←  Revelation (21/22)  →
1. Chun, van thar le hnuoi thar ka hmu a, van hmasa le hnuoi hmasa chu an bohmang tah a, tuifinriet khom a um ta nawh.
2. Pasal nei ding mo, mawi taka inchei diema inpei tah angin, khaw thienghlim, Jerusalem thar chu, vana Pathien kuoma inthoka hung tum lai chu ka hmu a.
3. Lalthungphaa inthokin rawl inring tak ka hriet a, "Ngai ta, Pathien chengna chu,Mihriem lai a hung um tah;Ama chu anni leh cheng a ta,Anni chu a mihai ning an ta,Pathien ngei chun umpui a ta,An Pathien ni bok a tih.
4. An mitthli po po hru hul a ta,Thina hrim um ta naw ni a,Lu sun hai, tap hai, natna haium nawk ta ngai bok naw nih;Thil hluihai chu an liem ta si a"tiin a hung hril a.
5. Lalthungphaa thung chun, "Ngai ta, iengkim ka siem thar ie" a ta. "Ziek rawh, hieng ka thuhai hi a ringumin a'n dik a nih" a ti nawk a.
6. Chun, ka kuoma bok, "A tlung kim tah, kei Alfa le Omega, a bul le a tawp chu ka nih. Dangchar taphot kuoma chun dawn ding hringna tuikhura inthokin a thlawnin peng ka tih.
7. Hnetu taphot chun hieng hi rochung a ta, a Pathien ning ka ta, ama khom ka nau ning a tih.
8. Mi dawikawlok dam, ring nawtu dam, tirdakum dam, tuolthattu dam, inngai ching dam, dawithiem dam, milem be dam le khelhlip po po chan ding chu kata chok meidil a nih. Hi hi thi hnina chu a nih" a ta.
9. Chun, vantirko pasarihai laia pakhat, hremna pasarihai laia a nuhnung taka sung sip, berbu pasarina chawitu chu ka kuomah a hung a. Ama chun, "Hung ta, Beramte nuhmei, a mo chu inentir ka ti che" a ta.
10. Thlarauin tlang lien tak le insang takah a mi thuoi a, Jerusalem, khawpui thienghlim, Pathien kuoma inthoka hung tum chu a mi'n entir a.
11. Pathien ropuina chun a sun eng phut a, a eng mawi dan chu lung man tam jaspar ang le krustal lung anga fim a nih.
12. A'n huonna bang chu insang tak a na, kotkharpui sawmpahni a nei a, kotkharhai chu vantirko sawmpahniin an veng a; chuong kotkhara chun Israel hnam sawmpahni hming a'n ziek a.
13. Sak tieng kotkhar pathum, hmar tieng kotkhar pathum, sim tieng kotkhar pathum, thlang tieng kotkhar pathum a um seng a.
14. Khawpui inhuonna bang chun innghatna lungphum sawmpahni a nei a, chu taka chun Beramte tirko sawm pahnihai hming a chuong bok a.
15. Mi betu vantirko chun khawpui le a kotkharhai le a'n huonna bang hai inkhi dingin rangkachaka siem inkhina hmol a chawi a.
16. Khawpui chu a hang inkhi a, kilometar sanghni le zali vela sei a na. A dung le a khang le a'n sang dan chu a'n chen vong a.
17. A'n huonna bang chu mihriem inkhina hmangin vantirko chun a hang inkhi a, metar sawmruk vela sa a nih.
18. A'n huonna bang dingin jaspar lung an hmang a, khawpui chu darthlalang anga fim rangkachak hlira siem a nih.
19. Khawpui inhuonna lungphumhai chu lung man tam chi hrang hranga siem a na, lungphum pakhatna chu jaspar lung a na, a pahnina chu safir lung a na, a pathumna chu kalkidon lung a na, a palina chu emeral lung a na,
20. a pangana chu sardonik lung a na, a parukna chu karnelian lung a na, a pasarina chu kruso lung a na, a parietna chu beril lung a na, a pakuona chu topaz lung a na, a sawmna chu krusopras lung a na, a sawmpakhatna chu huakintho lung a na, a sawmpahnina chu amethi lung a nih.
21. Kotkhar sawmpahni chu tuikeplung sawmpahni, tlang khat senga siem a nih. Khawpui kotthler chu rangkachak hlir, darthlalang anga fim a nih.
22. Khawpuia chun tempul hrim ka hmu nawh, Lalpa, Iengkim Pathien le Beramte chu an tempul an ni si a.
23. Khawpui entu dingin ni le thla var hrim a ngai ta nawh, Lalpa ropuina chun a en a, Beramte chu an khawnvar a nih.
24. Hnam tin chu a enga chun leng an ta, hnuoia lalhai khomin an ropuina hung som lut an tih.
25. A kothai chu sunah khar ni ngai naw ni a, zan a um ta bok nawh.
26. Hnam tinin an ropuina le chawimawina hung som lut an tih.
27. Thil porche ieng khom a lut thei naw a, thil tirdakum thawtuhai le khel hril hmanghai chu lut thei bok naw ni hai; Beramte hringna bua hming chuonghai chauh lut thei an tih.
←  Revelation (21/22)  →