Psalms (63/150)  

1. Aw Pathien, ka Pathien i na,Nangma ka zong ngar ngar che a,Ram tawl, ram sie, tui vangnaah,Ka thlarau hi nangma ngaiin,A dang a char takmeuh si a;Ka taksa'n a ngai che a nih.
2. I hmun thienghlimah ka hung a,I hratzie le i ropuizie,Ka hung thlir vong vong a nih.
3. I hmangaina chuoi ngai lo chu,Hringna neka a hlut leiin,Ka hmurin chawimawi ka ti che.
4. Ka dam sungin chawnban vawrin,I hming hi inpak pei ka tih.
5. Bu hnienghnar tak tlan ang elin,Ka thlarau hi a tlai hle a,Ka hmur khom lawm hlaa sipin,Ka bauin ka'n pak che a nih.
6. Khum laizawlah ka nghil naw che,Zankhuon i thu ka dawnkhawl hlak.
7. Mi thangpuitu chu nang i na,I thla hnuoiah hlim zai ka vawr.
8. Ka thlain a'n tul zing che a,I kut chang tiengin i mi kuo.
9. Ka hringna la tumtuhai chu,Khuorkhurumah la tlang an ta,
10. Kawlhnama sat hlum ning an ta,Sihalin an sa tlan an tih.
11. Lal chu Pathienah hlim a ta,Pathien hming lamtuhai poin,Ama chu la chawimawi an ta,Mi khelhliphai bau ruok hi chu,Kharpekin la um ngei a tih.

  Psalms (63/150)