←  Revelation (10/22)  →

---

1.

Vantirko dang, thilthawthei tak, vana inthoka hung tum ka hmu a. Ama chu sumin a'n thuom a, a lua chun sumrisang a'n zam a, a hmel chu nisa ang a na, a ke chu mei ban ang a nih.

2.

A kuta chun lekhabu ziel, phar sa, chite hi a chawi a. A ke chang tieng chun tuifinriet a sir a, a voi tieng chun khawmuol a sir a,

3.

sakeibaknei inhuk anga inringin a'n huk a, chuonga a hang inhuk chun vaninrum pasarihai chun rawl an insuo a.

4.

Vaninrum pasarihai.thu hril ziek thlak ka tum lai chun vana inthoka rawlin, "Vaninrum pasarihai thu hril chu ip tlat la, ziek thla naw rawh" tiin a mi hung hril a.

5.

Tuifinriet le khawmuol sira ngir vantirko ka hmu chun a kut chang tieng chu van tieng a phar a.

6.

Chatuona hring zing, van le a sunga um hai, hnuoi le a chunga um hai, tuifinriet le a sunga um hai siemtu hming chu salin, "Sawt riel ta naw nih!

7.

Vantirko pasarinain kona tawtawrawt a mut pha chun, Pathien thuruk, a siehlaw zawlneihai kuoma a hril ang khan, hung tlung kim tang a tih" a ta.

8.

Chun, vana inthoka rawl ka hriet khan a mi biek nawk a, "Tuifinriet le khawmuol sira ngir vantirko kuta lekhabu ziel inphar saw va la rawh" a ti ka hriet a.

9.

Vantirko kuoma chun ka fe a, "Lekhabu ziel chite kha mi pe rawh" ka ta. Ama chun, "La la, fa rawh. I phingpui chun thurf ti hleng a ta, i baua ruok chu khuoizu angin thlum a tih" a ta.

10.

Vantirko kuta lekhabu ziel chite chu ka lak a, ka beng ta vong a, ka baua chun khuoizu angin a thlum a, ka hang lem ruok chun ka phinga chun a thur ta em em a.

11.

Ama chun ka kuomah, "Mi hai, hnam hai, tong tum tum hai le lal hai chungchang thu i puong nawk ding a nih" tiin a mi hril a.

---

←  Revelation (10/22)  →