← Revelation (3/22) → |
1. | "Sardis kohran vantirko kuoma khom hieng hin ziek rawh: Pathien Thlarau pasari le arasi pasari neitu chun hieng hin a tih: I thilthawhai ka hriet; dam vur anga inlang ni si, i thi tlat bok si; |
2. | insukhar la, i thil la nei sun, thi vang vang hai kha sukhring nawk rawh. I thilthawhai ka Pathien mit tlung zo hrim ka hmu nawh. |
3. | An zirtir che le i thu donghai kha hre zingin zawm la, i suol sim rawh. I har naw chun rukru angin hung ka ta, ka hung hun hre naw pal i tih. |
4. | "Sardis khuoa mi tlawmte ruok chu an silfenhai sukporche lo an um a, chuonghai chun an phu ang hrimin, thuom var hakin ka kuomah leng veng an tih. |
5. | Anni ang boka hnetu chun thuom var hak a ta, hringna bua inthokin a hming thai bo ngai naw ning. Ka Pa le vantirkohai hmaah ama chu tan ka tih. |
6. | Thlarauin kohranhai kuoma thu a hril hi hrietna dinga na nei chun ngaithla ngun raw se. |
7. | "Filadelfia kohran vantirko kuomah hieng hin ziek rawh: Mi Thienghlim, Mi Indik, Davida chabi neitu, a hong tah chu tu khomin khar thei lo, a khar tah chu tu khomin hong thei lo chun, hieng hin a tih: |
8. | I thilthawhai ka hriet. En ta, tu khom khar thei lo kotkhar hong sa i hmaah ka'n nghat hi. Hratna tlawmte chauh i nei ti ka hriet a, sienkhom ka thu i vong tlat a, ka hming i'n phat ngai nawh. |
9. | Setan sunagoga mi khelhlip ruol, Juda ni si loa Judaa insalhai chu hung thuoiin i ke bulah inkuntir ka ta, nang hi ka hmangai chu i nih ti hre tang an tih. |
10. | Sel taka tuor dinga thu ka pek che chu i vong leiin, hnuoia cheng po po fiena dinga khawvel pumpuia hremna a hung tlung hunah kei khomin humhim ka ti che. |
11. | "Ka hung vak ding a nih. Lallukhum i chang ding chu tu khomin an inchupek nawna ding chein i thil nei sa kha vong tlat rawh. |
12. | A hnetu taphot chu ka Pathien tempul banah phun ka ta, chu taka inthok chun son ni ta ngai naw ni hai. Pa Pathien hming anniah chuong a ta, Pathien khawpui Jerusalem thar, ka Pathien kuoma inthoka hung tum hming le ka hming thar chu anniah ziek bok ka tih. |
13. | Thlarauin kohranhai kuoma thu a hril hi hrietna dinga na nei chun ngaithla ngun raw se. |
14. | "Laodikei kohran vantirko kuoma chun hieng hin ziek rawh: Amen, Thuhretu Ringum le Mi Indik, Pathien thilsiem po po bul chun hieng hin a tih: |
15. | I thilthawhai ka hriet, i dei naw a, i lum bok nawh; i dei amanih i lum amanih ka dit a nih. |
16. | Dei si lo, lum si loa i lum puot chauh leiin ka baua inthokin peisak ka ti che. |
17. | Ka hausa, iengkim ka hau, tlaksam ka nei nawh' i ti vei a; sienkhom mi rimsi, lungsietum, pasie, mitdel le saruok el i nih ti i hriet si nawh. |
18. | Chuongchun, i hung hausak theina dingin, meia rangkachak raw thieng hnung chu ka kuoma inthoka inchaw dingin thurawn ka pek che. I saruokna inzapuium tak inkhumna dingin hak ding zakaw var le i mita i hmu theina dingin mitna damdawi inchaw rawh. |
19. | Ka hmangai chu zilin ka thunun hlak. Chuleiin, ka thu ngai la, sim rawh. |
20. | Ngai ta, kotkhar bula ngirin ka kik hi; tu khom ka rawl hrea kot mi hongpektu kuoma chun lutin a kuomah zanbu kil ka ta, ama khomin ka kuomah kil bok a tih. |
21. | A hnetu taphot chu ka lalthungphaah inthungtir veng ka tih, kei khomin ka hne a, lalthungphaa ka P� bula ka'n thung ve ang hin. |
22. | Thlarauin kohranhai kuoma thu a hril hi hrietna dinga na nei chun ngaithla ngun raw se." tiin. |
← Revelation (3/22) → |