←  Psalms (88/150)  →

---

1.

Mi sandamtu LALPA Pathien,Sun-zanin nang ka ko che hi,

2.

Ka tongtaina i kuom tlung sien,Ka hnina lo ngaithla hram rawh.

3.

Ka thla hi buoinan a chim a,Thlan koa ngir ang kan tah hi.

4.

Thlan khura liem dinghai laia,Tiem sa ka lo ni ta hiel a,Tha hlekte khom ka nei ta nawh.

5.

Mithi laia an maksan tah,Thlana zal ruonghai ang ka nih.Chuonghai chu i hriet ta naw a,I lakah sat thlak an ni tah.

6.

Thlan mong dapah i mi sie a,Hmun inthim sa tawpkhawka chun.

7.

I lungsennan mi del dein, A sosang chun a mi chim vel.

8.

Ka ruol thahai i mi lakpek, Anni pangzat mi'n hlawtirin,Che thei loin i mi khuokhir.

9.

Lungngaiin ka mit a'n vai a,Nangma tieng ka kut hung pharin,Ni tin ka ko che aw LALPA.

10.

Mithihai ta dingin thil mak,I thawpek hlak reng am a ni?Mithi tahnung hung tho nawkin,An inpak che i ringa maw?

11.

I hmangaina thlanah hrilin,I ringumna sietna khurah,Puongin a um reng reng hlak maw?

12.

I thilmak thawhai hmun thimah,Hmu thei a ni hlak am a ni?Hriet zing hlaw ta lohai ramah,I'n dikzie an hriet phak ding maw?

13.

LALPA kei chun ka ko che hi,Tuk tin ka hnina a hung tlung.

14.

Ieng dinga kei mi pei thla a,LALPA i hmel i thup a na?

15.

Ka tleirawl a'nthok tuor tanin,Ka thi vang vang chang a tam a;I tibaiumnan mi manin,Beidong takin ka um hlak kha.

16.

I lungsennan a mi nuoi a,Ka tina che'n ka chau se tah.

17.

Tui angin an mi chim ni tin,Ka velin an mi'n huol khum hlak.

18.

Ka ruol bul le ka lainahai,I mi lak hmangpek dai si a,Thim hi ka ruol nei sun an tah.

---

←  Psalms (88/150)  →