←  Romans (12/16)  →
1. Chuleiin unauhai, Pathien lawm tlak inthawina hring le thienghlima in taksa chu inhlan dingin Pathien lunginsietna zarin ka ngen cheu; chu chu thlaraua in chawibiek dan ding tak chu a nih.
2. Hi khawvel um dan hi zawm ta loin, lungril thar putin inthlakthleng unla; chuongchun, Pathien ditzawnga tha, lawm tlak le famkim chu hung hre fie thei tang in tih.
3. Nangni lai tu khom mani nina baka inngai sang lo a, lungril fim puta mani inbi chieng a, Pathien mi pek ei ringna phu tawk ang peia insie lem dingin Pathienin lunginsietna a mi pek zarin ka ngen cheu a nih.
4. Taksa pum khatah bung hrang tam tak ei nei a, bung hrang hrang sinthaw a dang seng a.
5. Chuong ang bokin, tam tak ni inla khom Kristaa chun taksa pum khat ei na, ei reng hin taksa bung anga inpeng tuo vong ei nih.
6. Lunginsietna a mi pek ang peiin thilpek tum tum ei nei a, chuong ang tak chun hmang ei tiu. Thuhriltu ei ni chun ei ringna le inphu tawkin hril ei tiu.
7. Rongbawltu ei ni chun thahnemngai takin bawl ei tiu. Zirtirtu ei ni chun zirtir ei tiu.
8. Infuitu ei ni chun mi chokphur ei tiu. Somdawltu ei ni chun phal takin peng ei tiu. Thuoitu ei ni chun taima takin thuoi ei tiu. Lunginsiettu chun hlim takin lunginsiet ei tiu.
9. Hmangaina chu a takin ni raw se. Suol chu theida unla, a tha chu pom tlat ro.
10. Unau an inlainat angin inlainat tuo unla, mani nekin mi dang chawimawi uor lem ro.
11. Inthlada ngai naw unla, lungril phur takin Lalpa rong chu bawl ro.
12. Beiseina chun suklawm sien la cheu, sukdudana chu sel takin tuor unla, ieng lai khomin tongtai ro.
13. Pathien mihai tlaksamna chu somdawl unla, mikhuol lawm hlak ro.
14. A suknomnatuhai cheu chu malsawm unla, tongsie inphur naw ro.
15. Lawmhai chu lawmpui unla, taphai chu tappui ro.
16. Mi leh inrem takin um diel diel unla, chapo naw unla, mi hnuoihnunghai chu inpawlpui lem hlak unla, indu ngai naw ro.
17. Suol chu suolin thungrul naw unla, mi po po ngaia mawi chu ngaituo lem ro.
18. A thei phot chun, nangni tienga bek mi po po leh inrem tum ro.
19. Dittakhai, phuba la naw unla, Pathien lungsennaa rul dingin khek lem ro; "Phuba lak chu ka chan a nih, keiman thungrul ka tih" Lalpan a tih, ti ziek a ni si a.
20. Chuong nek hmanin,"I hmelma a phing a tam chun bu pe la,A dang a char chun dawn ding pe rawh.I pek chun a luah meiling i sie khawl ning a ta,LALPAN lawmman peng a ti che."
21. Suol hnein um naw la, suol chu thatnain hne lem rawh.
←  Romans (12/16)  →