←  Romans (11/16)  →
1. Anleh, Pathienin a mihai chu a hnawl am a ni? Hnawl lo e! Kei ngei khom hi Israel mi, Abraham thla, Benjamin hnama mi ka ni si a.
2. A hriet lawk, a mihai chu Pathienin a hnawl nawh. Pathien Lekha thua chuong Elija chanchin kha in hriet naw am a ni? Ama chun Israel mihai chungthu Pathien kuomah a'n tlun a:
3. "Lalpa, i zawlneihai an sukhlum a,I maichamhai an sukchim a;Ka khat chauh ka ni ta a,Kei khom mi sukhlum an tum a nih"wtiin.
4. Pathienin ieng tin am a don a? "Baal hmaa la kun ngai lo, mi sangsari keima ta dingin ka la hla zing a nih" tiin a don a ni kha.
5. Tu khom hin chuong ang bok chun Pathienin a lunginsietna leia a thlang suok tlawma zawng an um.
6. A lunginsietna leia thlang suok an ni chun, an thilthaw lei a ni thei nawh; chuong naw chun lunginsietna chu lunginsietna ni thei naw nih.
7. Ieng tin am ni tang a ta le? Israelhaiin an zong chu an hmu naw a, Pathien thlang mi tlawmte chauin an hmu a, mi dang po po chu an chawlol zo tah a nih.
8. "Pathienin voisun chen hin inlusukna thlarau a pek a, mita hmu thei nawna le naa hriet thei nawna leh" ti ziek ang khan.
9. Lal Davida chun,An ruoi chu chang inchang sien,Inremna ruoi an kil khom,Bilah inchangpek raw se.
10. An mithai sukdelpek la,Khuo hrim hmu thei naw hai sien,An zang inkul song raw sey a lo ti bok a.
11. Anleh, an insui thluk chu an tlu song dim a ni? Tlu song lo e! An tlukna leiin Jentelhai kuomah sandamna a hung tlung a, Israelhai inhnar dingin.
12. Chuongchun, an tlukna hman khawvel sukhausakna a ni a, an tlak hnuoina hman Jentelhai hausakna a ni bok si chun, an hung thang kim pha chun hausakna ropui lem an va'n tlun nasa awm de!
13. Nangni Jentelhai kuomah thu ka hril a ni hi. Kei hi Jentelhai ta dinga tirko ka ni leiin ka rongbawl sin hi ka ngaihlu a nih;
14. ka chipuihai ka'n thiktir cheu a nih, a then bek ka sandam theina dingin.
15. Anni hnawla an umna hman khawvel hi Pathien le inremtirna a ni si chun, anni lawm lut nawkna chu thinaa inthoka hring nawkna a ni naw di'm a ni?
16. Bei tlang hmet laia a hlek sik thlak hmasa tak chu inser thienghlim a ni chun a tlang hlawm po chu inser thienghlim a ni hlak a; chuong ang bokin thing khom a zung a thienghlim chun a kauhai khom an thienghlim hlak.
17. Oliv kau zar thenkhat a tliek leiin nangni oliv puopa chu oliv kungah zom in ni a; zung hrisel chu in intawmpui ve tah a.
18. Chuleiin, zar danghai lakah uong tum in ni khoma uong thei in ni nawh, a zung chawmtu in ni naw a, a zungin a chawm lem cheu a nih.
19. Chun, nangin, "Zoma ka um theina dingin zar thenkhat chu sat thlak a ni annawm" i ti a ni thei.
20. I hril indik ie; an ring naw leiin sat thlak an ni hrim a, nang chu i ring leiin zom i nih. Chapo el naw la, ti hle lem rawh.
21. Pathienin zar takhai hman a hla si naw chun nang khom hla bik naw ni che.
22. Pathien ngilneizie le khauhzie ngaituo hlak rawh; a tluhai chungah a khauh hle a, a ngilneinaah i um zing ruok chun i chungah ngilnei zing a ta, i um zing naw chun nang khom sat thlak ni veng i tih.
23. Chun, anni khom ring loa an um zing naw chun zomin la um nawk an tih, Pathienin anni chu a zom nawk thei si a.
24. Nang oliv puopaa inthoka sat thlak hman, pienphung pangngai ang loa oliv thing thaa zom i ni si chun, oliv indik tak zar chu oliv thing indika zom chu a va olsam awm ngei de!
25. Unauhai, hi thuruk hi in hriet naw ka nuom nawh, chuong naw chun var bikah lo inngai pal hlauh rawi in tih. Jentelhai an lut kim hma chun Israel mi thenkhathai lungrilah ngongna a la tlung hri phot a ni hi.
26. Chuongchun, Israelhai chu sandamin la um vong an tih ti chu Pathien Lekha thuin a lo ziek ta kha:Ziona inthokin Sandamtu hung a ta,Jakob thlahai ritlona po po chu,La la hmang vong a tih;
27. Chu chu ka thuthlung ding chu a nih,An suolhai ka lak hmang pha chun.y
28. Chanchin Tha chungthua chun, in chan thatna dingin hmelmaah an inchang a; sienkhom Pathien thlang an ni leiin, an thlatuhai zarin, a dittakhai an ni zing tho.
29. Pathienin mi mal a sawm tah le a thlang tahai chu sut nawk thei a ni nawh.
30. Kha hma khan Pathien thu in awi naw a, tu ruok hin chu annin an awi naw leiin a lunginsietna in dong tah a.
31. Chuong ang bokin, tu hin nangnin lunginsietna in dong leiin anni khoma lunginsietna an dong ve theina dingin an awi hri naw a ni hi.
32. Pathien chun mi po po chungah a lunginsietna a'n langtir theina dingin awi nawnaah a khum khawm tawl vong a nih.
33. Pathien hausakzie, varzie, hrietzie,Aw a va'n thuk ngei de!A rorel dan hriet phak ruol lo,A lampuihai khom sui suok ruol lo,A lo va ni ngei de aw!
34. Tu am Lalpa lungril hre a,A remruotpektua thang ta hlak?
35. Pathien rul nawk beisei a,A kuoma thil pe tu'm an um hlak a?
36. Thil po po hi amaa inthoka um,Ama lei le ama ta dinga um,An lo ni vong tlat si a;A kuoma chun chatuonin,Ropuina um raw se, Amen.
←  Romans (11/16)  →