←  Romans (15/16)  →
1. Eini a hrat lemhai hin mani lawmna zong loin a hrat naw lemhai hrat nawna chu phuhruk lem ei tiu.
2. Mani tuolbawmhai thatna ding zonga suklawmin, dom sang tum seng ei tiu.
3. Krista khomin mani lawmna a zong si nawh. "Nangma deusawtuhai cheksolna chu ka chungah a tla tah" tia ziek ang khan a tuor ta lem a ni kha.
4. Kha hmaa inthoka Pathien Lekha Thua zieka lo um ta hrim hrim hai kha inchuktir nei vong an na, tuorselna le phurna nei a, beiseina ei nei theina dinga ziek an nih.
5. Selna le phurna petu cheu Pathien chun, Krista Isu in zuinaah, thlarau hmun khat inputtir sien la cheu,
6. chuongchun, lungril hmun khat puta zai khata luongin, ei Lalpa Isu Krista Pa le Pathien chu inpak tlang thei in tih.
7. Pathien ropuina dinga Krista'n a lawm cheu ang bok khan inlawm tuo ro.
8. Ka hril cheu hi, Pathien ringumzie sukchiengna dingin, thlatuhai kuoma a thutiemhai chu hlenin, Krista chu sertan Judahai rongbawltuah a hung um a.
9. Chu chu Jentelhai khomin a lunginsietna leia Pathien an chawimawi theina ding a nih,"Hi lei hin Jentelhai laiInpak ka ti che a;I hming inpakin hla sak ka tih"a tia ziek ang khan.
10. Chun, hieng ang hin a lo ti bok:"Aw Jentelhai, Ama mihai le chun lawm ro."
11. Hieng ang khom hin a lo ti a:"Jentel po po hai,Lalpa chu inpak ro;Ama mihai po po khomin,Inpak raw hai se."b
12. Isai khomin hieng hin a lo hril a:"Jesai zungzam inchor suok a ta,Jentelhai chungah inlal a ta,Jentelhai chun amaah,Beiseina la'n nghat an tih."c
13. Thlarau Thienghlim thilthawtheina zara beiseinaa in sip liem theina dingin, beiseina hnar Pathien chun in ringna leiin lawmna le thlamuongna tinrengin vur raw se cheu.
14. Ka unauhai, nangni rawi hi thatnaa sip, kong tinrenga varna hau le inzirtir tuo thei ding in nih ti ka ring tlat a nih.
15. Amiruokchu, thil thenkhat inhriet nontir ding cheuin ka hung ziek a, Pathienin lunginsietna a mi pek zarin thil thenkhat lem chu ka ziek huoi hle a nih.
16. Jentelhai chu Thlarau Thienghlim sukthienghlima um a, Pathien lawm tlaka an inhlan theina dingin, anni laia Chanchin Tha hril hi Krista Isuaa ka thiempu sin a nih.
17. Chuleiin, Krista Isua chun hienga Pathien rong ka bawl hi ka suong hle a nih.
18. Pathien thu Jentelhai inawitir dinga Thlarau thangpuina zara thu le thilthawhai, inchikna le thilmak thaw theinahai hmanga Kristan keimaa thil a thawhai chauh naw chu ieng khom hril ka tum nawh.
19. Jerusalema inthoka Ilurikon le a se vel chen hmun tinah Krista Chanchin Tha ka hril vong tah.
20. Mi dang lungphum rem ta sa chunga ka rem nawna dingin, Krista hming an la lam ngai nawna hmun taphota Chanchin Tha puong dar hi ka thil tum a ni si a.
21. "A chanchin hrilna ngai lo mihai chun,Ama chu la hmung an ta;La hre ngai nawtuhai chun,La hung hrieng an tih"d ti ziek ang khan.
22. Chu lei chun a nih, in kuoma ka hung ding ka thul rop hlak chu.
23. Tu ruok hin chu hieng lai biela hin ka ta dingin rongbawlna hmun a um ta naw bakah nangni hung kan cheu ka'n hawkna hi kum tam a ni tah a;
24. Spain ram ka sir malamin hung sir cheu ka beisei a, nangni leh hun iemani chen ei inpawl hlim zet hnungah ka'n zin peinaa khom in mi thangpui ka beisei bok a.
25. Tu ruok hin chu mi thienghlimhai rong bawl dingin Jerusalemah ka la fe phot ding a nih.
26. Makedonia le Akaia rama mihai chun phal takin Jerusalema mi thienghlimhai laia retheihai ta dingin thawlawm an thaw a.
27. Phal taka thaw an nia chu anni lakah bat an nei ve hrim a nih, Jentelhaiin an thlarau tieng thil an intawmpui chun, khawvel tieng thila anni an somdawl ve thung chu an thaw awm hrim a nih.
28. Chu chu thaw a, anni kuomah thawlawm kan hlan fel zet hnungin Spain ram ka pan malamin hung sir ka ti cheu.
29. In kuoma ka hung pha chun Krista malsawmna famkim leh ka hung ding a nih ti ka hriet.
30. Unauhai, ei Lalpa Isu Krista le Thlarau Thienghlima in mi hmangaina chun Pathien kuomah mi tongtaipek ngat ngat dingin ka ngen cheu a nih.
31. Judai rama ring nawtuhai laka ka him theina ding dam, ka rongbawlna hi Jerusalema mi thienghlimhai ta dinga thil lawmum tak a ni theina ding dam,
32. Pathien remtia lungril hlim taka ka hung theina ding dam le ei insukhar tuo theina ding damin mi tongtaipek ro.
33. Remna Pathien chu in renga kuomah um raw se. Amen.
←  Romans (15/16)  →