| ← Revelation (15/22) → |
| 1. | Chun, vanah inchikna dang ropui tak le mak tak ka hmu a: vantirko pasariin hremna nuhnung pasari an hung chawi a, chuong hremnaa chun Pathien lungsenna chu a tlung kim tah a nih. |
| 2. | Darthlalang ang tuifinriet, mei le inpol chu ka hmu a, sahrang le a lim le a hming nambar hnetuhai chu ka hmu bok a, Pathien pek tingtang chu chawiin darthlalang ang tuifinriet kama chun an ngir a. |
| 3. | Anni chun Pathien siehlaw Mosie hla le Beramte hla chu an sak a:"Lalpa, Iengkim Pathien,I thilthawhai a ropuiin a va mak de!Aw, chatuon hnam tin Laltak,I lampuihai chu a'n dik fel ngei! |
| 4. | Aw Lalpa, tu am nangma ti loa,I hming chawimawi lo ding um?Nangma chauh i thienghlim a,Hnam tin i hmaah hungin,Hung chawibiek an ti che a,I thilthaw indikzie hai chuTar lang a ni ta si a"tiin. |
| 5. | Chu hnung chun ka hang en a, vana tempul hmun thienghlim tak chu a lo inhong a, |
| 6. | hremna pasari chawi vantirko pasarihai chu tempula inthok chun an hung suok a, puon zai inhmi fai tak, tle sur elin an inthuom a, rangkachak hruolin an awm an hren bok a. |
| 7. | Chatuona hring zing Pathien lungsennaa sip rangkachak berbu pasari chu thilhring palihai laia pakhat chun vantirko pasarihai chu a pek a. |
| 8. | Tempul chu Pathien ropuina le a thilthawtheina khu chun a'n zam sip ta mup a, vantirko pasarihai chawi hremna pasari chu zo a ni hmakhat tu khom tempula chun an lut thei nawh. |
| ← Revelation (15/22) → |