Romans (1/16)  →
1. Kei Paula, Isu Krista siehlaw,tirko ni dinga ko, Pathien Chanchin Tha hriltu dinga ser hran bik chun:
2. Chu Chanchin Tha chu, kha hmaa inthok khan Pathienin zawlneihai hmangin a Lekha Thienghlimah a lo tiem tah a;
3. a Naupa, ei Lalpa Isu Krista chu, taksa tiengah Davida thlaa inthoka pieng,
4. thienghlimna thlarau tienga ruok chu thinaa inthoka thilthawtheinaa keithoa Pathien Naupa a nizie puonga um chu a nih;
5. ama zar le a hming leiin hnam tina mihai chu ringa inawitir dingin Pathien lunginsietna le tirko nina kan chang a,
6. nangni khom chuong anga a mihai ni dinga Isu Krista kohai chu in nih.
7. Pathienin a hmangai le ama mi thienghlim ni dinga a ko, Rom khuoa mihai chibai ka buk cheu. Pathien ei Pa le Lal Krista Isu kuoma inthoka lunginsietna le inremna chu in kuomah um raw se.
8. A hmasatakin, in ringzie thu khawvel po poah hril dara a um leiin in renga ta dingin Isu Krista hmingin ka Pathien kuomah lawmthu ka hril hmasa phot a nih.
9. Ka tongtainaah ka hriet zing hlak cheu ti chu theitawpa a Naupa Chanchin Tha rong ka bawl, ka Pathien chu mi hrepuitu a nih.
10. Pathienin rem a ti chun tuta tum bek hin chu ka hung kan theina ding cheuin Ama ka hni zing a.
11. In hrat zuol theina dinga Thlarau tieng thilpek iemani bek hung hawnpek cheu ka'n hawk hle a nih,
12. ringna tienga kei le nangni inchawm tuoa ei insukhrat tuo theina dingin.
13. Unauhai, Jentel danghai laia ra ka sik hlak ang boka nangni lai khom ra sik ding ka hmu ve beiseiin voi tam tak in kuomah hung ka tum taa chu remchang nawnain tu chen hin a mi la dang zing leiin ka la hung thei hri naw a nih ti in hriet ka nuom.
14. Grik mihai, awze mihaia le mi var le mi mawlhai laka khom bat ka nei a;
15. chu lei tak chun a nih nangni Rom mihai kuoma khom Chanchin Tha hril ka'n hawk em em chu nih.
16. ChanchinTha chu ka'n zapui si nawh, a ringtu taphothai sandamna dinga Pathien thilthawtheina a ni si a. A hmasain Judahai ta ding a ni phot a, a dotah Jentelhai ta ding a hung ni nawk a.
17. Chu taka chun Pathien felna chu ringnaa inthoka ringnaah suklangin a um pei a, "Ringna leia mi fel chu hring a tih" ti ziek ang khan.b
18. Pathien ngaisaknawtuhai le mi rilohai, ritlona leia thutak dodaltuhai chunga chun Pathien lungsenna chu vana inthokin a hung inlang a.
19. Pathien chanchin an hriet theina dingin Pathien ngei chun tlang takin an kuomah a'n langtir a.
20. A nina, mita hmu thei lo, a chatuon thilthawtheina le a Pathienzie chu leilung siem tira inthokin a thilsiemah chieng taka hmu le hriet theiin a'n langtir leiin mi tu khomin suonlam ding hrim an nei nawh.
21. Pathien chu an hriet a, Pathien ang ruok chun an chawimawi naw a, lawmthu khom an hril bok nawh; teplo mei mei an ngaituo lem leiin an lungril mumal naw tak chu a hung inthim zo tah a nih.
22. Vara inngai si, mi invet an hung ni zo tah.
23. Thi thei lo Pathien ropui chu thi thei mihriem dam, vate dam, sapheimanlic dam le bokvaka lawn thilhring dam lim ang chauin an inchangtir si.
24. Chuleiin an lungril chak zawng thil porche thaw ding le an taksa chu muolpho taka chet phalin Pathienin a nghatsan tah a nih.
25. Pathien thu nekin khel an thlang lem a, Siemtu chawibiek nekin a thilsiemhai chu bein an rong an bawl ta lem si a. Siemtu chu chatuona inpak tlak a nih. Amen
26. Chuong lei chun an tisa chak zawng tirdakum tak chu thaw dingin Pathienin a nghatsan tah a nih. An nuhmeihai chen khom nuhmei le pasal indit dan phung pangngai khelah nun letling an hraw a.
27. Chuong ang bokin, pasalhai khom an nuhmeihai le khawsak dan pangngai bansanin, anni le anni inchakin an inhnar tuo a, pasal le pasal khom mawi naw takin an khawsa a, an suol ra chu an taksa ngei chun a tuor tah a nih.
28. Chu bakah, Pathien tieng hrietna indik chu an thlathlam tak leiin ngaituona hmang tlak lo put ding le mawi naw taka khawsa dingin Pathien chun a pek suok tah a nih.
29. Chuongchun, ritlona tinreng thawin, suolna dam, inhnarna dam, intheidana dam, thikna dam, tuolthatna dam, inerna dam, inhlemna dam le inhrilsietna damin an hung sip a.
30. An indem a, Pathien an theida ad, an intivei a, an chapo a, an uongthuong a, thil suol thar ching suok an insukhmu a, nu le pa poisak lo an ching a,
31. an intlaw a, an depde a, lunginsietna an piengpui naw a, an tawrot bok a nih.
32. Chuong ang thaw ching mihai chu Pathien ruot anga thi tlak an nih ti hre zing siin anni thaw khom dittawk loin mi dang a thawtuhai chu an la ngaisang letling nawk nghal a!
      Romans (1/16)  →