←  Romans (14/16)  →
1. Ringnaa mi hrat naw chu, a ngaidan inselpui kher loin, lawm lut el ro.
2. Mi pakhatin iengkim fak thiengin a ring a, mi hrat naw ruok chun thlai chauh a fak a.
3. Iengkim fatu chun a fa ve nawtu chu hmusit naw sien, a fa nawtu chun a fatu chu soisel bok naw raw se, Pathienin ama chu a pom ve tho si leiin.
4. Mi dang siehlaw lo soiseltu chu tu am i ni leh? A ngir amanih a tluk amanih chu a pu thu annawm. Ngir a tih, Lalpa chun a'n ngirtir thei si a.
5. Mi pakhatin ni khat hi ni dang nekin a ngaihlu bik a, mi dangin ni po po inang vongin a ngai thung a. Mi tinin mani ngaidan chiengkuong tak nei ding a nih.
6. Ni pakhat inser biktu chun Lalpa chawimawina dingin a'n ser a nih; iengkim fatu chun Pathien kuoma lawmthu hrila fa a ni leiin Pathien chu a chawimawi a nih. Fak tienga insum mi khom chun Pathien kuomah lawmthu a hril tho leiin Lalpa chawimawina dinga a thaw a nih.
7. Tu khom mani ta dinga hring ei ni naw a, tu khom mani ta dinga thi ei ni bok nawh.
8. Ei hring leh Lalpa ta dinga hring ei na, ei thi khomin Lalpa ta dinga thi ei nih. Chuleiin, ei hring khomin, ei thi khomin, Lalpa ta ei nih.
9. Hi lei tak hin, a dam lai le a thi tahai Lalpa a ni theina dingin Krista chu a thi a, a hring nawk tah a nih.
10. Chuong a ni si chun, ieng dinga nangin i unaupa chu i soisel am a na? Ieng leia i unaupa chu i hmusit? Pathien rorelna lalthungpha hmaah ei la ngir vong ding a ni si a.
11. " 'Hring zing chu ka ni leiin,Mi tin ka hmaah kun an ta,Lei tinreng Pathien hmaah inpuong an tih'Lalpan a tih"z ti ziek ang khan.
12. Chuongchun, ei rengin Pathien hmaah mani chungthu seng ei la hril ding a nih.
13. Chuleiin, insoisel tuo hi bansan ei ta, mani unau tlukna le lampui daltua thang tum ta naw seng lem bok ei tiu.
14. Lalpa Isua chun thil hrim hrim ama ngota inthieng lo ieng khom a um nawh ti ka hriet chieng. Amiruokchu, thil thenkhat thieng loa ngaitu ta ding chun thil thieng lo a ni el a nih.
15. I thil fak leia i unau lungril a na chun hmangaina lampui i hraw ta nawh tina a nih. I thil fakin i unau sietna intlun naw raw se, a ta dingin Krista a thi si a.
16. Tha in tizawng chu suol anga an hril hnawm phal naw ro.
17. Pathien ram chu fak le dawn thil a ni si nawh; Thlarau Thienghlim zara thiemchangna dam, inremna dam le lawmna dam a ni lem.
18. Chuong anga Krista rongbawltu taphot chu Pathien lawmzawng mi a na, mihriem inpak khom a hlaw hlak.
19. Chuongchun, inremna le insuksawt tuona thilhai chu theitawpin hnot ei tiu.
20. I thil fakin Pathien sinthaw sukse naw raw se. Thil iengkim fak a thieng a, sienkhom mi dang tluk theina fak ruok chu a tha nawh.
21. Sa fak hai, uoiin dawn hai, i unau tluk theina thil hrim hrim chu ching lo a tha.
22. Hieng thila i ring dan chu Pathien le in inkar thuah sie rawh. Mani ring dan ang zawng thawa lungrila inthiem nawna nei lo mi chu a hamtha.
23. Sienkhom, ringhla puma fatu chun thiem naw a chang zing tah a nih, a ring dan naw anga a thaw leiin. Iengkim hi ringnaa inthoka suok a ni naw chun suol a nih.
←  Romans (14/16)  →