←  Psalms (51/150)  →

---

1.

I hmangaina chuoi lo zarin, Ka chungah za ngai rawh, Pathien, Zangaina i hauzie angin,Ka bawsietnahai thai bo rawh.

2.

Ka khawhlonahai sawp fai la,Suola inthok mi tleng fai rawh.

3.

Ka bawsietnahai ka hriet a,Ka suolna ka hmasom zing a.

4.

I lakah thil suol ka thaw a,A nih, i mit hmua ngei chun,Thil suol ka lo thaw tah a nih.Ka chungthu i rel indik ie,Demna ding hrim hrim i um nawh.

5.

Ka nu sunga ka'n sieng laiin,Suol sa hrima von ka ni a,Ngai ta, suol saa pieng ka nih.

6.

Sung ril tienga takna i dit,Chuleiin ka sung ril takah,I varna thu mi zirtir rawh.

7.

Husawpa thein mi'n thien la,jChuongchun hung inthieng tang ka ta,Mi sawp faiin mi tleng fai la,Vur nekin hung var tang ka tih.

8.

Hlim le lawm ri mi'n hriettir la,Ka ru tliek khom hi hlim raw se.

9.

Ka suol lakah i hmai hup la,Ka bawsietnahai thai hmang rawh.

10.

Lungril inthieng mi siempek la,Ka sungrilah thlarau nghet tak,Intuoi thartir nawk rawh, Pathien.

11.

I lakah mi hnawl hmang naw la,I Thlarau Thienghlim ka lakah, Mi la hmangpek ngai bok naw rawh.

12.

Sandam hlimna mi pe nawkin,Thuawina thlarau mi pe la,Chu chun nangin mi suknghet rawh.

13.

Bawsetuhai chu i lampui,Kawkhmung ka ta, lamlet an tih.

14.

Aw ka Pathien, mi sandamtu,Thisen insuo leia thiem naw,Ka changna laka inthokin,Mi san suok la ka va ti ngei!Chuongchun, i felna inpakin,Rawl tawp insuo thei tang ka tih.

15.

LALPA, ka hmur mi hongpek la,I'n pakna hla puong suok ka tih.

16.

Inthawina i lawmzawng an nawh,Ni sien chu hung inthawi ka tih;Pumraw inthawi i lawm bok nawh.

17.

Pathien lawmzawng inthawina chu,Lungril tet koi vong hi a nih;Lungrila insir ngawi ngawihai,I hmusit ngai nawh, aw Pathien.

18.

I ditzawng angin Zion chu,Hnienghnarnan hung vur nawk ta la,Jerusalem kul banghai khom,Tungdingin indin thar nawk rawh.

19.

Chuongchun, i lawmzawng inthawina,Indik tak chu inhlan an ta,Pumraw inthawinan bawngchalhai,I maichamah inhlan an tih.

---

←  Psalms (51/150)  →