Revelation (6/22)  

1. Beramtein inchikna suoi pasari laia pakhat a hong lai chu ka hmu a; thilhring pali laia pakhat chun vaninrum anga inringin, "Hung suok rawh" a ti ka hriet a.
2. Ka hang en a, ka hmaa chun sakor var ka hmu a, a chunga chuong chun thal ngul a chawi a, lallukhum an pek a, hnetu anga hne pei dingin a suok tah a.
3. Inchikna suoi pahnina chu a hang hong a, thilhring pahnihna chun, "Hung rawh" a ti ka hriet a.
4. Ka hang en a, sakor sen lar, a hung suok a. Hnuoiah inphek samna a tlung theina dingin sakora chuong kuoma chun hnuoia inthoka inremna lak hmang theina thu pek a na, kawlhnam lien tak pek a ni bok a.
5. Inchikna suoi pathumna chu a hang hong a, thilhring pathumna chun, "Hung rawh" a ti ka hriet a. Chuongchun, ka hang en a, ka hmaa chun sakor dum ka hmu a. A chunga chuong chun phahla a chawi a.
6. Thilhring palihai laia inthoka hung suok ni awm tak rawl ka hriet a, "Ni khat hlawin huit ni khat tla, ni khat hlawin barli ni thum tla; uoiin le sahriek ruok chu tawkpoi naw" a ti ka hriet a.
7. Beramtein inchikna suoi palina a hang hong chun, thilhring palinain, "Hung rawh" a ti ka hriet a.
8. Ka hang en a, sakor dang tak el ka hmu a, a chunga chuong hming chu Thina a na, Mithi khuoin inhnai takin a hung zui a. Kawlhnam dam, tam dam, hri dam, ram sakol dam hmanga sukhlum dingin hnuoi hmun lia hmun khat chungah thuneina pek an ni a.
9. Inchikna pangana chu a hang hong a, Pathien thu lei le an thu hril leia that, mi thienghlimhai thlarau chu, maicham hnuoiah ka hmu a.
10. Anni chun rawl inring takin "Aw, Lalpa ropui, mi thienghlim le mi indik tak, iengtik am hnuoi mihai chunga hin ro relin kan thisen phuba chu mi lapek i ta?" tiin an khek a.
11. Anni chu korfuol var a pek seng a, an siehlaw chanpuihai le an unauhai chu anni ang boka that kim an ni hma khat chu lo la nghak hri dinga hril an ni a.
12. Inchikna suoi parukna a hong lai chu ka en zing a. Lir nasa takin a hung inhning a. Nisa chu kel hmula siem saiip dum ang elin a hung inthim a, thla chu thisen angin a hung sen bok a.
13. Thlipuiin theichang sel a nuoi til ang elin arasihai chu hnuoiah an tla chum chum a.
14. Van chu lekhabu anga ziel hmangin a um a, tlang le thlierkar po po khom an umna hmuna inthoka son hmang an ni tah vong a.
15. Chuongchun, hnuoia lal hai, roreltu hai, sipai lal hai, mi hausa hai, mi ropui hai, suok hai le suok naw hai khom puk le tlanga lungpuihai chu phenin an inbi a.
16. Tlang le lungpui hai kuoma chun, "Mi del ro, lalthungphaa thung mit hmua le Beramte lungsennaa inthok chun mi del khum ro.
17. An lungsenna ni r´┐Żpthlak tak chu a hung tlung ta si a, tuin am tuor zo an ta?" an ta.

  Revelation (6/22)