←  Revelation (16/22)  →
1. Tempul sunga inthoka hung suok rawl inring tak chun vantirko pasarihai kuomah, "Fe unla, Pathien lungsenna berbu pasarihai chu hnuoiah bun thla ro" a ti ka hriet a.
2. Vantirko hmasa tak chu a fe a, a berbu chu hnuoiah a bun thlak a; chuongchun sahrang le a'n chikna puttuhai le a lim betuhai chungah pan hri, rimsie le na tak a'n leng ta nghal a.
3. Vantirko pahnina chun a berbu chu tuifinrietah a bun thlak a; chuongchun, mithi thisen ang elin a hung inchang a, tuifinrieta thilhring cheng po po chu an thi vong a.
4. Vantirko pathumna chun a berbu chu vadung le tuikhura hai a bun thlak a, thisenin an hung inchang a.
5. Tui enkoltu vantirko chun, "Um zing le Um tah, Nang mi Thienghlim,Ro chu i rel ta ngei a,I rorel chu a va'n dik ngei!
6. I mi thienghlim le zawlneihai thisen,Insuotuhai chu an phu ang hrimin,Thisen bok i'n dawntir ve ta hi"a ti ka hriet a.
7. Maicham chun "Ni e, Lalpa, Iengkim Pathien,I rorel chu indikin,A fel a nih"a ti ri ka hriet bok a.
8. Vantirko palina chun a berbu chawi chu nisaah a bun thlak a, nisa chu mihriemhai em ut vong theina thu pek a ni a.
9. Chuongchun mei sa takin mihai chu a em ut a; sienkhom, hremna chunga thuneitu Pathien hming chu an hrilsiet a, an sim chuong naw a, ama an chawimawi nuom chuong bok nawh.
10. Vantirko pangana chun a berbu chu sahrang lalthungphaah a bun thlak a, chuongchun a ram chu a hung inthim ta vong a. Na tuorin mihai chun ha an rawt a.
11. An p�nna natin a khei lei le an nat tuor lei chun van Pathien an hrilsiet a, an thilthawhai an sim chuong naw a, Pathien an chawimawi nuom chuong bok nawh.
12. Vantirko parukna chun a berbu chu Eufretis vadungpuiah a bun thlak a, vadung tui chu a kang chat a, sak tienga inthoka lalhaii hungna ding lam chu a hong tah a.
13. Chun, dragon baua inthok dam, sahrang baua inthok dam, zawlnei tehlem baua inthok dama hung suok thlarau tirdakum pathum, utok ang deu, ka hmu bok a.
14. Chuonghai chu ramhuoi thlarau an ni a, thil mak khom an thaw hlak a. Iengkim Pathien ni ropuia indonaa hung thuoi khawm dingin khawvel lalhai po po kuomah an fe a.
15. "Ngai ta u, rukru angin ka hung ie, inringa inzo diema inchei chu a hamtha, mihaiin saruoka phawka an inzak nawna dingin"
16. Chuongchun, lalhai chu Hebrai tonga Armagedonj an ti hmuna chun an hung thuoi khawm a.
17. Vantirko pasarina chun a berbu chu boruokah a bun thlak a, tempula lalthungphaa inthok chun rawl inring tak a hung suok a, "Zo a ni tah" a ta.
18. Chu zoah, kawl a hung inlep zuk zuk a, rawl a hung suok a, van a'n rum dur dur a, lir nasa takin a'n hning a, mihriem um chinah chuong anga lir inhning nasa chu a la um ngai nawh.
19. Khaw ropui chu hmun thumah a koi phel a, Jentel khawpuihai chu a chim a. Babulon khaw ropui chu Pathienin a'n hmai naw a, berbua a lungsenna uoiin sung sip chu a'n dawntir tah a nih.
20. Thlierkar po po an tlan hmang a, tlanghai khom hmu ding an um ta nawh.
21. Vana inthokin riel lien tak tak, kilogram sawmnga laia rik, mihriem chungah a tla a. Riela hremna lei chun Pathien chu mihaiin an hrilsiet a, hremna chu a rapthlak hle hrim a.
←  Revelation (16/22)  →