←  Revelation (4/22)  →

---

1.

Chuong thil hnunga chun ka hang en a, ngai ta, vana kotkhar inhong ka hmu a. Tawtawrawt ri ang mi betu rawl ka hriet hmasak khan, "Hi taka hin hung rawh, tuta hnunga thil tlung dinghai chu inentir ka ti che" a ta.

2.

Thlarauin ka um ta nghal a. Ngai ta, vana chun lalthungpha a um a, chu taka chun mi pakhat a thung a.

3.

A hmel chu jaspi le karnelian lung ang elin a'n lang a. Lalthungpha vela chun lunghlu rong hring nghiel ang sumrisang a'n zam chiei a.

4.

Lalthungpha huol vela chun lalthungpha dang sawmhni pali a um a, chu taka chun upa sawmhni pali an inthung a, thuom var an hak a, rangkachak lallukhum an khum seng bok a.

5.

Lalthungphaa inthok chun kawl a hung inlep a, vaninrum ri dur dur a hung suok a. Lalthungpha hmaa chun meiser pasari a chok puot puot a, chuonghai chu Pathien thlarau pasarihai chu an nih.

6.

Lalthungpha hmaa chun darthlalang ang el tuifinriet, krustal lung anga fim a um a, a laia lalthungpha sir tuoka chun hnung tieng le hma tieng mita sip thilhring pali an um a.

7.

Thilhring pakhatna chu sakeibaknei ang a na, thilhring pahnina chu bawngchal ang a na, thilhring pathumna chun mihriem hmel a put a, thilhring palina chu mupui vuong lai ang a nih.

8.

Thilhring palihai chun thla paruk an nei seng a, an thla puo le sung tieng chu mitin a sip a. Sun le zan chawl loa chawibiekin, "Lalpa, Iengkim Pathien,Um tah, um zing le hung um ding chu,A thienghlim, a thienghlim, a thienghlim"tiin an khek a.

9.

Thilhring palihai chun lalthungphaa thung, chatuona hring zing chu chawimawi le inpaka lawmthu an hril po leh,

10.

lalthungphaa inthung hmaa chun upa sawmhni palihai chu an bokkhup a, chatuona hring zing chu an chawibiek hlak a.

11.

Lalthungpha hmaa chun an lallukhum chu siein,"Nang kan Lalpa le kan Pathien,Ropuina hai, chawimawina hai,Thilthawtheina hai dong tlak i nih;Nangin iengkim i siem a,I thua siem le um vong an ni si a"tiin an rem a.

---

←  Revelation (4/22)  →