chatuon Pathien thupek angin hnam tin lai inhriettir a ni tah.
27. Ama chauh Pathien var um sun kuoma chun Isu Krista leiin chatuonin ropuina um raw se. Amen.
←  Romans (16/16)