←  Revelation (20/22)  →

---

1.

Chun, vana inthoka vantirko pakhat hung tum ka hmu a, khuorkhurum chabi le khaidiet lien tak a chawi a.

2.

Dragon, Rulpui Hreu, Diebol le Setan chu a man a, kum sang intang dingin a khuop a,

3.

kum sang a'n voi hma chu hnamhai a hlem ta nawna dingin khuorkhuruma chun a thlak a, a kal a, a char khum a. Chu hnunga chun sawtnawte insuo ni nawk a tih.

4.

Lalthungphahai ka hmu a, a chunga thunghai khom, anni chu rorel theina an pek a. Isu thu an hril lei le Pathien thu leia lu an tanpekhai thlarau ka hmu a. Sahrang le a lim be ve lo, an bawk amanih an kut amania inchikna um ve lohai thlarau ka hmu bok a. Chuonghai chu an hung hring nawk a, Krista rawiin kum sang ro an rel a.

5.

Mithi danghai ruok chu kum sang a'n voi hma chun an la hring hri nawh. Hi hi thonawkna hmasa chu a nih.

6.

Thonawkna hmasa taka thanghai chu an thienghlimin an hamtha, thi hnina chun an chungah thu hrim a nei ta naw a, Pathien le Krista ta dingin thiempu ning an ta, ama leh kum sang ro rel an tih.

7.

Kum sang khat an voi hnungin Setan chu a'n tangnaa inthokin insuo ning a ta,

8.

hnuoi kil lia Jentelhai, Gog le Mogog hai chu hung hlem tawl a ta, indo dingin thuoi khawm a ta, an tamzie chu tuifinriet kama tieuvut ang el a nih.

9.

Hnuoi khang dapin an hung a, Pathien mihai kul le a khawpui dit tak chu an inhuol a, sienkhom vana inthokin mei a hung tla a, anni chu a lem zo tah a.

10.

Anni hlemtu Diebol chu sahrang le zawlnei tehlem an thlakna, kata chok meidilah chun an pei a, chu taka chun a sun a zanin hremna chatuonin tuor tang an tih.

11.

Chun, lalthungpha var ropui tak le a chunga thung ka hmu a, a hmaa inthokin hnuoi le van an tlan hmang a, hmu ding an um ta nawh.

12.

Mithihai, a chin a lien, lalthungpha hmaa ngir ka hmu a, lekhabu ziel an phar a. Chun, lekhabu ziel dang an phar ka hmu bok a, chu chu hringna lekhabu a nih. Chu lekhabua an thilthaw inziek ang pei chun mithihai chungthu chu an rel a.

13.

Tuifinriet chun a sunga mithihai chu a'n suo a, Thina le Mithi Khuo khomin mithi an kolhai chu a'n insuo bok a, mi tin chu an thilthaw ang peiin an chungthu an rel a.

14.

Thina le Mithi Khuo chu meidilah an pei a. Hi meidil hi thi hnina chu a nih.

15.

Tu khom hringna bua hming chuong naw chu meidilah an pei a.

---

←  Revelation (20/22)  →