←  Revelation (2/22)  →
1. "Efesi kohran vantirko kuoma chun hieng hin ziek rawh: A kut chang tienga arasi pasari chawi, rangkachak khawnvar siena pasari laia inlon inlon khan hieng thu hi a hril a nih:
2. I thilthawhai ka hriet, i sin inrimzie dam, i selzie dam, mi rilohai i ngai thei nawzie dam, tirko ni si lo tirkoa insalhai chu fie a, a tehlem an nih ti i man suok thuhai dam ka hriet a.
3. Ka hming leiin sel takin, harsatnahai beidong loin i tuor tihai khom ka hriet.
4. "Amiruokchu, inthiem nawna che ka nei: i mi hmangai tir ang khan i mi hmangai ta nawh.
5. I mi tluksan nasatzie hi ngaituo la, sim la, a tira i thaw ang khan thaw nawk rawh. I sim naw chun i kuomah hung ka ta, i khawnvar siena kha a hmuna inthokin son hmang ka tih.
6. Ka theida zawng, Nikolahaic thilthaw i theida ruok hi chu i thaw tha.
7. Thlarauin kohranhai kuoma thu a hril hi hriet theina dinga na nei chun ngaithla ngun raw se. A hnetu taphot chun Pathien paradis-a hringna thing ra fa thei an tih" tiin.
8. "Smurna kohran vantirko kuoma chun hieng hin ziek rawh: A Hmasatak le Nuhnungtak, thia hring nawk ta khan hieng hin a tih:
9. I tuornahai le i pasietziehai ka hriet, sienkhom i hausa si. Juda mi ni lo, Juda inti, Setan Sunagoga mihaiin an hril siet dan che khom ka hriet.
10. I thil tuor ding hi ti naw. Ngai ta, nangni laia mi thenkhat chu lung inah khumin Diebol chun a fie ding cheu a na, ni sawm sung suknomnatna tuor in tih. Thi chenin ringum takin um pei la, hringna lallukhum peng ka ti che.
11. Thlarauin kohranhai kuoma thu a hril hi hriet theina dinga na nei chun ngaithla ngun raw se. A hnetu taphot chu thi hnina chun ieng khom law thei naw nih.
12. "Pergamos kohran vantirko kuoma chun hieng hin ziek rawh:
13. Kawlhnam ngei ton, ngei tak neitu khan hieng hin a tih: Setan lalthungpha innghatna hmunah i um ti ka hriet; sienkhom ka hming i chel tlat a, ka thu hretu mi ringum Antipa kha, in khuo Setan hmuna an that lai khom khan, i mi ringna i'n phatsan chuong nawh.
14. Amiruokchu, demna met che ka nei, Balaam zirtirna thu pomtu nangni lai in kol leiin. Ama chun Balak chu Israel nauhai thuoi suol dan a'n chuktir a, Israel nauhai chu milem biekna sa fa ding le inditna suola lut dingin a thuoi suol a.
15. Chuong ang bokin, nangni lai Nikola zirtirna chel tlat in um a.
16. Chuleiin sim ro, chuong naw chun in kuomah hung nghal ka ta, ka baua kawlhnam hin ka hung bei tawl ding cheu a nih.
17. Thlarauin kohranhai kuoma thu a hril hi hriet theina dinga na nei chun ngaithla ngun raw se. A hnetu taphot kuoma chun manna inthup thenkhat chu peng ka ta; chun lung var pe bok ka ta, chu lunga chun a dongtu chauin a hriet hming thar a chuong" tiin.
18. "Thuatira kohran vantirko kuoma chun hieng hin ziek rawh: Pathien Naupa, meichok inhlap ang mit nei le dar tle chi ang ke nei chun hieng thu hi a hril a nih:
19. I thilthawhai ka hriet, i mi hmangaizie dam, i ringumzie dam, i rongbawl dan dam, i tuorselzie dam, i tan hlim neka tuta thil i thaw nasat lemzie dam.
20. Amiruokchu, demna che ka nei; nuhmei Jezebel, zawlnei inti kha i ngai thei leiin; ama chun ka siehlawhai chu indit ching ding le milem biekna sa fa dingin a zirtir a, a thuoi suol a.
21. A simna dingin hun ka pek a, sienkhom indit ching a bansan chuong nawh.
22. Chuleiin, natna khumah the thlung ka ta, a uirepuihai khomin an thil ching an sim naw chun nasa takin tuor an tih.
23. A nauhai chu khawng hlum ka ta, chuongchun lungril le ngaituona po po hre vongtu ka nizie kohranhaiin hrieng an tih. In thilthaw ang peiin rul seng ka ti cheu.
24. "Thuatira khuoa mi danghai chun hi zirtirna hi zawm ve lo a, 'Setan thuruk ril' an tihai khom in pom ve naw leiin in chungrikna belsa nawng ka tih.
25. Ka hung nawk hma khat in thil nei kha vong tlat ro.
26. A tawp chena ka ditzawng thawtu le hnetu chu, ka Pa kuoma inthoka thuneina ka hmu ang bokin, hnam tin chunga thuneina peng ka ta,
27. ama chun thir hmol hmangin an chungah ro rel a ta, pil bel angin deng dar a tih.
28. Chun, sikhawvar khom pe bok ka tih.
29. Thlarauin kohranhai kuoma thu a hril hi hrietna dinga na nei chun ngaithla ngun raw se" tiin.
←  Revelation (2/22)  →