Psalms (77/150)  

1. Rawl tawp suoin Pathien ka ko,Mi ngaithla di'n ka ko inring.
2. Ka beidong pha LALPA ka zong;Ban kham ding khom dawn lek loin,Zankhawvarin ka phar suok a,Sienkhom ka thla a muong thei nawh.
3. Pathien ngaituoin ka'n rum a,Chau hnep khopin ka dawnkhawl hlak.
4. Ka'n sim met khom i phal naw a,Beidongin ka tong thei ta nawh.
5. Hun liem tahai ka dawn kir a,Kum sul tam liem ta hnunghai kha;
6. Zanah khun taka dap velin,Lungrilin zawna ka'n don a:
7. "LALPA chun mi hnawl kumkhuoin,A mi ditsak naw song ding maw?
8. Ami hmangaina re songin,A thutiem a'n kheltir ding maw?
9. Zangai nachang theinghil songin,Lungsen leiin a lainatna,A kharkhip song el di'm a ni?"
10. Chuongchun, hi hi ka ti hiel a:"Chunghnungtak kut a chawl el hi,Kei ka beidongna tak a nih."
11. Kei chun LALPA, i thilthawhai,Tien a'nthoka i thilmak thaw,Tinrenghai chu hre zing ka tih.
12. I thilthawhai dawnkhawl ka tih,Thil ropui tak i thawhai chu,Suiin ngaituo rop hlak ka tih.
13. Aw Pathien, i lampui a tha;hEi Pathien anga ropui hi,Pathien dang hrim an um ngai nawh.
14. Thilmak thawtu Pathien i na,I hratzie hnam tin i'n entir;
15. I ban tha hratin i'n tlan suok, I mi, Jakob-Josef thlahai.
16. Aw Pathien, tuihai chen khomin,An hmu chein an thlabar a,Li inthukhai an inthin hawp.
17. Sumin ruo a'n surtir chur chur,Khawk dur durin van a'n rum a,Kawl inlepin a phe zuk zuk.
18. Sumpui inziel mup mup a'nthok,Tek a hung tla ri dur dur a,Kawlphe'n khawvel a det suok a,Hnuoi inthinin a'n sawi bup bup.
19. Tuipui chu i lampui a na,Tui inthukhai i fe thleng hlak,Sienkhom i hniek an hmu ngai nawh.
20. Mosie le Aron kut hmangin,I mihai chu ran ruol angin,I thuoi dul dul hlak a ni kha.

  Psalms (77/150)