←  Psalms (94/150)  →
1. Phuba latu, aw LALPA, Phuba latu, aw Pathien, Hung inlang ta rawh, Pathien!
2. Leihnuoi chunga Roreltu,Hung thoin ro hung rel la,An phu tawk ang hu peiin,Chapohai hi thungrul rawh.
3. Aw LALPA, mi suolhai hi,Ieng chen rau am hlang i ta,Ieng chen hiel am an hlim ding?
4. Chapo takin an tong a,Thil suol thaw chingtuhai hin,Uong chin tawk hrim an nei nawh.
5. Aw LALPA, mi suolhai hin,I mihai an sir sop a,I rochanhai an neksawr.
6. Hmeithai le ram dang mihai,An nuom nuomin an phil a,Fahrahai an that pei bok.
7. "LALPA chun hmu hlak a tim!Israelhai Pathien chun,A ngaisak nawh" ti'n an hril.
8. Mi intlawhai, ngaituo ro,Ieng tik am var suok in ta?
9. Nakawr siemtun hre loin,A um in ring reng reng maw?Mit siemtun hmu thei loin,A um in ring reng reng a?
10. Hnam thununtu'n hrem loin,An suo in ring reng reng maw?Mihriem zirtirtu meu chun,Hrietna a tlasam ding maw?
11. LALPAN mihriem ngaituohai,Iengkim a hriet fai vong a,Ieng ma lo el a ni khom,A hriet chieng em em a nih.
12. Aw LALPA, i thununhai,I dan i zirtirhai chu,An va hang hamtha de aw!
13. Mi suolhai tlakna ding khur,Tlakhol an cho lai chen khom,Buoina laka inthokin,Chawl hadamna i pek hlak.
14. A rochan le a mihai,LALPAN thlathlam nawng a ta,Maksan tawl ngai bok naw nih.
15. Mi fel kutah rorelna,Inhlan kir ni nawk a ta,Lungrila mi ngil poin,Chu chu tawmpui seng an tih.
16. Mi suolhai chu do dingin,Tu am hung pen suok a ta?Mi rilohai laka chun,Tu'nam mi hum ngam a ta?
17. LALPA chu mi thangpuitu,Lo ni hlauh naw sienla chu,Fam khuoah cheng tang ka tih.
18. "Ka sir an phet" ti charin,LALPA, nang chun hmangainan,I mi chel ngir nawk hlak a.
19. Ka beidong lungzing laiin,Hnemin i mi sukhlim hlak.
20. Mi chunga phurrik siemtu,Rorelna indik naw chu,Nang leh an inkop thei nawh.
21. Mi fel chu an bei hron a,Poi tawk lo chu thi dingin,Thiem naw an inchangtir hlak.
22. Sienkhom LALPA Pathien chu,Ka kulpui le lungpui bel,Ka'n humhimna a ni si.
23. Aman an suolnahai chu,La hung thungrul ngei a ta,An ritlonahai leiin,Anni chu nuoi hmat a ta,LALPA ei Pathien ngei chun,Anni chu nuoi bo a tih.
←  Psalms (94/150)  →